MUTWE WA PA NKUPIKO | MAMBO KA A KUTWAJIJILA KWIKALA NA BUMI?
2 Kuji Bintu Byakonsha Kwimukwasha
“Saka mutaya bijikila byenu pe [Lesa], mambo wimuta muchima.”—1 PETELO 5:7.
Mwakonsha kumona nobe kufwa kwawamapo kukila bumi kampe na mambo a kulanguluka’mba kafwako kyo mwakonsha kuba na makatazho o mubena kupitamo. Monai bintu byafwainwa kwimukwasha.
Lulombelo. Lulombelo kechi jishindatu ja kwitekeneshamo mu kimye kya makatazho ne, kabiji kechi twafwainwatu kulomba inge twapelelwa ne. Lulombelo ke jishinda ja kwisambilamo ne Yehoba Lesa, aye wimuta bingi muchima. Yehoba ukeba’mba anweba mumubulenga bintu biji ku muchima wenu. Baibolo witutundaika’mba: “Utwike Yehoba kisendwa kyobe, ne aye ukakukosesha.”—Salamo 55:22.
Lombai kwi Lesa lelo jonka. Pa kulomba ingijishai jizhina janji ja Yehoba, ne kwisamba nanji kufuma panshi ya muchima wenu. (Salamo 62:8) Yehoba ukeba’mba mumuyuke bulongo amba mulunda nenu. (Isaya 55:6; Yakoba 2:23) Lulombelo ke jishinda ja kwisambilamo na Lesa jo mwakonsha kwingijisha kimye kyonse ne pa mpunzha paji ponse.
Bantu betutemwa. Balongo benu, balunda nenu, ne bantu bakwabo banemeka bingi bumi bwenu. Apo kampe bemubilapo kala ne bintu bimwesha kuba’mba bemuta muchima. Pa bantu bemutemwa paji ne bo mwabula kuyuka. Kya kumwenako, bimye bimo Bakamonyi ba kwa Yehoba inge baya mu mwingilo wabo wa kusapwila, batana bantu basusubala, bamo pa bano bantu bamba kuba’mba bapopomenwe bingi kya kuba’mba bakebelenga ne kwiipaya. Mwingilo wa ku nzubo ku nzubo ulengela Bakamonyi ba kwa Yehoba kukwasha bantu balanguluka bino. Na mambo a kuba balondela byaubanga Yesu, Bakamonyi ba kwa Yehoba bata bingi muchima bantu bakwabo. Ne anweba bemuta bingi muchima.—Yoano 13:35.
Kuya ku Kipatela. Bimye byavula muntu inge ke alanguluke pa kwiipaya, kino kimwesha’mba wakonsha kwikala na kikola kya ku bongo nabiji kikola kilengela muntu kwinyengaika ne kupopomenwa. Byonka byo mubula kumvwa bumvu inge mwabela kikola kya pa mubiji, kechi mwafwainwa kumvwa bumvu inge mwatanwa na kikola kya ku bongo ne. Bashayuka bamo bamba’mba kupopomenwa kujitu nobe “kukolwa mutwe kukolwapo bantu bonse.” Ko kuba’mba muntu yense wakonsha kupopomenwa. Kabiji kino kikola kyakonsha kubukwa.a
VULUKAI KINO: Umvwe muji na kikola kya kupopomenwa, mwafwainwa kukeba bukwasho. Inge mwaswa bukwasho, luno lukatazho lwakonsha kupwa.
BYO MWAKONSHA KUBA LELO: Kebai Dokotala wayuka kubuka bikola bya kupopomenwa.
[Tubyambo twa mushi]
a Inge milanguluko ya kukeba kwiipaya yatwajijila, mwafwainwa kumonapo mashinda akonsha kwimukwasha, nabiji kuya ku kipatela. Ku bipatela kuji bantu bafunda bino bikola bakonsha kwimukwasha.
[Mabulañano pa peja 7]
Kipamo kimo kikwasha bantu bakeba kwiipaya, kitelwa’mba American Foundation for Suicide Prevention, kyaamba’mba “panyuma ya kupesa pesa, kyatanwa kuba’mba bantu bavula bekujika bakolwa bikola bya ku bongo pa kimye kyo bekujika. Bino, javula bano bantu kechi bayuka amba baji na bino bikola ne, nangwa inge bayuka, kechi bebikako amba bebabuke bino bikola ne.”