Bantu mu Ntanda Babena Kwiloza Bingi—Baibolo Waambapo’mba Ka?

Mu July 2022, bambanzhi balozele bantu mwaya ntanda yonse:

• Pa July 10, 2022, pepala wa byambo wa The Japan Times waambile’mba, “Bantu mu kyalo ne mwaya ntanda yonse bakuminye bingi mbanzhi byo aipaile na buta mulwila ntanda wayukanyikilwe bingi mu kyalo kya Japan aye Shinzo Abe wajinga mukulumpe wa kyalo kala, mambo bumbanzhi kechi bumweka javula ne kabiji mizhilo yaamba pa bya kwingijisha mata yakosa bingi mu kino kyalo.”

• Pa July 4, 2022 kipamo kya Reuters kyaambile’mba, “Bantu mu kyalo kya Denmark bakuminye bingi mbanzhi byo aipaile bantu basatu na buta mu shitolo mukatampe wa mu muzhi wa Copenhagen.”

• Pa July 10, 2022 pepala wa byambo wa The Guardian waambile’mba, “Mu kyalo kya South Africa: Bambanzhi baipaile bantu 15 na mata mu kishimikwa kya maalwa mu muzhi wa Soweto.”

• Pa July 5, 2022, televizhonyi wa CBS wabijikile sawakya wa kuba’mba “Pa July 4 juba ja kukokoloka, bantu kukila pa 220 bebepaile na mata mu kyalo kya U.S.”

Nanchi buno bumbanzhi bukapwa nyi? Baibolo waambapo’mba ka?

Kupwa kwa Bumbanzhi

Baibolo utela kimye kyo tujimo’mba “moba a kupelako,” kimye bantu kyo bakekala bashinta kabiji bakanama bingi. (2 Timoti 3:1, 3) Bumbanzhi bwa uno mutundu bulengela bantu kususubala. (Luka 21:11) Nangwa byonkabyo, Baibolo walaya’mba bumbanzhi bukapwa kabiji ‘bantu bakekala mu mapunzha a mutende, bakekala mu mapunzha azhikijilwa kabiji bakekalanga ku matwi nzoo.’ (Isaya 32:18) Bumbanzhi bukapwa byepi?

Lesa ukafumyapo bantu babi ne konauna bilwilo byonse bya nkondo.

• “Pakuba bantu babi bakebonauna ne kwibafumyapo pano pa ntanda.”—Byambo bya Maana 2:22.

• Lesa ‘ukapwisha nkondo pa ntanda ponse. Ukachimauna buta bwa mukanda ne jifumo; ukasoka makalaki a nkondo mu mujilo.’—Salamo 46:9.

Lesa ukafumyapo bileta bumbanzhi kupichila mu kufunjisha bantu bya kwikala mu mutende.

• “Kechi bakekozhanga nangwa kwionauna pa mutumba wami yense wazhila ne, mambo pano pa ntanda pakakumbana maana a kuyuka Yehoba byonkatu mema byo akumbana mu kalunga ka mema.”—Isaya 11:9.

• Kabiji ne pa kino kimye, Lesa ubena kufunjisha bantu kuchinuzhuka bumbanzhi ne bilwilo byonse bya nkondo, ‘babunda mapoko abo ne kwialula ke bya kujimako ne mafumo abo ke a kukopawilako misampi.’—Mika 4:3.

Pa kuba’mba mufunjilepo bikwabo pa milaye ya mu Baibolo yaamba pa ntanda mukabula bilengesha moyo, tangai kibaaba kya mu kizungu kya kuba’mba “Freedom From Fear—Is It Possible?”

Pa kuba’mba mufunjilepo bikwabo pa bumbanzhi byo bukapwa kikupu, tangai kibaaba kya mu kizungu kya kuba’mba “Peace on Earth at Last!”