Nkondo iji mu Ukraine Yatwela mu Mwaka wa Bubiji—Ñanyi Bintu Biji mu Baibolo Bitulengela Kwikala na Luketekelo?

Pa Kitanu pa 24 February, 2023, nkondo iji mu Ukraine ikafikizha mwaka umo kufuma po yatendekejile. Masawakya amo aamba’mba bashilikale pepi na 300,000 bena Ukraine ne bena Russia bo bafwa nangwa bekozha, kabiji bantu pepi na 30,000 bo bafwa mu ino nkondo. Nangwa byonkabyo, akino kibelengelo kyakonsha kubayilako.

Kyatama bingi kuba’mba ino nkondo kechi ibena kumweka nobe isakupwa katataka ne.

• Pa 19 February, 2023, waileshi wa NPR (National Public Radio) waambile’mba: “Kufumatu kimye bashilikale bena Russia kyo batwelele mu Ukraine, kafwako kiyukilo kibena kumwesha’mba nkondo yakonsha kupwa katataka ne. Kechi kyayukanyikwa usakushinda mu ino nkondo ne, kabiji misambo ya kuleta mutende pakachi ka bino byalo kafwako.”

Bantu bavula baji na binyenge na mambo a misongo ne kumanama kubena kupitamo bantu babula mambo mwaya ntanda byafuma mu ino nkondo ne makondo akwabotu. Ñanyi bintu biji mu Baibolo bitulengela kwikala na luketekelo? Nanchi ano makondo akapwa nyi?

Nkondo ikapwisha makondo onse

Baibolo waamba pa nkondo ikapulusha bantu kechi kwibonauna ne. Ino nkondo itelwa’mba Amagedonyi, kabiji beilumbulula’mba “nkondo ya aja juba jikatampe ja Lesa wa Bulume Bonse.” (Lumwekesho 16:14, 16) Lesa ukengijisha ino nkondo kufumyapo bukalama bwa bantu bwaleta makondo avula. Pa kuba’mba muyuke Amagedonyi byo ikaleta mutende wa myaka, tangai bino bibaaba:

• “Nkondo ya Amagedonyi yo i Ka?”

• “Tubena Kutengela Amagedonyi”