Maana Akwashañana

NANGWA kya kuba bunonshi bukwashañana mu bintu bimo, bino buleta ne makatazho, kikatakata mu bino bimye byakatazha. (2 Timoti 3:1-5) Mu byalo bimo, banonshi ne bakañenda bamweka nobe baji bingi na mali bebebila ku bangivi nangwa kwibabombola ku bantu babombola bantu bakenda mali pa kuba’mba bakasulule muntu ye babombola.

Sawakya umo waambile’mba mu kyalo kimo, “bumbanzhi, bwivi ne kisela kya kubombola bantu byaleta bulwanyi pakachi ka banonshi ne bayanji. Mu mazubo mwakujiila mumo mwikala bakasopa baji na mata. Ku mazubo a banonshi nako bazhokoloshako luvimba uji na tubyela twatwa, kabiji babikako ne malaichi akatampe, makamela ne bamalonda.” Ne mu byalo bikwabo byo byo kiji.

Pano bino, Baibolo waamba’mba “bayanji kechi bebazakamisha ne.” Mwakonsha kufunjilako ka ku bino byambo bya maana? Inge mwikala mu mpunzha mwavula bumbanzhi ne bukapondo, nangwa inge mwaya ku mpunzha ya uno mutundu, kechi mwafwainwa kwimwesha nobe muji na mali ne. Mwafwainwa kujimuka pa kusala bya kuvwala byo muvwala ne bintu byo mukasenda ku mapunzha kutaanwa bantu bavula. Byambo bya Maana 22:3 byaamba’mba: “Muntu wajimuka umona bileta malwa kabiji ufyama, pakuba muntu wabula maana uyatu kabiji umona bya malwa.”

Maana ataanwa mu Baibolo amwesha’mba Mulenga wetu witutemwa, kabiji ukeba’mba tuzhikijilwenga. Musapwishi 7:12 waamba’mba ano “maana akwashañana,” mambo “alengela muntu uji nao kwikala na bumi.”