Bakamonyi ba kwa Yehoba bo Baipayile—Baibolo Waambapo’mba Ka?

Pa 27 January 2023, bantu bavula bakavulukanga Juba ja International Holocaust. Bintu byatama byamwekele myaka 75 yapitapo byakonsha kwimulengela kulanguluka pa ene mambo Lesa o aswishishe bantu bavula kwipayiwa.

• Pa kuba’mba muyuke byaamba Baibolo pa kino, tangai kibaaba kya kuba’mba “Mambo ka Lesa o Aswishishe Kuvizha Bayudea? Mambo ka Lesa o Abujijile Kukanya Kino?”

Bayudea bavula bebepayile bingi. Bantu bavula bebepayijilemotu kya nshiji. Bantu babujile kwikala Bayudea nabo bebepayile. Pa bano bantu pajinga ne Bakamonyi ba kwa Yehoba bo bamanyikilenga na mambo a kulondela mafunde a mu Baibolo.

• Pa kuba’mba muyukilepo byavula, tangai kibaaba kya kuba’mba “Ki ka Kyamwekejile Bakamonyi ba kwa Yehoba Kimye Kyafwile Bantu Bavula Bingi ne mu Makampu a Lumanamo?”

“Luketekelo ne bwikalo bwawama bwa kulutwe”

Bantu bavula balanguluka’mba bino bintu byatama byakonsha kumweka jikwabo. Bino Baibolo waamba pa kimye kya kulutwe kikabula kwikalako bino bintu byatama.

• “‘Mambo amiwa nayuka bintu byo mbena kulanguluka kwimubila, mbena kulanguluka kwimuletela mutende kechi bya malwa ne, kwimulengela kwikala na luketekelo ne bwikalo bwawama bwa kulutwe,’ byo byaamba Yehoba.”—Yelemiya 29:11.a

Abino bintu byawama bikamweka kimye Yehoba Lesa kyo akafumyapo bubi ne kuwamisha bintu. Katatakatu:

• Akafumyepo bantu bamanyika bakwabo.—Byambo bya Maana 2:22.

• Akabuke bonse babena kumanama.—Lumwekesho 21:4.

• AKasangule bantu bafwa.—Yoano 5:28, 29.

Ketekelai mu bintu byawama byalaya Baibolo. Pa kuba’mba muyuke ene mambo o mwafwainwa kubila bino, tubena kwimutundaika kufunda Baibolo kyatutu kwingijisha mutanchi wetu.