“Nebikako Papelela Bulume Bwami”

Ba Irma bekala ku Germany, kabiji kwashalatu pacheche kufikizha myaka ya kusemwa 90. Na mambo a kuba’mba batainwe mu mapuso jibiji kabiji bebatumbula bimye byavula, kechi bakonsha kusapwila ku nzubo ku nzubo byonka byo baubanga kala ne. Ba Irma luno babuulako bantu byo baitabilamo kupichila mu kutumina balongo babo ne bayukane makalata. Makalata anemba ba Irma a lutundaiko ne lutekenesho beatambwila bingi bulongo bantu kya kuba javula bebatumina mafoni ne kwibepuzha kimye kyo bakebatumina ikwabo. Onkao mambo, ba Irma bebatumina makalata avula a kwibasanchila ne kwibalomba kunemba makalata akwabo. Ba Irma baambile’mba: “Kino kindetela bingi lusekelo ne kundengela kutwajijila kubambakana mu mwingilo wa Lesa.”

Ba Irma batuma ne makalata mu bishimikwa mo balamina bakote. Bashimikizhe’mba: “Mwanamukazhi umo mukote wantumijile foni ne kwamba’mba nkalata yo natumine yamutekeneshe bingi kimye kyafwile bamwatawanji. Wabika ino nkalata mu Baibolo wanji kabiji javula wiitanga bufuku. Mwanamukazhi mukwabo wafwishishe balume katataka waambile pa nkalata yami amba yamukwashishe bingi kukila mafunjisho a ntangi wa chechi. Wajinga na mepuzho avula bingi o akebelenga mikumbu kabiji wangipwizhe inge wakonsheshe kwiya na kumfwakesha.”

Muntu ye beyukile nanji bingi wabula Kamonyi wavilukijile ku mpunzha ya kwalepa wibepwizhe kuba’mba bakamutuminepo nkalata naye. Ba Irma baambile’mba: “Uno mwanamukazhi walamine makalata ami onse. Byo afwile, mwananji wamukazhi wantumijile foni. Wambuujile’mba watangile makalata onse o natumijile bainanji kabiji wangipwizhe inge kya kuba nakonsheshe kumunembela naye nkalata muji Binembelo.”

Ba Irma beyowa bingi buno busapwishi. Baambile’mba: “Nsashijila Yehoba kuba’mba atwajijile kumpa bulume bwa kumwingijila. Nangwa kya kuba kechi nakonsha kuya ku nzubo ku nzubo ne, bino nebikako papelela bulume bwami kwingila mwingilo wa Lesa.”