Bubi Bubena Kuvujilakotu Mwaya Ntanda—Baibolo Waambapo’mba Ka?

Bambanzhi babena konauna bintu mu kyalo kya Haiti. Bumbanzhi bubena kulengela bantu mu kyalo kya South Africa, Mexico ne bekala mu byalo bya mu Latin America kuyanda bingi. Nangwatu mu mapunzha mwakepana bumbanzhi luno, bantu bakakilwa na mambo a bwivi, konauna ne kusoka bintu kubena kumvwanyika mu mapunzha akwabo.

Baibolo waambapo’mba ka pa bubi bubena kumweka mwaya ntanda?

Byaambijile jimo Baibolo pa bubi

Baibolo waambijile jimo kuba’mba bubi bukekala kiyukilo kya “mpelo ya buno bwikalo.” (Mateo 24:3) Yesu Kilishitu byo aambilenga pa biyukilo bya mpelo ya buno bwikalo, waambile’mba:

• “Na mambo a kuvujilako kwa bubi, butemwe bwa bavula bukakepa.”—Mateo 24:12.

Baibolo waambijile jimo ne kuba’mba “mu moba a kupelako” bantu bakekala “babula kwikanya, bashinta, babula kutemwa kyawama.” (2 Timoti 3:1-5) Abino byubilo byo bibena kulengela bubi kuvula lelo jino.

Nangwa byonkabyo, bintu kulutwe bikawama. Mambo Baibolo witubuula amba katatakatu bubi bukapwe.

• “Kwashalatu pacheche, babi kechi bakekalako ne; ukatajisha po baikalanga, kabiji kechi bakekalapo ne. Pakuba bakimote bakaswana ntanda, kabiji bakasangalelanga mu kuvula kwa mutende.”—Salamo 37:10, 11.

Funjilaipo bikwabo pa byaamba Baibolo pa bintu byawama bikekala kulutwe ne ene mambo o mwafwainwa kushiinwa kuba’mba bintu bibena kumweka luno, bibena kufikizha bungauzhi. Tangai bino bibaaba.

“A Real Hope for a Better Tomorrow”

“Kiyukilo kya “Moba a Kupelako,” Nangwa’mba “Bimye bya ku Mpelo” kyo ki ka?”

“Did the Bible Predict the Way People Think and Act Today?”