Makatazho Afumamo mu Kubula Kwisamba na Bantu Abena Kuvujilakotu—Byaamba Baibolo

Kwesakana na sawakya wafuma katataka mu mapunzha avula mwaya ntanda,a pa bantu bana patainwenga muntu umo wabula bakwisamba nabo.

• Ba Chido Mpemba, bakulumpe ba kipamo kya World Health Organization’s Commission on Social Connection baambile’mba: “Muntu yense wakonsha kwikala kwa kubula bakwisamba nabo, kikale mwanyike nangwa mukulumpe, kechi na mambo a ku mpunzha ko ekala ne.”

Bantu bamo balanguluka’mba bantu bakoma bo bonkatu bekala kwa kubula bakwisamba nabo. Pakuba banyike, bantu baji na butuntulu bwa mubiji bwawama, banonshi ne baji mu masongola nabo bomvwa mukose ne kwikala kwa kubula bakwisamba nabo. Kubula kwisamba na bantu kwakonsha kwitulengela kukolwa.

• Ba dokotala batala pa bya kutumbula bantu abo ba Vivek Murt baambile’mba: “Bantu babula bakwisamba nabo kechi bomvwatu mukose ne, pakuba bakonsha kukolwa byonkatu byakonsha kukolwa muntu upepa tushiki twa fwanka 15 pa juba pa juba.”

Byaamba Baibolo

Mulenga wetu kechi ukeba’mba twikalenga kwa kubula bakwisamba nabo ne. Kufumatu ne kala, Lesa ukeba’mba bantu bekalenga na balunda bawama bakwisamba nabo.

• Jifunde ja mu Baibolo: “Lesa waambile’mba: ‘Kechi kyawama muntu kutwajijila kwikala bunke ne.’”—Ntendekelo 2:18.

Lesa ukeba’mba twikale balunda nanji. Walaya’mba ukafwenya kwi neatweba umvwe twibikako kufwenya kwipi ne aye.—Yakoba 4:8.

• Jifunde ja mu Baibolo: “Bo ba lusekelo aba baji na muchima wa kukeba kuyuka Lesa, mambo Bufumu bwa mwiulu bo bwabo.”—Mateo 5:3.

Lesa ukeba’mba tumupopwelanga pamo na bakwetu. Umvwe twauba bino twikala na lusekelo.

• Jifunde ja mu Baibolo: “Twayai twitenga muchima atwe bene na bene kuba’mba twitundaikenga kwitemwa atwe bene na bene ne kuba mingilo yawama, kabiji kange tuleke kupwila pamo . . ne, bino twitundaikenga atwe bene na bene.”—Bahebelu 10:24, 25.

Inge mukeba kufunjilapo byavula pa ene mambo o kyanemena kuchinuzhuka kwikala bunke, tangai kibaaba kya mu Kizungu kya kuba’mba “Loneliness in a World of Mass Connection.”