Masawakya a bya Mambo

Balongo ne banyenga yetu bamwesheshe bukishinka bwabo kwi Yehoba Lesa mu bimye bya makatazho ne mu bije bya mambo. Byubilo byabo bitutundaika atweba bonse kutwajijila kwikala bakosa mu lwitabilo, ne kuketekela’mba “Yehoba ukalama bulongo muntu wanji wa kishinka.”—Sala. 4:3.

ARGENTINA | Luusa lwa Kufunjisha Baana bya Bupopweshi

Ruth wakomejile mu kisemi kya bena Kilishitu, bino mu kuya kwa kimye wakookele saka akijitu mwanyike. Kulutwe, befwalamine na mwanamulume umo kabiji waimichile ne kusema mwana wamukazhi. Juba jimo, saka aji mu muzhi wa La Plata, Ruth wamwene Bakamonyi ba kwa Yehoba basapwijilenga saka batanchika mabuku pa tebulu kabiji wavulukile bintu byo afunjile ku bwanyike. Kino kyamulengejile kutendeka jibiji kupwila, kabiji watatwile ne kufunjisha mwananji wamukazhi bya mu Baibolo. Shanji uno mwana wakaine mingilo ya bupopweshi bwa kwa Ruth kabiji wayile na kuloba ku kije kya mambo kuba’mba bakanye Ruth kufunjisha mwanabo Baibolo ne kumusenda ku kipwilo.

Waimenejilengako Ruth mu mambo waambile’mba bansemi baji na luusa lwa kufunjishako mwanabo bintu byo baitabilamo ne kuba’mba kije kechi kiji na luusa lwa kunyanchijila luusa lwa bansemi ne, kanatu inge paji bishiino bibena kumwesha’mba babena kumutundaika kuba bintu byabula kufwainwa. Kije kyachibile’mba bansemi bafwainwa kunemeka luusa lwa mwana lwa kwisajila bupopweshi, nangwa kya kuba wakijingatu na myaka ina. Byo batwajile mambo ku kije kikatampe, kino kije kyachibile’mba mwana wakikepa kechi wakonsha kwisajila bupopweshi ne, kabiji amba bansemi bonse babiji baji na luusa lwa kufunjisha mwanabo bya bupopweshi.

Uno mwana wa kwa Ruth utanga Baibolo moba onse bufuku kabiji luno uya ne bainanji na kupwila. Kabiji ubena kwinengezha kuya na kufwakesha Betele mu muzhi wa Buenos Aires.

AZERBAIJAN | Luusa lwa Kumwesha Patoka Bintu byo Waitabilamo

Mutumwa Paulo wamwene’mba mu kipwilo kya bena Kilishitu ba kine, “umvwe kinungwa kimo kyamanama, ne binungwa byonse bimanamina nakyo pamo.” (1 Ko. 12:26) Byo byo kyajinga ne ku Bakamonyi ba kwa Yehoba mwaya ntanda yonse kimye kyamanaminenga banyenga babiji ba ku Azerbaijan, ba Irina Zakharchenko, ne ba Valida Jabrayilova. Mu February 2015, bakulumpe mu kafulumende bapelemo mambo bano banyenga babiji a kwingila mingilo ya bupopweshi yo babula kuswisha. Mutonyi wibatayile pa kaleya saka bakyangye kwamba mambo, kabiji na mambo a kubula kwamba bukiji ano mambo, banyenga baikele mu kaleya pepi mwaka umo, kabiji bebamanyikilenga ne kubula kwibaswisha kutambulapo bintu bimo bikebewa mu bwikalo.

Juba ja kwamba mambo byo jafikile, mu January 2016, mutonyi wafwishishe na mambo banyenga ne kuchiba’mba bapane mali, bino waambile’mba kechi basakupana mali ne, na mambo a byo bebakashile saka bakyangye kwamba mambo. Onkao mambo, wibaswishishe kubwela ku mazubo abo. Kimye kije kikatampe kya Baku Court of Appeal byo kyakaine kumvwa mambo o batwajileko a kwibakasa kya lunkanankana nobe balenga mambo akatampe, batwajile ano mambo ku kije kyapelako mu kino kyalo. Kabiji balobele ne ku kavoto ka UN katala pa luusa lwa bantu na mambo a kwibamanyika ne kunyanchijila luusa lwabo lwa kumwesha patoka bintu byo baitabilamo.

Pa kino kimye, bano banyenga bakasuluka. Basanchila bingi balongo ne banyenga pa milombelo yo bebalombelangako ne byambo byabo bya lutekenesho. Nyenga Jabrayilova wanembele nkalata ku Jibumba Jitangijila, amba: “Milombelo yenu itukwashishe kuchinchika lumanamo. Kechi nkalubamo butemwe bwa Yehoba, ne bo mwitumwesha anweba ne balongo mwaya ntanda ne.”

ERITREA | Bebakasa na Mambo a Lwitabilo Lwabo

Kufika mu July 2016, kafulumende wa Eritrea wakasa Bakamonyi ba kwa Yehoba 55 mu tuleya na mambo a lwitabilo lwabo. Balongo basatu, ba Paulos Eyassu, ba Isaac Mogos, ne ba Negede Teklemariam baikala mu kaleya kufuma mu September 1994, kabiji kafulumende wakasa ne balongo bakwabo batanu na bana pa myaka jikumi.

Kintu kyawama kyamwekele mu January 2016 kimye kije kya mambo kyatotolwele mambo a Bakamonyi bo bakwachile pa Kivuluko mu muzhi wa Asmara mu April 2014. Kino kyo kyajinga kimye kitanshi kafulumende kyo atwajile Bakamonyi ku kije mu jishinda jaswisha mizhilo ne kwibaswisha kwipokolola ku mambo. Balongo ne banyenga bavula bebazhachishe na mambo, amba bataainwe ku kupwila kwakanya mizhilo, kabiji bebalipilishe mali ne kwibaswisha kubwela ku mazubo. Bino ba Saron Gebru, bajinga pa boba bo bakwachile, bakaine kulipila mali. Onkao mambo, bebakashile pa bañondo batanu na umo. Bebaswishishe kwibamona jimo mu mulungu, kabiji baambile’mba bebalaminenga bulongo. Nyenga Gebru ne Bakamonyi bakwabo 54 baji mu kaleya betusanchila bingi pa byo twibalombelako ne byo ‘tuvuluka aba baji mu kaleya, uba nobe betukashila nabo pamo.’—Hebe. 13:3.

GERMANY | Kuswisha Bantu Kwikala na Luusa lwa Kupopwela Lesa

Pa 21 December 2015, kije kya mu kibunji kya Bremen, mu kyalo kya Germany, kyapele kipamo kya Bakamonyi ba kwa Yehoba luusa lonse lo bapa jibumba ja bupopweshi mwayila mizhilo lo bebakanyijile kala. Kino kyamwekele byo papichile myaka ina ya kwamba ano mambo mu kije. Na mambo a byafuukwilepo Kije Kikatampe mu muzhi wa Berlin, bibunji byavula mu Germany byanembeshe kipamo kya Bakamonyi ba kwa Yehoba ne kwibapa luusa lonse lwafwainwa jibumba ja bupopweshi jo baitabizha ku kafulumende. Pano bino, kije kya mu kibunji kya Bremen kyakaine kupa Bakamonyi luno luusa na mambo a byambo bya bubela byo bebabepejilenga ku mabumba ebashikwa.

Mu 2015, Kije kya Mizhilo mu Germany kyafuukwile’mba kije kya mu Bremen byo kyakaine kupa Bakamonyi wa kwa Yehoba luusa lonse, kibobilenga nshiji. Kino kyalumbulula’mba mizhilo yapa Bakamonyi ba kwa Yehoba mu Bremen luusa lwa kupopwela lonka lujipo na mabumba a bupopweshi aswisha kafulumende. Kafulumende waswisha bipwilo mu kino kibunji kubula kulipila misonko, kabiji ne kwikala na luusa lumotu luji na mabumba akatampe a bupopweshi mu Germany.

KYRGYZSTAN | Kulwilako Luusa lwa Bupopweshi

Mu March 2013, bakulumpe ba kafulumende mu muzhi wa Osh mu kyalo kya Kyrgyzstan, babepejile Oksana Koriakina ne bainabo ba Nadezhda Sergienko amba balenga mambo. Bebabepejile’mba baibijilenga bantu mali kimye kyo bafunjishenga bantu Baibolo, kabiji mutonyi wibakashijile pa nzubo yabo mambo saka akyangye ne kufika mu kije. Mu October 2014, kije kya mambo kyataaine’mba mambo o bebakwachijilepo ajinga a bubela, kabiji kyachibile’mba kafwako mambo o balengele ne. Mu October 2015, kije kikatampe ko batwajile mambo nakyo byo byo kyachibile.

Pano bino, shabyambo waimenejilengako kafulumende mu muzhi wa Osh watwajile ano mambo ku Kije Kikatampe. Kino kije kyalengulwile byafuukwilepo bije bitanshi ne kufuukula’mba mambo beambe jikwabo. Byo beambilenga jikwabo mu April 2016, bashabyambo baimenejilengako banyenga balombele’mba ano mambo beashinke mambo kimye kyaswishiwa kya kwiambilamo mwayila mizhilo kyapichile kala. Onkao mambo, mutonyi washinkile ano mambo.

Mu byonse bino, banyenga batwajijile kuchinchika na lusekelo. Nyenga Sergienko waambile’mba: “Bantu bazhingila bingi inge bebamanyika, bino na mambo a kwituta muchima ku balongo ne banyenga, nayukile’mba Yehoba wantemwa, ne kuba’mba kechi nji bunke ne.” Bano banyenga bemwenejile’mba Yehoba ufikizha mulaye wanji uji pa Isaya 41:10, wa kuba’mba: “Kange uchine ne, . . . amiwa nkakukwata na kuboko kwami kwa kilujo kwa bololoke.”

KYRGYZSTAN | Luusa lwa Kupopwela Lesa ne Kunembesha Kipamo Mwayila Mizhilo

Pa 9 August 2015, bakapokola jikumi batwelele mu kipwilo mu muzhi wa Osh, mu Kyrgyzstan balongo saka babena kupwila. Balekeshe kupwila ne kwambila balongo kukila pa 40 bo bataainemo amba inge bakane, basakwibaloza mata. Kabiji basendele balongo jikumi ku ofweshi wa bakapokola ko bakapumijile balongo batanu na bana, apa bino bebalekako. Byo papichile moba abiji, bakapokola bakwachilepo mulongo umo pa boba bo bapumine, aye Nurlan Usupbaev ne kumupamo mambo a kutangijila kupwila kwa bupopweshi ko bakanya ku kafulumende.

Byo batwajile Mulongo Usupbaev ku kije kya mambo mu muzhi wa Osh, mutonyi wakaine’mba kafwapo bishinka bya kumupelapo mambo ne, onkao mambo beashinkile. Shabyambo waimenejileko kafulumende walombele’mba ano mambo beatwale ku Kije Kikatampe kya mu muzhi wa Osh, bino kino kije nakyo kyakaine’mba kafwapo bishinka bya kumupelapo mambo mulongo Usupbaev ne, mambo Bakamonyi ba kwa Yehoba banembesha bupopweshi bwabo ku kafulumende mwayila mizhilo mu Kyrgyzstan.

Shabyambo watwajile jibiji ano mambo ku Kije Kikatampe kya mu Kyrgyzstan. Bino Kije Kikatampe kyashinkile ano mambo mu March 2016, ne kufuukula’mba byonse byachibile bije bitanshi bibiji byajingatu bulongo, mambo Bakamonyi ba kwa Yehoba baji na luusa lwa kupwila. Kino kyasangajikile bingi Mulongo Usupbaev. Mambo akwabo atwajile balongo bo bapumine ku bakapokola bakyangye kwiamba mu bije.

RUSSIA | Luusa lwa Kupopwela Lesa

Kafulumende mu Russia watwajijila kumanyika Bakamonyi ba kwa Yehoba ne kukanya mwingilo wabo, nangwa kya kuba kipamo kitala pa luusa lwa bantu mu Russia kyakosako kukanya kafulumende kuba bino. Katataka papo, bakulumpe mu kafulumende batongwele mabuku etu 88 amba “alengela bantu kuba byatama,” kabiji bashinkile keyala wa pa Intaneti wa Bakamonyi ba kwa Yehoba, wa jw.org. Mu 2015, kafulumende wakaine kuswisha Baibolo wa Binembelo bya Ntanda Ipya kutwela mu Russia, kabiji kije mu muzhi wa Vyborg kikeba kubijika’mba uno Baibolo watama. Mu March 2016, Mukulumpe wa Bashabyambo mu Russia waambile’mba katatakatu bashinke ofweshi wa Bakamonyi ba kwa Yehoba waikela ku Solnechnoye mu muzhi wa St. Petersburg, amba mambo mwingilo wabo “ubena kutundaika bantu kuba byatama.”

Nangwa kya kuba kafulumende ubena kutundaika bano bantu kumanyika Bakamonyi ba kwa Yehoba, kuji bintu byawama bibena kumweka. Mu October 2015, shabyambo umo watwajile mambo ku kochi a kuba’mba bashinke kipamo kya Bakamonyi ba kwa Yehoba mu muzhi wa Tyumen, uji kwalepa makilomita 2,000 kufuma ku muzhi mukatampe wa Moscow. Nangwa kya kuba bataaine bishinka byamwesheshenga’mba bakapokola babepejile Bakamonyi, bino Kije Kikatampe kya mu Tyumen kyafwishishe Bakamonyi na mambo. Pano bino, pa 15 April, 2016, Kije Kikatampe kya mu Russia kyakaine byachibile kije kitanshi, ne kwamba’mba “kafwapo bishinka bya kushinkilapo kipamo kya Bakamonyi ba kwa Yehoba mu Tyumen.” Kimye mutonyi kyo abijikile byafuukwilepo kije, balongo ne banyenga 60 bajinga mu kochi basangalele bingi ne kupopwela.

Bantu ba Yehoba mu Russia bafuukulapo’mba “kafwako kyela nangwa kimo” kyakonsha kubunda bantu kikebakanya kupopwela Yehoba ne.—Isa. 54:17.

RWANDA | Luusa lwa Kufunda Sukulu kwa Kubula Kwibakatazha na Mambo a Bupopweshi

Mu myaka ya kulutwe kuno, baana ba sukulu Bakamonyi mu Rwanda babena kwibapanga masukulu na mambo a kukana kwivwanga mu bya bupopweshi nangwa bisela bya kutakaika kyalo. Na mambo a kino, pa 14 December, 2015, kafulumende wapaine mukambizho wa kukanya kukatazha baana ba sukulu na mambo a bupopweshi bwabo. Uno mukambizho waambile’mba masukulu afwainwa kunemeka luusa lwa baana ba sukulu lwa kupopwela Lesa.

Pa 9 June, 2016, pa kipungu kya Masawakya pa keyala wa jw.org pajinga mutwe wa kuba’mba “Kochi wa mu Kyalo kya Rwanda Walekesha Kumanyika Baana ba Sukulu na Mambo a bya Bupopweshi.” Kyawamineko kya kuba’mba pepala umo usampanya masawakya pa Intaneti mu Rwanda wasampenye uno sawakya. Bantu kukila pa 3,000 batangile sawakya wa uno pepala, kabiji bavula baambile byawama bingi pa byafuukwilepo kafulumende. Bakamonyi mu Rwanda basanta bingi pa mukambizho wapaine kafulumende walengela’mba baana babo bafundenga bulongo kwa kubula kwibakatazha na mambo a bupopweshi bwabo.

SOUTH KOREA | Luusa lwa Kukana Kutwela Bushilikale

Pa myaka 60 yapitapo, Bakamonyi babalume baji na myaka 19 kufika ku 35 mu kyalo kya South Korea bebakanjikizha kutwela bushilikale. Kafulumende mu South Korea wakana’mba bantu kechi baji na luusa lwa kukana kutwela bushilikale ne kabiji kechi wibaswisha kutwela nkito ya kukwashakotu yabula ya bushilikale ne. Bimye bimo mu kisemi kimotu kya Bakamonyi, bankambo yabo, bashabo, ne mwana wamulume bonse bebakasapo kala na mambo a kukana kutwela bushilikale.

Pa bimye bibiji, Kije kya Mizhilo mu kino kyalo kyafuukwilepo’mba muzhilo wa kutwela bushilikale wanembwa mu mizhilo ya kyalo, pano bino, bije bicheche ne banabalume bo bakasa na mambo a uno muzhilo batwala mambo abo ku kino kije kya mizhilo. Onkao mambo, pa 9 July, 2015, kino Kije kyatelekele ku mambo a boba bo bakwachile na mambo a kukana bushilikale. Mulongo Min-hwan Kim, ye bakashile pa bañondo 18 na mambo a kukana kutwela bushilikale washimikizhe’mba: “Bankashile ne kummanyika, apa bino bankasulula. Bino ndomba amba bakwabo bakana kutwela bushilikale bakabule kwibamanyika. Inge bebaswisha kwingilako mingilo ikwabo yabula ya bushilikale, bakakwasha kimasamasa.” Katatakatu Kije kya Mizhilo kikabijike byo kikafuukulapo.

TURKMENISTAN | Bahram Hemdemov

Mulongo Hemdemov, uji na myaka 53 wasongola kabiji uji na baana babalume bana. Bantu mu kimasamasa bamunemeka bingi mambo ke muntu wingijila Lesa na mukoyo. Mu May 2015, kije kyamukashile pa myaka ina, amba mambo “walajile mizhilo” byo anengezhezhe kupwila mu nzubo yanji. Bamukashila mu kaleya katama bingi kaji mu muzhi wa Seydi, kabiji bamupuma bimye byavula. Pano bino, watwajijila kulama bukishinka bwanji kwi Yehoba Lesa, byonkatu bibena kuba ne kisemi kyanji. Bakazhi ba Mulongo Hemdemov, ba Gulzira baya ku kaleya pa kimye pa kimye na kukosesha ne kutundaika bamwatawabo.

Pa kumona bantu ba Yehoba byo babena kwibikako kwikala ba kishinka kwi Yehoba mu meseko, twafwainwa kutwajijila kwibalombelako. Bukishinka bwabo bwitulengela kwikala ba kishinka kwi Lesa, saka twaketekela mu mulaye uji pa Salamo 37:28, amba: “Kechi ukalekelela bantu banji ba kishinka ne.”