Mambo ka Bakamonyi ba kwa Yehoba o Babujila Kwivwanga mu bya Bumulwilantanda?
Bakamonyi ba kwa Yehoba kechi bevwanga mu bya bumulwilantanda ne, mambo balondela byo bafunda mu Baibolo. Kechi tuji na lulombo, nangwa kuvotela bipanyi bya bumulwilantanda nangwa bantu bo babikapo ne. Kabiji kechi tukeba kwikala pa kifulo kya bumulwilantanda nangwa kwivwanga mu milukuchi ya kupimpula makafulumende ne. Bishinka byalondelapo byo bitulengela kubula kuba bino:
Tulondela byaubile Yesu, wakaine kifulo kya bumulwilantanda. (Yoano 6:15) Wafunjishe baana banji ba bwanga ‘kubula kwikala ba pano pa ntanda,’ ne kwibalumbulwila kuba’mba kechi bafwainwa kwivwanga mu bya bumulwilantanda ne.—Yoano 17:14, 16; 18:36; Mako 12:13-17.
Twi ba kishinka ku Bufumu bwa Lesa, Yesu bo aambilepo’mba: “Ano mambo awama a Bufumu akasapwilwa pano pa ntanda ponse.” (Mateo 24:14) Byo tuji bemenako Bufumu bwa Lesa, ne kubuula bantu kwiya kwa buno Bufumu, kechi twivwanga mu bya bumulwilantanda bya mu byalo byonse ne, kubikapotu ne mu kyalo mo twikala.—2 Kolinda 5:20; Efisesa 6:20.
Byo tubula kwivwanga mu bya bumulwilantanda, tukasuluka kwamba na bantu batundaika bya bumulwilantanda pa mambo awama a Bufumu bwa Lesa. Tumwesha bino mu byambo ne mu byubilo amba twaketekela Bufumu bwa Lesa kupwisha makatazho aji pano pa ntanda.—Salamo 56:11.
Byo tubula kwivwanga mu bya bumulwilantanda, twakwatankana na balongo betu baji mu byalo bikwabo. (Kolose 3:14; 1 Petelo 2:17) Bino bupopweshi bwivwanga mu bya bumulwilantanda bwabanya bantu babo.—1 Kolinda 1:10.
Kunemeka makafulumende. Nangwa kya kuba kechi twivwanga mu bya bumulwilantanda ne, tunemeka makafulumende aji mu kyalo mo twikala. Byo byaamba ne mukambizho wa mu Baibolo amba: “Bantu bonse bakokelenga bakulumpe balama kyalo.” (Loma 13:1) Tulondela mizhilo, kupana misonko ne kukwatankena pamo na kafulumende kukwasha bangikazhi ba mu kyokyo kyalo. Kechi twivwanga mu kukeba kulwisha kafulumende ne, pano bino tulondela byaamba Baibolo kulombelako “bamfumu ne babinemanga,” kikatakata inge babena kufuukula bintu byalamata bwana bwa bene bwetu bwa kupwila.—1 Timoti 2:1, 2.
Kabiji tunemeka luusa lwa bakwetu lwa kwifuukwila mu bintu bya bumulwilantanda. Kyakumwenako, kechi tuvulañanya bantu inge kuji bunsaji ne, kabiji kechi tukanya boba bakeba kuvota ne.
Nanchi kubula kwivwanga kwetu mu bya bumulwilantanda kwatendeka lelo nyi? Ine. Batumwa ne bena Kilishitu batanshi nabo byobyo baubanga. Byonkatu byaamba buku wa Beyond Good Intentions kuba’mba: “Nangwa kya kuba bena Kilishitu batanshi bayukile’mba bafwanyijilwe kunemeka makafulumende, bino kechi bevwanganga mu bya bumulwilantanda ne.” Ne buku wa On the Road to Civilization naye waamba’mba bena Kilishitu batanshi “kechi baikalanga pa bifulo bya bumulwilantanda ne.”
Nanchi kubula kwivwanga kwetu mu bya bumulwilantanda kuvulañanya mutende mu kyalo nyi? Ine. Twi bangikazhi batemwa mutende, kabiji bakulumpe balama byalo kechi bafwainwa kwituchina ne. Akilangulukai pa sawakya wa mu 2001 wanembele kipamo kya National Academy of Sciences of Ukraine. Sawakya waambile’mba: “Lelo jino bamo bakonsha kushikwa Bakamonyi ba kwa Yehoba byo babula kwivwanga mu bya bumulwilantanda, kyo kyalengejile kwibapamo mambo ku makafulumende a Nazi ne a Komyunisiti. Nangwatu byo bebamanyikilenga ku kafulumende wa Soviet batwajijile kulondela mizhilo. Baingilanga mu bukishinka saka bepana mu majimi ne mu makampanyi mo balengela bintu, kabiji kechi bachinyanga kafulumende wa Komyunisiti ne.” Uno sawakya wapezhako na byambo bya kuba’mba “Bakamonyi ba kwa Yehoba kechi bavulañanya mutende ne lumvwañano mu kyalo ne.” Byobyo boba ne lelo jino.