Mu Ijipita, kisemi kya kwa Yakoba batendekele kwikitela’mba bena Isalela. Byo papichile myaka yavula, Yakoba ne Yosefwa bafwile. Kabiji Felo ungi watendekele kulama kyalo kya Ijipita. Uno Felo wamwene’mba bena Isalela batendeka kuvula ne kwikala na ngovu kukila bena Ijipita. Onkao mambo, Felo walengejile bena Isalela kwikala bazha. Wibakanjikizhenga kufyatula matafwali ne kwingila mingilo yakosa mu majimi. Nangwa kya kuba bena Ijipita bamanyikilenga bena Isalela, bino bena Isalela bavujijilengakotu. Felo kechi watemenwe ne. Onkao mambo, wakambizhe’mba bena Isalela inge basema mwana wamulume, awo mwana bafwainwa kumwipaya. Kino kyalengejile bena Isalela kumvwa bingi moyo.

Kwajinga mwanamukazhi umo mwina Isalela. Jizhina janji wajinga Yokebeda. Yokebeda wasemene mwana wamulume walamba bingi. Kechi wakebelenga’mba mwananji bamwipaye ne. Wamubikile mu ntumbe ne kumufya mu matete a mu Mukola wa Nile. Kolojanji uno mwana wajinga Milyama, kabiji waimene ku mukola na kumona bisakumwekela uno mwana.

Mwana wa mukazhi wa kwa Felo byo aishile ku mukola na kowa, wamwene ino ntumbe. Byo amwene mwana mu ntumbe, waumvwine bingi lusa. Kepo Milyama amwipwizhe’mba: ‘Ngye na kwita mwana mukazhi wakonsha kwamisha uno mwana nyi?’ Mwana wa kwa Felo waambile’mba: ‘Ee, yanga.’ Ponkapo, Milyama wakechile bainanji, ba Yokebeda. Mwana wa kwa Felo wibambijile’mba: ‘Sendai uno mwana mumwamishenga. Nsakwimupanga mali.’

Uno mwana byo akomeneko, Yokebeda wamutwajile ku mwana wa mukazhi wa kwa Felo. Wamutumbile jizhina amba Mosesa ne kumukomeshatu nobe mwananji. Mosesa wakomenenga nobe mwana mfumu kabiji kechi wakajilwanga kintu nangwa kimo ne. Bino Mosesa kechi walubileko Yehoba ne. Wayukile’mba wajinga mwina Isalela, kechi mwina Ijipita ne. Kabiji wasajilepo kupopwela Yehoba.

Byo afikizhe myaka 40, Mosesa wafuukwilepo kukwasha balongo banji. Kimye kyo amwene mwina Ijipita ubena kupuma mwina Isalela muzha, Mosesa wapumine uno mwina Ijipita kya kuba wafwile ne kufwa. Mosesa wamutolele ne kumuzhika mu busenga. Felo pa kumvwa byamwekele, wakebelenga kwipaya Mosesa. Bino Mosesa wanyemene ne kuya ku kyalo kya Mijanyi. Akwa, Yehoba wamulaminenga.

Mosesa waikele mu kyalo kya Mijanyi myaka 40. Wasongwele ne kwikala na baana. Juba jimo saka abena kujisha mikooko kwipi na Mutumba wa Sinai, wamwene kintu kyamulengejile kukumya bingi. Kino kyajinga kipupu kyatemenenga mujilo. Mosesa byo afwenyenye pepi kuba’mba amone kyamwekelenga, waumvwine jiwi mukachi ka kipupu jaambile’mba: ‘Mosesa! Kange ufwenye kwipi ne. Vula makwabilo obe mambo pano po waimana pazhila.’ Uno waambilenga wajinga malaika ye batumine kwi Yehoba.

Mosesa wachiine, wivweta ne ku meso. Jino jiwi jaambile’mba: ‘Namona bena Isalela byo babena kuyanda. Nkebapokolola ku bena Ijipita ne kwibatwala mu kyalo kyawama. Obewa yobe ukebatangijila kufuma mu Ijipita.’ Kino kyalengejile Mosesa kukumya bingi, ke ibyo nenyi?

Mosesa waipwizhe’mba: ‘Nkamba’mba ka bantu inge bangipuzha’mba, ñanyi wakutuma?’ Lesa wakumbwile’mba: ‘Ukebabuule’mba Yehoba, Lesa wa kwa Abalahama, Lesa wa kwa Izaka kabiji Lesa wa kwa Yakoba ye wantuma.’ Kepo Mosesa aambile’mba: ‘Nkoba byepi inge bantu babula kumvwa byo nkebabuula?’ Yehoba waubile bintu byalengejile Mosesa kuyuka’mba ukamukwasha. Waambijile Mosesa kutaya kamama kanji panshi. Byo ekataile panshi, kaalukile ke muloolo! Mosesa byo akwachile ku kiminzo, muloolo waalukile ke kamama. Kabiji Yehoba wamwambijile’mba: ‘Inge ukobe kino kiyukilo, bakayuka’mba yami nakutuma.’

Mosesa waambile’mba: ‘Amiwa kechi nayuka kwamba bulongo ne.’ Yehoba wamulayile’mba: ‘Nkakubuula bya kwamba, kabiji nkakutuma na kolojobe aye Alona kuba’mba akakukwashenga.’ Byo ayukile’mba Yehoba uji nanji, Mosesa wasendele mukazhanji ne baana banji ne kuya ku Ijipita.

Bena Isalela bebayanjishenga ne kwibengijisha nobe bazha. Yehoba watumine Mosesa ne Alona kuya na kwambila Felo amba: ‘Leka bantu bami bayenga, bakampopwele mu kiselebwa.’ Bino Felo waambile na bwitote amba: ‘Kechi nakonsha kuba byaamba Yehoba ne, kabiji kechi nsakuswisha bena Isalela kuba’mba baye ne.’ Na mambo a kino, Felo watendekele kwibapa mingilo yakosa bingi. Onkao mambo, Yehoba wafuukwilepo kuba’mba akambule Felo. Wayuka byo aubile nyi? Waletele Binkunka Jikumi pa bena Ijipita. Yehoba waambijile Mosesa amba: ‘Felo kechi ubena kukeba kuñumvwina ne. Kesha lukelo ukekala ku mukola wa Nile. Ukaye kwi aye ne kumubuula’mba, na mambo a kuba wakana kuswisha bantu bami kuya, mema onse mu mukola wa Nile asakwaluka ke mashi.’ Mosesa wakookejile byo bamwambijile ne kuya kwi Felo. Alona byo apumine kamama pa mukola wa Nile, Felo wamwenengako. Kabiji mema mu mukola aalukile ke mashi. Mema atendekele kununka, masabi afwile, bantu kechi bakonsheshe kutoma mema mu mukola wa Nile ne. Bino Felo kechi waswishishe bena Isalela kuya ne.

Byo papichile moba atanu na abiji, Yehoba watumine Mosesa jibiji kwi Felo ne kumubuula kuya na kwamba’mba: ‘Inge ubule kuswisha bantu bami kuya, mu kyalo kya Ijipita musakuyulatu babombwe.’ Alona watanyikile kamama, kabiji babombwe batendekele kwiya mu kyalo. Bantu batendekele kutaana babombwe mu mazubo abo, pa myanya, ne mu masanyi a kujiilapo. Babombwe bayujiletu kyalo kyonse! Felo waambijile Mosesa amba, lomba kwi Yehoba kuba’mba alekeshe kinkunka kya mabombwe. Felo waambile’mba usakuswisha bena Isalela kuya. Onkao mambo, Yehoba walekeshe kino kinkunka, kabiji bena Ijipita batendekele kulumbika babombwe bafwile. Kyalo kyonse kyatendekele kununka. Nangwa byonkabyo, Felo wakaine kuswisha bena Isalela kuya.

Kepo Yehoba ambijile Mosesa amba: ‘Alona apume kamama panshi, ne lukungu lusakwaluka ke mbwibwi.’ Ponkapotu, mu kyalo kyonse mwajinga mbwibwi. Bantu bamo ba kwa Felo bamwambijile’mba: ‘Bino binkunka bibena kufuma kwi Lesa.’ Pano bino, Felo kechi waswishishe bena Isalela kuya ne.

Mosesa ne Alona bayile kwi Felo na kumubuula byaambile Lesa amba: ‘Inge ukane kuleka bantu bami amba bayenga, nsakutuma balunzhi basumana mu kyalo kyonse.’ Balunzhi bavula batwelele mu mazubo onse a bena Ijipita, bayanji ne banonshi. Kyalo kyonse kyayujiletu balunzhi basumana. Bino mu mpunzha ya Goshenyi mwaikalanga bena Isalela kechi mwajinga bano balunzhi ne. Binkunka kutendeka na kya buna, byaishilengatu pa bena Ijipita kwapwa. Felo wapopwejile’mba: ‘Lombai kwi Yehoba afumyepo bano balunzhi. Nsakuleka bantu benu bayenga.’ Bino Yehoba byo afumishemo balunzhi bonse, Felo wakaine kuswisha bena Isalela kuya. Nanchi Felo wafunjijileko ku byonse byamwekelenga nyi?

Yehoba waambile’mba: ‘Inge Felo akane kuswisha bantu bami amba bayenga, banyama bonse ba bena Ijipita basakukolwa ne kufwa.’ Juba jalondejilepo, banyama batendekele kufwa. Bino banyama ba bena Isalela kechi bafwilenga ne. Nangwa byonkabyo, Felo wakaine kuleka bena Isalela amba bayenga.

Kepo Yehoba abuujile Mosesa kuya jikwabo kwi Felo ne kukusa buto mu mwela. Buno buto bwaalukile ke lukungu lwavula kabiji lwatendekele kuponena bena Ijipita bonse. Luno lukungu lwalengejile bena Ijipita bonse ne banyama babo kwikala na bilonda. Pano bino, Felo wakaine kuleka bena Isalela amba bayenga.

Yehoba watumine Mosesa jibiji kwi Felo na kumwambila’mba: ‘Ne luno ubena kukana kulekako bantu bami nyi? Kesha nkanokesha mvula mukatampe wa mabwe mu kyalo kyonse.’ Juba jalondejilepo, Yehoba wanokeshe mvula wa mabwe ne mujilo, kabiji mvula wabesheshenga bingi. Mu Ijipita kechi mwakinokelepo mvula mukatampe nobe uno ne. Bichi ne bijimwa byonse byaonaikile, bino byajinga mu Goshenyi kechi byaonaikile ne. Felo waambile’mba: ‘Lombai kwi Yehoba alekeshe ino mvula. Ne amiwa nsakwimuleka muyenga.’ Bino mvula byo yapwile, Felo wakaine kwibaleka amba bayenga.

Kepo Mosesa aambile‘mba: ‘Nzhiye yavula isakuja bijimwa byonse byabujile konaika na mvula mukatampe wafuma na kunoka.’ Ne kya kine, ino nzhiye yajiile bijimwa byonse byashajile mu majimi ne bipangwa byonse ku bichi. Ne jikwabo, Felo waambile’mba: ‘Lombai kwi Yehoba afumye nzhiye mu kyalo.’ Pano nangwatu Yehoba byo apangile ino nzhiye, Felo wakaine kuswisha bena Isalela kuya.

Yehoba waambijile Mosesa amba: ‘Tanyika kuboko kobe mwiulu.’ Ponkapotu, jiulu jonse jafichile. Pa moba asatu, bena Ijipita kafwako kyo bamwenenga ne na mambo a mfishi. Bino mu mazubo a bena Isalela mwajinga kyeya.

Felo waambijile Mosesa amba: ‘Yainga, anweba ne bantu benu bonse. Pano banyama benu bashale.’ Mosesa waambile’mba: ‘Twafwainwa kusenda banyama betu mambo bobo tukapana ke milambo kwi Lesa wetu.’ Bino Felo wazhingijile bingi. Waambile na bukaji amba: ‘Fuma papo! Inge nkakumone jibiji, nkakwipaya.’

Mosesa waambijile Felo amba kechi ukamumonapo jibiji ne. Kabiji saka akyangye kuya, waambijile Felo amba: ‘Lelo pakachi ka bufuku, babeji bonse ba mu Ijipita basakufwa, kutendekelatu ku mwana wa kwa Felo kufika ne ku baana ba bazha banji.’

Yehoba wabuujile bena Isalela amba bekale na kijiilo. Waambile’mba: ‘Mwipaye mukooko mulume nangwa mbuzhi mulume, baji na mwaka umo, ne kushinga mashi a bano banyama pa bibelo byenu. Nyama mwiisoke ne kwiijila pamo na bashinkwa babula mbizho. Muvwajile jimo bivwalo ne makwabilo, ne kwinengezha kuya. Lelo bufuku, nsakwimukasulula muyenga.’ Bena Isalela bafwainwa baumvwine bingi bulongo.

Pakachi ka bufuku, malaika wa Yehoba wapichile mu mazubo a mu Ijipita onse. Pa nzubo ponse pabujile mashi pa kibelo, mwana mubeji mu yoyo nzubo wafwile. Bino malaika inge wafika pa nzubo pajinga mashi pa kibelo, wapitayijilenga. Babeji bafwile mu bisemi bya bena Ijipita byonse. Bayanji ne banonshi bonse bafwile. Bino kafwako mubeji mu bena Isalela wafwile ne.

Ne mwana wa kwa Felo naye wafwile. Felo kyamupezhezhe maana. Ponkapotu, waambijile Mosesa ne Alona amba: ‘Imanai. Yainga bonse. Yainga mukapopwele Lesa wenu. Ne banyama benu bonse musende.’

Ñondo saka asama, bena Isalela baimene lwendo lwa kufuma mu Ijipita, saka benda kisemi pa kisemi, ne mukoka pa mukoka. Banabalume bena Isalela bajinga 600,000, kabiji kwajinga ne banabakazhi ne baana bavula. Ne bantu bakwabo babujile bena Isalela nabo balondejile mambo bakebelenga kupopwela Yehoba. Bena Isalela bafumine mu buzha.

Pa kuba’mba bavulukenga Yehoba byo ebapulwishe, baikalanga na kijiilo kikatampe pa mwaka pa mwaka. Kino kijiilo bekitela’mba Kijiilo kya Lupitailo.

Felo byo aumvwinetu amba bena Isalela baya, waumvwine bibi ku muchima. Waambijile bashilikale banji amba: ‘Nengezhai makalaki ami a nkondo onse. Twayai tupuupile bena Isalela! Kechi twafwainwe kwibaleka baya ne.’ Aye ne bashilikale banji batendekele kupuupila bena Isalela.

Yehoba watangijilenga bantu banji na jikumbi mute, ne na mujilo bufuku. Wibatangijile kufika ku Kalunga Kachila ne kwibambila’mba bakokolokeko.

Kepo bena Isalela bamwene Felo ne nzhita yanji saka beya ko bajinga. Bena Isalela bakankelwe kwa kunyemena, mambo kulutwe yabo kwajinga kalunga kakatampe kabiji kunyuma kwaishilenga bashilikale ba bena Ijipita. Batendekele kumujijila Mosesa amba: ‘Lelo tusakufwa! Nanchi inge witulekeletu mu Ijipita mo twajinga.’ Bino Mosesa waambile’mba: ‘Kuchina ne. Pembelelai mumone Yehoba byo asakwitupulusha.’ Mosesa waketekejile bingi mwi Yehoba.

Yehoba waambijile bena Isalela amba batendekeko kuya. Abwa bufuku, Yehoba walengejile jikumbi kwimana pakachi ka bena Ijipita ne bena Isalela. Ku bena Ijipita kwajingatu mfishi. Bino ku bena Isalela kwajinga kyeya.

Yehoba waambijile Mosesa kutanyika kuboko kwanji pa Kalunga Kachila. Kepo Yehoba aletele mwela mukatampe wapupilenga pa kalunga bufuku bonse. Mema pa kalunga aabene pakachi ne kusha jishinda mwa kupichila. Onkao mambo, bena Isalela bapichile pakachi pa mushiji wauma, mema saka aimana ku kipiko ne ku kilujo.

Nzhita ya kwa Felo yatendekele kupuupila bena Isalela pa kalunga ka mema pa mushiji wauma. Kepo Yehoba alengejile nzhita ya kwa Felo kukankalwa kwenda bulongo. Mawilo a ku makalaki abo atendekele kusopaukako. Bashilikale batendekele kubijika’mba: ‘Twayai tubwelemo! Yehoba ubena kwibalwilako.’

Yehoba waambijile Mosesa amba: ‘Tanyika kuboko kobe pa kalunga.’ Ponkapotu, mema abwelele byonka byo ajinga kala ne kulobesha nzhita ya bena Ijipita. Felo ne nzhita yanji bafwile. Kafwako nangwa umo wapulukile ne.

Bino ku bushiya bwa kalunga, bena Isalela baimbile lwimbo wa kutota Lesa, amba: “Mwimbilai Yehoba, mambo aye watumbalala bingi. Mbili ne wendapo bebataya mu kalunga ka mema.” Bantu byo baimbilenga, banabakazhi bazhilenga ne kwimba minsakayi. Bonse basangalele bingi, mambo bafumine mu buzha.

Bena Isalela bafikile ku Mutumba wa Sinai saka papita bañondo babiji kufuma po bafumijile mu kyalo kya Ijipita. Ku uno mutumba koko bapopejile matente abo. Mosesa byo ajinga ku Mutumba Yehoba wamwambijile’mba: ‘Napokolwele bena Isalela. Inge bankookelenga ne kulama mizhilo yami, bakekala bantu bami bo nasala.’ Kepo Mosesa akunkulukile kufuma ku mutumba ne kubuula bena Isalela bintu byonse byamubuujile Yehoba. Bena Isalela baubile byepi? Bakumbwile’mba: ‘Byonse byaamba Yehoba twaswa kwibyuba.’

Mosesa wabwelele jibiji ku mutumba. Yehoba wamwambijile jikwabo amba: ‘Pa juba ja busatu nkeya na kwisamba ne obewa. Ukambizhe bantu amba kechi bafwainwa kwiya kwipi na Mutumba wa Sinai ne.’ Kepo Mosesa akunkulukile ne kubula bena Isalela amba benengezhe ne kupembela kumvwa bikamba Yehoba.

Juba ja busatu byo jafikile, bena Isalela bamwene kubesha kwa mvula ne jikumbi jafinda pa mutumba. Kabiji baumvwine ne kutatauka kwa mvula ne kuvuma kukatampe kwa lusengo. Kepo Yehoba aishile pa mutumba mu mujilo. Bena Isalela baumvwine bingi moyo, bezakamijilengatu. Mutumba wajikiminenga bingi ne kufutumuka bwishi. Kabiji kuvuma kwa lusengo kwakijilemo ne kukilamo. Kepo Lesa aambile’mba: ‘Amiwa yami Yehoba. Kechi mwafwainwa kupopwela balesa bakwabo ne.’

Mosesa wakanjijile pa mutumba. Yehoba wamupele Mosesa mizhilo yafwainwe kulondelanga bantu mu bwikalo bwabo ne pa kumupopwela. Mosesa wanembele ino mizhilo ne kwiitanga ku bena Isalela. Kepo bonse bena Isalela bakumbwile’mba: ‘Byambo byonse byaamba Yehoba twaswa kwibyuba.’ Balayile Lesa kuba’mba bakamwingijilangatu aye yenka kwapwa. Nanchi baubile byo balayile nyi?

Yehoba waambijile Mosesa amba: ‘Kanjila pa mutumba. Nsakukupa mabwe apapakana po nsakunemba mizhilo yami.’ Mosesa wakanjijile pa mutumba ne kwikala konka moba 40 mute ne bufuku. Mosesa byo akijinga pa mutumba, Yehoba wanembele Mizhilo Jikumi pa mabwe abiji apapakana ne kumupa.

Mosesa byo abanjile pa mutumba, bena Isalela batendekele kulanguluka’mba wibanyema. Baambijile Alona amba: ‘Tubena kukeba wa kwitutangijila. Tulengele lesa!’ Alona wibambijile’mba: ‘Letai ngolode yenu.’ Wasungulwile ino ngolode ne kulenga kipashañano kya mwana ñombe. Bantu baambile’mba: ‘Uno mwana ñombe ye Lesa wetu witufumishe mu Ijipita!’ Batendekele kupopwela uno mwana ñombe ne kwikala na kijiilo. Nanchi byo baubilenga byatamine nyi? Ee, mambo bano bantu balayile Yehoba amba ye yenkatu ye bakapopwelanga. Pano kechi balamine mulaye wabo ne.

Yehoba wamwene byonse byo baubilenga. Waambijile Mosesa amba: ‘Yanga ukamone bibena kuba bantu. Baleka kunkookela, kabiji babena kupopwela lesa wa bubela.’ Mosesa wakunkulukile kufuma ku mutumba saka asenda mabwe abiji apapakana.

Byo afikile kwipi na kampu, Mosesa waumvwine bantu babena kwimba. Kabiji wamwene bantu babena kuzha ne kufukamina kipashañano kya mwana ñombe. Mosesa wazhingijile bingi. Watayile ano mabwe panshi kabiji alalaikile onse. Ponkapotu, waonawine kino kipashañano. Kepo aipwizhe Alona amba: ‘Bantu bakonsha kukulengela byepi kuba kino kintu kya bunya?’ Alona waambile’mba: ‘Kange munzhingijile ne. Mwayukishatu bulongo bano bantu byo baji. Bakebelenga lesa. Onkao mambo natambwile ngolode wabo ne kumusungulula mu mujilo ne kulenga uno mwana ñombe.’ Kyaubile Alona kyatamine. Mosesa wabwelele ku mutumba na kusashijila Yehoba amba alekeleko bantu mambo.

Yehoba walekejileko mambo bantu bamukookejile. Nanchi wamona kyalengejile’mba Mosesa ekale ntangi wawama wa bena Isalela nyi?

Mosesa byo ajinga ku Mutumba wa Sinai, Yehoba wamubuujile’mba alenge tente wa lusambakeno, ye bakengijishanga bena Isalela pa kumupopwela. Uno tente bafwainwe kuvilukanga nanji konse ko bayilenga.

Yehoba waambile’mba: ‘Buula bantu amba bapane bya bupe bya kulengela tente wa lusambakeno.’ Bena Isalela bapaine ngolode, siliva, mukuba, mabwe a buneme ne bikwabotu bya buneme. Kabiji bapaine tonge, bisapi bya linenyi, myayi, ne bintutu bikwabo. Baletelenga bintu byavula bingi kya kuba Mosesa wibakainye’mba: ‘Byavula. Kange muletelepo ne bikwabo ne.’

Banabalume ne banabakazhi bayukile mingilo bakwashishe kulenga tente wa lusambakeno. Yehoba wibapele maana a kwingila uno mwingilo. Bamo bazhingilenga mizhinge, kupikula ne kusona. Bakwabo bachibilenga mabwe, kulenga bintu na ngolode ne kusonga bichi.

Bantu balengele tente wa lusambakeno byonkatu Yehoba byo ebabuujile. Balengele ne kisapi kyawama bingi kyaabenye tente pakachi. Kibamba kimo kyatelwanga’mba Mwazhila, ne kikwabo kyatelwanga’mba Mwazhijisha. Mu kibamba Mwazhijisha mo mwaikalanga jikwachi ja lulayañano. Jino jikwachi bejilengele na ngolode ne na kichi kya mwiba wa kaseele. Mu kibamba Mwazhila mwajinga kya kutulapo malampi kya ngolode, tebulu, ne kya kusokelapo bitapisho bya kufutumuna. Mu kipango kya tente wa lusambakeno mo mwajinga shomeka wa mukuba ne kya kusokelapo bitapisho kikatampe. Jikwachi ja lulayañano javululangamo bena Isalela mulaye wabo wa kukookela Yehoba. Nanchi lulayañano wiluyuka nyi? Lulayañano ke mulaye wanema bingi.

Yehoba wasajile Alona ne baana banji babalume kwikala bañanga bakwingila pa tente wa lusambakeno. Mwingilo wabo wajinga wa kulama bulongo tente wa lusambakeno ne kupana bitapisho kwi Yehoba. Ñanga mukatampe Alona ye yenkatu watwelanga Mwazhijisha. Watwelangamotu jimo pa mwaka na kupana milambo ya mambo anji, a ba mu kisemi kyanji, ne a bena Isalela bonse.

Bena Isalela bapwishishe kulenga tente wa lusambakeno byo papichile mwaka umo kufuma po bafumijile mu Ijipita. Pano baikele na mpunzha pa kupopwela Yehoba.

Lukumo lwa Yehoba lwakumbene mu tente wa lusambakeno, ne jikumbi jafinjile peulu ya tente. Umvwe jikumbi jaikala peulu ya tente wa lusambakeno, bena Isalela baikalanga pa mpunzha po baji. Bino inge jafumapo, bayukanga’mba ke kimye kya kuviluka. Bapopololanga tente wa lusambakeno ne kulondela mubena kuya jikumbi.

Bena Isalela byo bafumine ku Mutumba wa Sinai, bapichile mu kiselebwa kya Palana ne kukafika ku mpunzha yatelwanga’mba Kadeshi. Akuno Yehoba koko aambijile Mosesa amba: ‘Sala banabalume jikumi na babiji. Mu mukoka yense usalemo mwanamulume umo, kabiji wibatume kuya na kumona biji ntanda yo nkemupa.’ Mosesa wasajile banabalume jikumi na babiji ne kwibambila’mba: ‘Yainga ku kyalo kya Kenana na kumona inge kino kyalo kyawama kujimamo kajo. Mukamone bantu bekalamo inge baji na bulume nangwa ne, ne kumona inge bekala mu matente nangwa mu mizhi.’ Yoshua ne Kaleba nabo bajinga pa bano bamwendela ntanda jikumi na babiji bayile ku Kenana.

Byo papichile moba 40, bano bamwendela ntanda babwelele saka basenda mañanzañanza, mapomegulanchi ne makuyu. Bamwendela ntanda baambile’mba: ‘Kyalo ko twayile kyawama bingi, pano bino bantu bekalamo bakosa kabiji mizhi yabo iji na masakwa akatampe.’ Bino Kaleba waambile’mba: ‘Twakonsha kwibashinda. Twayai tuyeko lonka luno.’ Wayuka kyalengejile Kaleba kwamba bino nyi? Mambo aye ne Yoshua baketekejile mwi Yehoba. Pano bino, bamwendela ntanda bakwabo jikumi baambile’mba: ‘Ine. Bantu ba mu kyokya kyalo babiyangala. Atweba twamwekelengatu nobe batete kwi abo.’

Bena Isalela baumvwine bingi moyo pa kumvwa bino. Batendekele kwijizhañanya ne kwamba’mba: ‘Twayai tusale ntangi mukwabo wa kwitubwezha ku Ijipita. Mambo ka o tusakuyila ku bano bantu amba betwipaye?’ Yoshua ne Kaleba baambile’mba: ‘Kange mube moyo nangwa kusatukila Yehoba ne. Yehoba usakwituzhikijila.’ Bino bena Isalela kechi baumvwine ne. Bakebelenga ne kwipaya Yoshua ne Kaleba.

Pano Yehoba waubilepo byepi? Waambijile Mosesa amba: ‘Bena Isalela nebobila bintu byavula bingi, pano ne luno bakitwajijilatu na kunsatukila? Onkao mambo, nkebalengela kwikala mu kiselebwa myaka 40, kabiji momo bakafwila. Kanatu baana babo bo bakekala mu ntanda yo nebalayile, ne Yoshua ne Kaleba kwapwa.’

Bena Isalela byo bakijinga mu kiselebwa, Kola, Datanyi, Abilama ne banabalume 250 basatukijile Mosesa. Baambile’mba: ‘Twimukimwa! Mambo ka o wafwainwa kwikela ntangi wetu ne kolojobe Alona waikala ñanga mukatampe? Yehoba uji ne atweba bonse, kechi ne obewatu, ne Alona ne.’ Yehoba kechi watemenwe byo baambilenga ne. Wamwene kuba’mba babena kusatukila aye.

Mosesa waambijile Kola ne bamutundaikilenga’mba: ‘Kesha mukeye ku tente wa lusambakeno, mukasende bya kwapwilamo mujilo ne bya kufutumuna. Yehoba uketumwesha muntu ye asala.’

Pa juba jalondejilepo, Kola ne banabalume 250 bayile ku tente wa lusambakeno kwajinga Mosesa. Basokele bya kufutumuna saka babula bañanga. Yehoba wabuujile Mosesa ne Alona amba: ‘Fumaiko kwi Kola ne ku banabalume bo aji nabo.’

Kola wayile ku tente wa lusambakeno kwajinga Mosesa. Bino Datanyi ne Abilama ne bisemi byabo kechi bayileko ne. Yehoba waambijile bena Isalela amba bafumeko ku matente a kwa Kola, Datanyi ne Abilama. Bena Isalela bafumineko kwa kubula kutaya kimye. Datanyi, Abilama ne bisemi byabo baimene ku bibelo bya matente abo. Ponkapotu, mushiji walajikile ne kwibaminatu bonse. Kabiji mujilo wafumine mwiulu ne kusoka Kola ne banabalume 250 bo ajinga nabo ku tente wa lusambakeno.

Kepo Yehoba aambijile Mosesa amba: ‘Tambula tumama ku bakulumpe ba bisemi, pa kamama konse unembepo jizhina ja mwinako. Pa kamama ka kisemi kya bena Levi unembepo jizhina ja kwa Alona. Ubike tumama mu tente wa lusambakeno. Kamama ka muntu ye nsakusala kakooba buluba.’

Juba jalondejilepo, Mosesa waletele tuno tumama ku bakulumpe ba bisemi. Kamama ka kwa Alona kaubile buluba kabiji kwajinga ne bipangwa byapya bya amonde. Yehoba waubile bino kuba’mba ebashiine’mba Alona ye ye asajile kwikala ñanga mukatampe.