Mambo ka Lesa o Aswishishe Kuvizha Bayudea? Mambo ka Lesa o Abujijile Kukanya Kino?
Bavula bepuzha ano mepuzho ke boba bafwishapo kala balongo babo kabiji kechi bakebatu mukumbu ne, bino bakeba wa kwibatekenesha. Bakwabo nabo balanguluka’mba bantu bakizhamo kuba bintu byatama. Onkao mambo, kibakatazha bingi kwitabila mwi Lesa.
Milanguluko yabula kuyilamo yamba bantu pe Lesa ne pa kuvila kwa Bayudea
Bantu bamba’mba: Kyatama kwipuzha kyalengejile Lesa kuswisha’mba Bayudea bebavizhe.
Kishinka: Bantu bajinga na lwitabilo lwakosa bakipuzhapo kala Lesa ene mambo o aswishisha bubi. Ngauzhi Habakuka wamwipwizhe Lesa mba: “Mambo ka o mwalekelatu bantu na kumanyika bakwabo? Mambo ka lonaiko ne bukapondo o byaikela ku meso ami? Kabiji mambo ka lutobo ne malwañano o byavujila?” (Habakuka 1:3) Lesa kechi wamukajipijile Habakuka ne, bino wamwipwizhe mepuzho o anembele mu Baibolo pa kuba’mba bantu bonse bakeatangenga.
Bantu bamba’mba: Lesa kechi wata muchima bantu byo babena kumanama ne.
Kishinka: Lesa washikwa bingi bubi ne kumanama kupitamo bantu. (Byambo bya Maana 6:16-19) Mu moba a kwa Nowa, Lesa “muchima wanji waubile bulanda” na mambo a bukapondo bwakumbene mu ntanda. (Ntendekelo 6:5, 6) Kwambatu kishinka, Lesa kyamukolele bingi ku muchima Bayudea bavula byo bebepayile.—Malakai 3:6.
Bantu bamba’mba: Bayudea bavula bebavizhizhe mambo Lesa ye wibakambwilenga.
Kishinka: Lesa waswishishe muzhi wa Yelusalema kumonauna ku nzhita ya bena Loma. (Mateo 23:37–24:2) Kufumatu kyokya kimye, Lesa kechi wasalapo mutundu umo wa bantu kuba’mba ye atemwa nangwa’mba ye ye afwainwa kukambula ne. Kwesakana na mumwena Lesa, “kafwapo lupusano pakachi ka Muyudea ne Mungiliki ne.”—Loma 10:12.
Bantu bamba’mba: Inge kya kuba Lesa wa butemwe ne bulume bonse wajingako, inge wakainye kuvizha Bayudea.
Kishinka: Nangwa kya kuba Lesa kechi ye ulengela bantu kumanama ne, bino bimye bimo uswisha pa kakimye kacheche.—Yakoba 1:13; 5:11.
Mambo ka Lesa o aswishishe kuvizha Bayudea?
Lesa waswishishe kuvizha Bayudea na mambo antutu amo onka amulengela kuswisha bantu bonse kuyanda: ukeba kupwisha lukatazho lwa mambo akolomwene Satana. Baibolo waamba pa muntu ubena kulama ino ntanda pa kino kimye kuba’mba Diabola kechi Lesa ne. (Luka 4:1,2,6; Yoano 12:31) Bishinka bibiji biji mu Baibolo bitukwasha kulumbulula ene mambo Lesa o aswishishe kuvizha Bayudea.
Lesa walengele muntu na luusa lwa kwifuukwila. Lesa wabuujile bantu batanshi babiji, ba Adama ne Evwa bintu byo akebelenga’mba bobe. Pano bino, Lesa kechi wibakanjikizhepo kumukookela ne. Adama ne Evwa bajinga na luusa lwa kwisajilapo kintu kyawama ne kyatama. Kabiji kintu kyo basajilepo kyatamine bingi. Bantu bavula kufumatu ne kala kufikatu ne mu ano moba, bintu byo babena kwifuukwilapo mubena kufumatu byatama. (Ntendekelo 2:17; 3:6; Loma 5:12) Buku wa Statement of Principles of Conservative Judaism waamba’mba: “Twafwainwa kuyuka’mba makatazho avula abena kupitamo bantu ke na mambo a kubula kwingijisha bulongo luusa lwetu lwa kwifuukwila Lesa lo etupa.” Lesa kechi witwangata luusa lwetu lwa kwifuukwila ne, bino wapa bantu kimye kuba’mba bemwene bene inge bakonsha kwikala bwikalo bwawama kwa kubula Lesa kwibatangijila.
Lesa ukasangula bantu bafwa. Lesa walaya’mba ukasangula biumbi ne biumbi bya bantu bafwa kuvwangakotu ne Bayudea bo baipayile. Kabiji ukafumyapo bintu byonse byatama bikozha bantu ku muchima. (Isaya 65:17; Byubilo 24:15) Na mambo a kuba’mba Lesa watemwa bingi bantu, ukafikizha ino milaye yonse yo alaya.—Yoano 3:16
Bantu bavula bapichile mu ano makatazho ne boba bapulukile bakoseshe lwitabilo lwabo ne kuyuka ene mambo Lesa o aswishisha bintu byatama kumweka. Kabiji wakebesha bingi kufumyapo makatazho onsetu.