Mwanamulume walama bupe bo babika mu kibokoshi kyawama

Baibolo Wambapo’mba ka pa Bumpanyi?

Mukumbu wa mu Baibolo

Baibolo utundaika bantu kupana kwa kubula kwibakanjikizha kabiji na mulanguluko wawama. Umwesha kuba’mba kupana mu jino jishinda kulengela bonse kumwenamo byawama, mwine wapana ne watambula. (Byambo bya Maana 11:25; Luka 6:38) Yesu waambile’mba: “Mu kupana mufuma lusekelo lukatampe kukila mu kutambula.”—Byubilo 20:35.

Bumpanyi bwa mutundu ka busangajika muchima wa Lesa?

Kupana kusangajika muchima wa Lesa inge muntu wapana na muchima yense kechi kya kumukanjikizha ne. Baibolo waamba’mba: “Muntu yense obe monka mo afuukwila mu muchima wanji, kechi apane na bulanda nangwa na mambo a kumukanjikizha ne, mambo Lesa watemwa muntu upana na lusekelo.”—2 Kolinda 9:7.

Kupana na muchima yense ke lubaji lwa mpopwelo yaitabilwa kwi Lesa. (Yakoba1:27) Muntu ukwasha bakajilwa wingijila pamo ne Lesa, mambo Lesa umona buno bumpanyi amba bamukongwesha. (Byambo bya Maana 19:17) Baibolo ufunjisha’mba Lesa ukabwezhezha yewa upapo bakwabo bintu.—Luka 14:12-14.

Bumpanyi bwa mutundu ka bubula kutokesha Lesa ku muchima?

Inge muntu wapana na mulanguluko watama. Kino kyavwangamo kupana:

Kuba’mba bantu bakutote.—Mateo 6:2.
Kuba’mba umwenemo.—Luka 14:12-14.
Kuba’mba upote lupulukilo.—Salamo 49:6, 7.

Inge abo bupe bwa kutundaika mingilo ne byubilo bifichisha Lesa ku muchima. Kechi kyawama kupa muntu mali kuba’mba aye na kukaya makayo a kuchikapo nangwa kupotamo bizhima nangwa kukizhamo kutoma ne. (1 Kolinda 6:9, 10; 2 Kolinda 7:1) Kabiji kechi kyawama kupa muntu bintu uji na bulume bwa kwikwasha mwine bino kechi ukeba kuba byobyo ne.—2 Tesalonika 3:10.

Inge tupana bintu byavula ku bakwetu bino saka twabula kuta muchima kisemi kyetu. Baibolo ufunjisha’mba mitwe ya bisemi yafwainwa kukebela bisemi byabo bintu bikebewa mu bwikalo. (1 Timoti 5:8) Kechi kyayilamo mutwe wa kisemi kupana bintu byavula ku bakwabo bino kisemi kyanji saka kibena kuyanda ne. Kabiji Yesu wanenawine boba bakananga kukwasha bansemi babo bakoma na mambo kuba’mba bintu byonse byo bajinga nabyo byajinga “bupe bwa kupana kwi Lesa.”—Mako 7:9-13.

Byepelo bya mu Baibolo byaamba pa bumpanyi

Byambo bya Maana 11:25: “Muntu uji na muchima wa bumpanyi ukamona byawama, ne yense ukokolosha bakwabo naye bakamukokolosha.”

Byo kilumbulula: Mwine wapana ne watambula bonse bamwenamo byawama mu bumpanyi.

Byambo bya Maana 19:17: “Awa ubila byawama mulanda ukongwesha Yehoba, ne aye ukamufweta pa bintu byo oba.”

Byo kilumbulula: Lesa umona aba bakwasha bakajilwa amba bamukongwesha, kabiji walaya kwibafweta pa bumpanyi bwabo.

Mateo 6:2: “Pa kupana bya bupe kechi mwafwainwa kuvumya ntolompita byonka byuba bakamfutumfutu . . . amba bantu bebatote ne.”—Matthew 6:2.

Byo kilumbulula: Kechi twafwainwa kupananga kuba’mba bantu bamone’mba twibampanyi ne.

Byubilo 20:35: “Mu kupana mufuma lusekelo lukatampe kukila mu kutambula.”

Byo kilumbulula: Kupana na muchima yense kuleta lusekelo.

2 Kolinda 9:7: “Muntu yense obe monka mo afuukwila mu muchima wanji, kechi apane na bulanda nangwa na mambo a kumukanjikizha ne, mambo Lesa watemwa muntu upana na lusekelo.”

Byo kilumbulula: Bumpanyi bwa kwifuukwila kufuma panshi ya muchima butokesha Lesa ku muchima.