Baibolo Wambapo’mba ka pa Kusoka Mibiji ya Bantu Bafwa?
Mukumbu wa mu Baibolo
Baibolo kechi waambapo mu kushinkamika pa kusoka mibiji ya bafu ne. Kabiji mu Baibolo kechi mujipo mukambizho waamba pa kuzhiika nangwa kusoka mibiji ya bantu bafwa ne.
Bino Baibolo waamba pa bakalume ba Lesa ba kishinka bazhiikile balongo babo bafwile. Baibolo waamba’mba Abalahama waingijile papelejile bulume bwanji kukeba mpunzha kwa kuzhiika mukazhanji, aye Sala.—Ntendekelo 23:2-20; 49:29-32.
Baibolo waamba ne pa bantu ba kishinka basokele mibiji ya bantu bafwile. Jishimikila jimo ke ja Mfumu Saulo wa bena ne baana banji basatu ba balume bo baipayile mu nkondo. Mibiji yabo yajinga mu ntanda ya balwanyi babo, kabiji kechi beilamine bulongo ne. Bashilikale bena Isalela ba kishinka byo baumvwine kino, bayile na kusenda mubiji wa kwa Saulo ne ya baana banji ne kwiisoka, kabiji bazhiikile bikupa byashajilepo. (1 Samwela 31:8-13) Baibolo umwesha’mba jishinda jo baubijilemo na ino mibiji kechi jatamine ne.—2 Samwela 2:4-6.
Milanguluko yabula kuyilamo pa mambo a kusoka mibiji ya bantu bafwa
Mulanguluko wabula kuyilamo: Kusoka mubiji wa muntu wafwa kechi kumwesha mushingi ne.
Kishinka: Baibolo wamba’mba aba bafwa babwela ku lukungu, kabiji kino kyo kimweka inge kitumbi kyabola. (Ntendekelo 3:19) Kusoka mubiji kulengelatu mubiji kubwela bukiji ku lukungu mambo walukatu ke buto nangwa’mba lukungu.
Mulanguluko wabula kuyilamo: Mu kimye kyanembejilwengamo Baibolo, bantu bo babujile kubila bibusa kwi Lesa bo basokanga inge bafwa.
Kishinka: Mibiji ya bantu bamo babujile bukishinka, nabiji Akana ne kisemi kyanji, beisokele. (Yoshua 7:25) Nangwa byonkabyo, uno kechi wajinga muzhilo ne. (Mpitulukilo ya mu Mizhilo 21:22, 23) Byonka byo twaambapo kala, mibiji ya bantu bamo bajinga ba kishinka nabiji mwana wa Mfumu Saulo aye Yonafwanyi, beisokele kimye kyo bafwile.
Mulanguluko wabula kuyilamo: Kusoka mubiji kukalengela Lesa kukankalwa kumusangula.
Kishinka: Nangwatu mubiji wa muntu bamuzhiika, bamusoka, wafwila pa kalunga ka mema nangwa bamuja ku banyama, Lesa ukamusangula, kafwako kyakatazha kwi aye ne. (Lumwekesho 20:13) Wa Bulume Bonse wakonsha kulenga jibiji mubiji wa muntu wafwa.—1 Kolinda 15:35, 38.