Nanchi Mwayuka Nyi?

Nanchi kyayijilemo kutela basulu bapoteshanga banyama mu nzubo ya Lesa mu Yelusalema amba “tupondo” nyi?

JISHIMIKILA jiji mu Mambo Awama anembele Mateo jaamba’mba: “Yesu watwelele mu nzubo ya Lesa ne kupangamo bonse bapoteshenga ne bapotelenga bintu mu nzubo ya Lesa, kabiji wapinwine matebulu a bapimpwilenga mali ne bipona bya bapoteshenga bankunda. Wibambijile’mba: ‘Kyanembwa’mba, “Nzubo yami ikatelwa’mba nzubo ya milombelo,” pakuba anweba mwiyalula ke jiyengo ja tupondo.’”—Mat. 21:12, 13.

Mabuku a kala a Bayudea amwesha’mba basulu bapoteshanga bintu mu nzubo ya Lesa bajiilanga bantu makusu pa mutwe kupichila mu kwibapotesha bintu pa mitengo yabaya bingi. Buku wa Bayudea utelwa’mba Mishnah (Keritot 1:7) waamba’mba pa kimye kimo mu myaka kitota kitanshi C.E, basulu balulumikile bingi mitengo kya kuba bapoteshenga bankunda ba milambo babiji pa ndenali umo wa ngolode. Ndenali wa ngolode umo o mali afolanga wa mingilo inge waingila pa moba 25. Tutela nangwa bankunda ye wajinga mulambo wa bayanji; bino mitengo yabayile bingi kya kuba bakankelwenga kupota bano bañonyi. (Levi 1:14; 5:7; 12:6-8) Kino kyazhingijishe bingi mufunjishi wa Bayudea, aye Labi Simeon ben Gamaliel kya kuba wakepesheko milambo yafwainwe kupana bantu. Onkao mambo, mutengo wa bankunda babiji wabwelele panshi.

Na mambo a byo twaambapo peulu, kyayijilemo Yesu kutela basulu bapoteshanga bintu mu nzubo ya Lesa amba “tupondo” na mambo a kuba’mba bajinga na lwiso kabiji bapoteshanga bintu pa mutengo wabaya bingi.