Nanchi Bakamonyi ba kwa Yehoba Bapimpula Baibolo Kuba’mba Aswañane na Bintu byo Baitabilamo Nyi?
Ine. Kechi twapimpula Baibolo ne. Byo twayukile’mba byo twaitabilamo kechi byaswañana na biji mu Baibolo ne, twibipimpwile’mba biswañane.
Saka tukyangye kwikala na Baibolo wa Binembelo bya Ntanda Ipya, twatangile bingi Baibolo. Twatanganga Mabaibolo akwabo ne kwitabila bintu bijimo. Monai bintu bimo byaitabilamo Bakamonyi ba kwa Yehoba, mwibyesakanye ne kumona inge byaswañana na Baibolo byo afunjisha.
Byo twaitabila: Kechi kuji Balesa basatu ne. Kyamba kya Usopa kyo batelanga kala amba Zion’s Watch Tower kya July kya mu 1882 kyaambile’mba: “Bantu batanga mabuku etu bayuka’mba twaitabila mwi Yehoba ne Yesu. Kabiji bayuka’mba twaitabila mu mupashi wazhila. Pano bino, tukana lufunjisho lwa kuba’mba Yehoba, Yesu ne mupashi ke balesa bemenako muntu umo, nangwa byatemwa kwamba bantu bamo amba Lesa umo wimenako bantu basatu.”
Baibolo waamba’mba: “Yehoba Lesa wetu ye Yehoba umotu.” (Mpitulukilo ya mu mizhilo 6:4) “Pakuba kwi atweba kuji Lesa umo yenka, Tata, ko bifuma byonse, kabiji mo twaikela ne atweba; ne Nkambo umo yenka, Yesu Kilishitu, mo mo byamwekejile byonse ne atweba pamo.” (1 Kolinda 8:6) Yesu waambile’mba: “Batata bo bankila.”—Yoano 14:28.
Byo twaitabila: Helo kechi mpunzha ya mujilo wa kumanyikilamo bantu ne. Kyamba kya Usopa kya Zion’s Watch Tower kya June kya mu 1882 kyajinga na mutwe wafumine pa Loma 6:23 wa kuba’mba: “Lufu yo Mfweto ya Bundengamambo.” Uno mutwe waambile’mba: “Bino byambo byaumvwanyika. Nangwa byonkabyo, bantu bavula baitabila’mba Baibolo Mambo a Lesa ne kuba’mba kumanama kwa myaka yo mfweto ya bundengamambo. Kabiji bamba’mba Baibolo byo byo aamba. Pano bino, kibalengela kuminapotu popolo pa bino kechi kyayukanyikwa ne.”
Baibolo waamba’mba: “Awa mweo ulenga mambo ye ukafwa.” (Ezikyo 18:4, 20, King James Version) Lumanamo lwa myaka kechi lo luzhachisho lwa bantu babula kwakamwa Lesa ne, ke “lonaiko lwa myaka.”—2 Tesalonika 1:9.
Byo twaitabila: Bufumu bwa Lesa ke kafulumende waikajikwa, kechi byubilotu bya mu muchima ne. Kyamba kya Usopa kya Zion’s Watch Tower kya December kya mu 1881 kyaambilepo pa Bufumu bwa Lesa amba: “Bufumu bwa Lesa bukafumyapo bufumu bonse bwa pano pa ntanda.”
Baibolo waamba’mba: “Mu moba a boba bamfumu aye Lesa wa mwiulu ukaleta bufumu bo bakabula konauna myaka ne myaka, nangwa pachechetu ne, kabiji abwa bufumu kechi bakebupana ku mutundu ungi ne. Kabiji bukalalaula buno bufumu bonse ne kwibupwishatu shata! Pakuba abo bukekala myaka ne myaka.”—Danyela 2:44.
Nanchi Bakamonyi ba kwa Yehoba banemeka Baibolo wa Binembelo bya Ntanda Ipya amba po paimena byo baitabilamo nyi?
Ine, twingijisha Mabaibolo avula mu busapwishi. Bino Baibolo wa Binembelo bya Ntanda Ipya tumupana ku bantu bo tufunda nabo Baibolo, kechi twibapotesha ne. Kabiji tufunda na bantu kwingijisha Mabaibolo akwabo o bakeba.