FWENYAI KWIPI NE LESA
“Mambo Lesa Watemwa Upana na Lusekelo”
Bupe bwa mutundu ka bwakonsha kwimulengela kusanta bingi? Kwambatu kine atweba bonse twafwainwa kumvwa bulongo kutambwila bupe kufuma ku muntu witupa na mambo a kwitutemwa kechi muntu witupa bupe na mambo a kuba’mba ye mwingilo ye engila ne. Pa kuba’mba tupane bya bupe, pafwainwa kwikala kintu kine kilengela. Kintu kyakilamo kunema ke kupana kwi Lesa. Twayai twisambe pa byambo byanembele Paulo na lutangijilo lwa mupashi biji pa 2 Kolinda 9:7.
Mambo ka Paulo o anembejile bino byambo? Watundaikilenga bena Kilishitu bajinga mu Kolinda kukwasha balongo babo bamulwitabilo bajinga mu lukatazho mu Yudea. Nanchi wakanjikizhenga bena Kolinda kupana bya bupe nyi? Ine, wanembele’mba “Bonse pa muntu pa muntu bobe monka mo bafuukwila mu michima yabo, kechi bapane na bulanda nangwa na mambo a kwibakanjikizha ne, mambo Lesa watemwa muntu upana na lusekelo.” Lekai twisambe pa bino byambo.
“Monka mo bafuukwila mu michima yabo.” Kwesakana na byaambile Paulo, mwina Kilishitu upana mambo byobyo afuukula mu ‘muchima wanji.’ Kabiji kintu kikwabo kilengela kupana ke kulangulukilako bakwabo bena Kilishitu baji na lukatazho. Shayuka umo waambile’mba mu mulaka mutanshi byambo bya kuba’mba “monka mo bafuukwila,” bilumbulula “kufuukwila jimo kintu.” Onkao mambo, mwina Kilishitu wafwainwa kwilangulukila aye mwine pa buyanji bubena kupitamo bakwabo ba mulwitabilo ne kwifuukwilapo aye mwine byo afwainwa kuba pa kukwasha babena kupita mu makatazho.—1 Yoa. 3:17.
“Kechi bapane na bulanda nangwa na mambo a kwibakanjikizha ne.” Paulo waambile pa mitundu ibiji ya bumpanyi ayo yafwainwa kuchinuzhuka bena Kilishitu ko kuba’mba kupana na kifwe kifwe ne kupana kwakubula kufuma panshi ya muchima. Mu Kingiliki byambo bya kuba’mba “kwibakanjikizha” bilumbulula “kupana na bulanda.” Muntu umo waambile kuba’mba kupana kya kwimukanjikizha “kulengela kupana na bulanda.” Muntu wapana kya kumukanjikizha upanatu mambo bamukanjikizha kuba byobyo. Ñanyi wakonsha kutemwa kutambula bupe bwa pana muntu mambo bamukanjikizha kuba byobyo?
“Mambo Lesa watemwa muntu upana na lusekelo.” Mwina Kilishitu inge wafuukulapo kupana, wafwainwa kuba bino na lusekelo byonka byaambile Paulo. Kwambatu kine, bumpanyi bwafwainwa kwitulengela kwikala balusekelo inge twayuka kine kintu kitulengela kuba byobyo. (Byu. 20:35) Bantu bobafwainwa kuyuka kuba’mba awe muntu wapana na lusekelo. Byambo bya kuba’mba “upana na lusekelo” byakonsha kwitulengela kuyuka bibena kwiumvwa muntu mukachi ne pangye. Umvwe muntu wapana na muchima walusekelo, kitulengela kumvwa bulongo pa bupe bo etupa awo muntu kabiji kino kilengela ne Lesa kumvwa bulongo.
Byambo byanembele Paulo na lutangijilo lwa mupashi ke byambo byanema bingi byakonsha kukwasha Bena Kilishitu. Nangwa kya kuba tubena kupana kimye kyetu, kwingijisha ngovu nangwa bintu byo tuji nabyo, twafwainwa kupana bino bintu na muchima wa kwifuukwilapo mambo inge ke tube bino, tukekala balusekelo mu kwikala bampanyi kikatakata inge ketukwashe boba baji mu malwa. Bumpanyi bwa uno mutundu kechi bukalengelatu atweba kusekela ne, bino bukalengela ne Lesa kumvwa bulongo mambo “watemwa muntu upana na lusekelo.”
Kutanga Baibolo mu September
[Mabulañano pa peja 13]
“Lesa watemwa bampanyi”