Yelemiya

44 Yelemiya bamupele byambo bya kubuula Bayudea bonse baikelenga mu kyalo kya Ijipita,+ aba baikelenga mu Migidolo,+ mu Tapanesa,+ mu Nofu*+ ne mu kyalo kya Patalosa+ amba: 2 “Yehoba wa mabumba, Lesa wa Isalela waamba’mba, ‘Anweba mwamona bya malwa byonse byo naletele pa Yelusalema+ ne pa mizhi yonse ya mu Yuda, ne lelo jino ino mizhi yashalatu masala mwabula bantu.+ 3 Nauba bino na mambo a bintu byatama byo baubile ne kunzhingijisha na kupana bitapisho+ ne kwingijila balesa bangi bo mwabujile kuyuka, anweba nangwa bashakulu benu.+ 4 Kimye kyonse,* amiwa nemutumijilenga bakalume bami bonse bangauzhi na kwimubuula’mba: “Kilekai kuba bino bintu bya bunya byo nashikwa.”+ 5 Pano bino, abo kechi batelekele nangwa kumvwina byo nebambijile namba baleke kuba bintu byatama bya kupana bitapisho ku balesa bangi ne.+ 6 Onkao mambo, nebazhingijile ne kubuukila bukaji mizhi yonse ya mu Yuda ne mikwakwa ya mu Yelusalema, kabiji yaonaikile ne kushalatu masala byonka byo iji ne lelo.’+

7 “Pano Yehoba, Lesa wa mabumba, Lesa wa Isalela waamba’mba, ‘Mambo ka o mubena kwiletela bya malwa bikatampe anweba bene* kuba’mba banabalume, banabakazhi, baana ne balukeke bavile mu Yuda kwa kubula nangwa umo ushalapo ne? 8 Mambo ka o mwafwainwa kunzhingijisha na bintu byo muba na kutapisha bitapisho ku balesa bangi ba mu kyalo kya Ijipita mo mwaya na kwikala? Mukavila kabiji mukekala kintu kikankamika bantu kabiji bakemubanga mwenga mu bisaka bya bantu byonse bya pano pa ntanda.+ 9 Nanchi mwavulama byubilo byatama bya bashakulu benu, bya bamfumu ba mu Yuda+ ne byubilo byatama bya bakazhi babo,+ kuvwangakotu ne byubilo byenu byatama ne byubilo byatama bya bakazhi benu+ byo mwaubile mu kyalo kya Yuda ne mu mikwakwa ya mu Yelusalema nyi? 10 Ne lelo jino kechi balapila,* kungakamwa nangwa kulondela mizhilo yami ne malamuna ami o nebapele, abo ne bashakulu babo ne.’+

11 “Onkao mambo, Yehoba wa mabumba, Lesa wa Isalela waamba’mba, ‘Amiwa nafuukulapo kwimuletela bya malwa, kwipaya bena Yuda bonse. 12 Kabiji nkasenda bena Yuda bakashalapo bakebeshenga kuya na kwikala mu kyalo kya Ijipita, kabiji bonse bakafwila mu kyalo kya Ijipita.+ Bakafwa ku mpoko ne ku kipowe kya nzala; kutatwila ku bayanji kufika ne ku babinemanga, bakafwa ku mpoko ne ku kipowe kya nzala. Kabiji bakebafinga ne kukankamika bantu kabiji bakebobanga mwenga ku bantu.+ 13 Nkakambula boba bekala mu kyalo kya Ijipita byonkatu byo nakambwile Yelusalema na mpoko, na kipowe kya nzala ne na mwalo.*+ 14 Kabiji bena Yuda bashalapo bekala mu kyalo kya Ijipita kechi bakafumamo nangwa kupuluka ne kubwela mu kyalo kya Yuda ne. Bakakebesha* kubwela na kwikalamo, bino kechi bakabwela ne, kukabwelatu bantu bacheche bakapuluka.’”

15 Banabalume bonse bayukile’mba bakazhi babo bapainenga bitapisho ku balesa bangi, ne bakazhi babo bonse baimenenga konka, bajinga jibumba jikatampe pamo na bantu bonse baikalanga mu kyalo kya Ijipita,+ mu Patalosa,+ baambijile Yelemiya amba: 16 “Kechi tusakumvwa byambo byo witubuula mu jizhina ja Yehoba ne. 17 Pakuba atweba tusakuba monka mwayila byo twaamba, tusakupananga bitapisho kwi Inamfumu wa Mwiulu* ne kumwitulwila milambo ya binyu,+ byonkatu byo twaubilenga atweba, bashakulu betu, bamfumu betu ne babinemanga betu mu mizhi ya mu Yuda ne mu mikwakwa ya mu Yelusalema, kimye kyo twajanga kajo ne kwikala bulongo kwa kubula kumona bya malwa nangwa bimo ne. 18 Kufuma kimye kyo twalekele kupana bitapisho kwi Inamfumu wa Mwiulu* ne kumwitulwila milambo ya binyu, twakajilwa bintu byonse, kabiji twafwa ku mpoko ne ku kipowe kya nzala.”

19 Banabakazhi banungilepo amba: “Byo twapananga bitapisho kwi Inamfumu wa Mwiulu* ne kumwitulwila milambo ya binyu, nanchi balume betu kechi bo betuswishishenga kupana bitapisho bya shinkwa ye balengele mu kipashañano kyanji ne kumwitulwila milambo ya binyu nenyi?”

20 Ponkapo Yelemiya waambijile bantu bonse, banabalume ne bakazhi babo ne bantu bonse bo esambilenga nabo amba: 21 “Bitapisho byo mwatapishenga mu mizhi ya mu Yuda ne mu mikwakwa ya mu Yelusalema+ anweba ne bashakulu benu, bamfumu benu, babinemanga benu ne bantu ba mu kyalo, Yehoba wibivulukile kabiji wibilangulukilengapo! 22 Yehoba kechi watajilengapotu pa byubilo byenu byatama ne bintu bya bunya byo mwaubilenga ne, kabiji kyalo kyenu kyashajiletu masala ne kwikala kintu kikankamika bantu, kyafingwa kabiji mwabula bantu byonkatu byo kiji ne lelo jino.+ 23 Bino bya malwa bimufikila mambo mwapainenga bino bitapisho ne na mambo a kuba mwamulengele mambo Yehoba pa kubula kukookela byaambilenga Yehoba ne kubula kulondela mizhilo yanji, malamuna anji ne bya kwibavululako byanji, byonkatu byo kiji ne lelo jino.”+

24 Kabiji Yelemiya waambijile bantu bonse ne banabakazhi bonse amba: “Anweba bena Yuda bonse muji mu kyalo kya Ijipita, umvwai byaamba Yehoba. 25 Yehoba wa mabumba, Lesa wa Isalela waamba’mba, ‘Bintu byo mwiambijile anwe bene ne bakazhi benu mwibyuba monkatu mo mwaambijile’mba: “Atweba kine tukobila monka mo twaambijile ne kupana bitapisho kwi Inamfumu wa Mwiulu* ne kumwitulwila milambo ya binyu.”+ Anweba banabakazhi mukalondela bintu byo mwachipile ne kwibyuba.’

26 “Onkao mambo, umvwai byaamba Yehoba anweba bena Yuda bonse mubena kwikala mu kyalo kya Ijipita: ‘Yehoba waamba’mba: “Amiwa nachipa mu jizhina jami jazhila namba, kafwako muntu nangwa umo wa mu bena Yuda+ wikala mu kyalo kya Ijipita kyonse ukachipa mu jizhina jami ne kwamba’mba, ‘Byonkatu Nkambo Mfumu Yehoba byo aji na bumi!’ ne.+ 27 Amiwa mbena kwibamona namba nkebaletele bya malwa, kechi bintu byawama ne;+ bena Yuda bonse baji mu kyalo kya Ijipita bakafwa ku mpoko ne ku kipowe kya nzala kufikatu ne bonse byo bakavila.+ 28 Bantu bachechetu bo bakapuluka ku mpoko ne kubwela ku kyalo kya Yuda+ kufuma ku kyalo kya Ijipita. Kabiji bena Yuda bonse bashalapo bayile na kwikala ku kyalo kya Ijipita, bakayuka waambile byambo bya kine, kana amiwa nangwa abo.”’”

29 “Yehoba waamba’mba, ‘Kino ke kiyukilo kwi anweba kya kuba’mba nkemukambula mu ino mpunzha, pa kuba’mba muyuke’mba byambo byami byo naambile bya kwimuletela bya malwa bikafika. 30 Yehoba waamba’mba: “Amiwa mbena kupana Felo Hofela mfumu wa Ijipita mu kuboko kwa balwanyi banji ne kwa boba bakeba konauna bumi* bwanji, byonkatu byo napaine Zedekiya mfumu wa Yuda mu kuboko kwa Nebukaneza Mfumu wa Babilona mulwanyi wanji yenka wakebelenga konauna bumi bwanji.”’”*+