Kuloza Banyike Baana ba Sukulu—Baibolo Waambapo’mba ka?

Pa 24 May 2022, kintu kyatama bingi kyamwekele mu muzhi mucheche wa Uvalde, Texas, U.S.A. Kwesakana na pepala wa byambo wa New York Times waambile’mba “mwanamulume walozele banyike baana ba sukulu 19 ne bafunjishi babiji . . . Pa sukulu wa Robb Elementary School.”

Kyatamakotu ke kya kuba’mba buno bumbanzhi bubena kubiwa pa juba pa juba. Sawakya wa USA Today waambile’mba mu kyalo kya United States bunketu “mwaka wapwa baana ba sukulu bo baipayile bajinga 249 kukila bo baipayile kutendeka mu 1970.”

Nanchi mambo ka bumbanzhi o bwavujila bibye? Twakonsha kuba byepi na buno bukapondo? Abya kine bumbanzhi bukapwa nyi? Umvwai byaamba Baibolo.

Mambo ka bumbanzhi o bwavujila bibye mu ntanda?

• Baibolo waamba pa ano moba etu amba “moba a kupelako” mambo bantu bavula “butemwe” bafwabo kabiji “bashinta.” Abino byubilo byalengela bantu kubanga bintu byatama bingi. Kabiji bantu baji na bino byubilo “bakataminangakotu.” (2 Timoti 3:1-5, 13) Pa kuba’mba mufunjilepo byavula, tangai kibaaba kya mu kizungu kya kuba’mba “Did the Bible Predict the Way People Think and Act Today?”

Bantu bavula beipuzha’mba, ‘Mambo ka Lesa o abujila kukanya bumbanzhi bwa uno mutundu nabiji bubwe bwa kuloza banyike baana ba sukulu?’ Pa kuba’mba muyuke byaamba Baibolo, tangai kibaaba kya kuba’mba “Mambo ka Bintu Byatama o Bimwekela Bantu Boba Byawama?”

Twafwainwa kuba byepi na bumbanzhi bwa uno mutundu?

• “Bintu byonse byanembelwe kala bebinembele’mba tufunjileko, kuba’mba . . . mu lutekenesho lwa mu Binembelo twikale na luketekelo.”—Loma 15:4.

Mafunde a mu Baibolo afwainwa kwimukwasha kuyuka mwa kubila na bumbanzhi buji mu ntanda. Pa kuba’mba muyukilepo byavula, monai Labainga! uji na mutwe wa kuba’mba “Nanchi Bukapondo Bukapwa Nyi?”

Pa kuba’mba bansemi muyuke bya kukwasha baana benu mwa kubila na masawakya atama, monai mashinda aji mu kibaaba kya mu kizungu kiji na mutwe wa kuba’mba “Disturbing News Reports and Your Children.”

Nanchi bukapondo bukapwa nyi?

• “Ukebapokolola ku lumanamo ne ku bukapondo.”—Salamo 72:14.

• “Bakabundanga mapoko abo ne kwialula ke bya kujimako ne mafumo abo bakealula ke a kukopawilako misampi. Kisaka kya bantu kechi kikasuntwila mpoko kisaka kikwabo ne, kabiji kechi bakafunda kulwa nkondo jibiji ne.”—Mika 4:3.

Lesa ukafumyapo bintu byonsetu byatama byakankalwa kupwisha bantu. Kafulumende wa mwiulu ukonauna bilwilo byonse bya nkondo ne kufumyapo bumbanzhi bonsetu. Pa kuba’mba muyukilepo byavula bikooba Bufumu bwa Lesa, tangai kino kibaaba kiji na mutwe wa kuba’mba “Mu Bufumu bwa Lesa ‘Mutende Ukavula.’”