BYAFWAINWA KWIKALA BENA KILISHITU

Kipungu kya Katataka kya mu Kupwila kwa Mukachi ka Mulungu

Kutendeka mu January 2018, mu mutanchi wa kupwila kwa mukachi ka mulungu mukekalanga po balumbulula byambo ne bipikichala kufuma mu Baibolo wa Binembelo bya Ntanda Ipya (nwtsty) wa kufundamo uji pa intaneti, nangwa kya kuba pa kino kimye uno Baibolo mufwaye mu mulaka wenu. Kwambatu kine, kino kipungu kikemukwashanga pa kunengezha kupwila. Kabiji kukemukwasha kufwenya kwipi na Shetu witutemwa bingi aye Yehoba!

KULUMBULULA BYAMBO

Mu kino kipungu, tukafundanga pa bisho, mapunzha ne ñambilo yo baingijisha mu byepelo byavula bya mu Baibolo.

Mateo 12:20

Muzhinge ufutumuka: Kala pa kutokesha mu nzubo baingijishanga kakoloboyi ko babikangamo manyi. Kamuzhinge kokakokanga manyi ne kuteema. Byambo bya Kingiliki bya kuba’mba “muzhinge ufutumuka” byakonsha kulumbulula muzhinge ubena kufutumukatu bwishi na mambo a kuba’mba manyi apwamo, ne lubebe wazhima nangwa ubena kuzhima pachepache. Bungauzhi buji pa Isaya 42:3 bwaambijile jimo pa lusa luji ne Yesu amba; kechi ukonauna luketekelo lwa bantu bepelula ne babena kumanama ne.

Mateo 26:13

Kyambo kya kuba’mba kine: Mu Kingiliki, a·menʹ, kyafuma ku kyambo kya Kihebelu kya ʼa·menʹ kilumbulula’mba “kikale byonkabyo” nangwa’mba “kishinka.” Javula Yesu waingijishanga kino kyambo pa kukwasha bantu kushiinwa’mba kintu kyo alaya nangwa bungauzhi bo aambapo kine bukafika. Yesu waingijishanga kyambo kya kuba’mba “kine” nangwa’mba amena mu jishinda japuseneko na bantu bonse kabiji kechi kitaanwapo mu mabuku akwabo ne. Inge wikibwezhapo jibiji (a·menʹ a·menʹ), byonkatu byo kiji mu Mambo Awama anembele Yoano, kyambo kyaambile Yesu bekituntulula’mba “kinetu.”—Yoa 1:51.

BIPIKICHALA

Mu kino kipungu muji bipikichala, mavidyo abena kupitatu kishinshi ne mavidyo muji bipikichala bya kulenga bibena kulumbulula bintu byapusana pusana byo banemba mu Baibolo.

Betefaji, Mutumba wa Maolivi ne Yelusalema

Uno vidyo mwipi ubena kumwesha jishinda japichila ku musela wa Yelusalema kufuma mu muzhi ye batela lelo jino amba et-Tur. Uno muzhi waesakana na ye baambapo mu Baibolo amba Betefaji waikela kwipi na Mutumba wa Maolivi. Muzhi wa Betani waikela ku musela wa Betefaji ku kinkunenke kya Mutumba wa Maolivi ku musela. Yesu ne baana banji ba bwanga inge baji mu Yelusalema, javula balaajilanga mu muzhi wa Betani, lelo jino ke muzhi wa el-ʽAzariyeh (El ʽEizariya), ajino ke jizhina ja Kialabya jilumbulula’mba “Mpunzha Kwaikalanga Lazalasa.” Yesu waikelepo mu nzubo ya kwa Mata, Maliya ne Lazalasa. (Mat 21:17; Mak 11:11; Luk 21:37; Yoa 11:1) Byo afuminenga ku nzubo yabo kuya ku Yelusalema, kyamweka Yesu wapichile mu jishinda jonka jo bamwesha mu vidyo. Pa juba ja Nisanyi 9 mu mwaka wa 33 C.E., kimye Yesu kyo aendele pa mbongolo kupita ku Mutumba wa Maolivi kuya ku Yelusalema, kyamweka wapichijile mu muzhi wa Betefaji mu mukwakwa wapichile mu Yelusalema.

Mukwakwa wapichile mu Betani kuya ku Betefaji
Betefaji
Mutumba wa Maolivi
Kimpachiko kya Kedolona
Nzubo ya Lesa

Musomali ye Bapopele mu Kapokoso

Akino kipikichala kibena kumwesha kapokoso ka muntu ye bapopele musomali walepele masentimita 11.5. Kino kikupa bekitaaine mu mwaka wa 1968 ku bapoya bya kupoyapoya ku kabeta ka ku buyeke bwa Yelusalema, kya mu kimye kyajingako bena Loma. Bintu byo bataaine byamwesha’mba ino misomali beingijishanga kupopelako bantu bo bachibila mambo a kufwa pa kichi. Uno musomali wipasha na musomali waingijishe bashilikale bena Loma kupopelako Yesu Kilishitu pa kichi. Uno musomali bamutaaine mu jibwe jo batongola’mba ossuary mo batayanga bikupa byauma bya bantu bafwa byashalanga mubiji inge wabola. Kino kyamwesha’mba muntu inge bamwipaila pa kichi bamuzhiikanga.—Mat 27:35.