Yesu Watokesheshe mu Nzubo ya Lesa

YESU papo wamwekele kuzhingila bingi, ke ibyo nenyi? Nanchi wayuka ene mambo o azhingijile nyi? Ke na mambo a kuba’mba bano bantu bajinga mu nzubo ya Lesa mu Yelusalema bajinga bingi na lwiso. Bakebelenga kwikala na mali avula bingi kupichila mu kupotesha bintu ku bantu baishilenga na kupopwela Lesa.

Nanchi wibamona abe bañombe bonse, mikooko ne bankunda nyi? Banabalume bapoteshenga bano banyama monka mu nzubo ya Lesa. Abya wayuka ene mambo nyi? Ke na mambo a kuba’mba bena Isalela bakebanga banyama ne bañonyi ba kuya na kupana bitapisho kwi Lesa.

Mizhilo ya Lesa yaambile’mba, umvwe mwina Isalela walenga mambo, wafwainwe kulambula mulambo kwi Lesa. Kwajinga ne bimye bikwabo bena Isalela byo bapananga milambo. Pano kwepi bena Isalela ko bakonsheshe kutana bañonyi ne banyama ba kulambula kwi Lesa?

Bena Isalela bamo balelanga bañonyi ne banyama. Onkao mambo, bakonsheshe kupana bano ke milambo. Bino bena Isalela bavula kechi bajingapo na banyama nangwa bañonyi ne. Bakwabo baikalanga kwalepa na Yelusalema kabiji kechi bakonsheshenga kuleta banyama babo ku nzubo ya Lesa ne. Onkao mambo, bantu baishilenga ku nzubo ya Lesa na kupota banyama nangwa bañonyi bo bakebelenga. Pano bano banabalume balulumikilenga bingi mutengo. Bajimukijilenga bingi bantu. Kabiji kechi bafwainwe kupoteshanga bintu mu nzubo ya Lesa ne.

Kino kyo kyalengejile Yesu kuzhingila. Onkao mambo, waalumwine matebulu a boba banabalume ne kwichila mali ajingapo. Kabiji walengele bwembya, nangwa’mba kikote kya mizhinge ne kupangamo banyama bonse bajinga mu nzubo ya Lesa. Wakambizhe banabalume bapoteshenga bankunda amba: ‘Bifumyaimo bino! Kange mwalule nzubo ya Batata ke ya kutainamo mali avula ne.’

Baana ba bwanga ba kwa Yesu bamo bajinga nanji kuno ku nzubo ya Lesa mu Yelusalema. Bakuminye bingi pa kumona bintu byaubilenga Yesu. Kepo bavulukile byambo bimo mu Baibolo byaamba pa Mwana Lesa amba: ‘Butemwe bo natemwa nzubo ya Lesa bukatemanga mwi amiwa nobe mujilo.’

Kimye Yesu kyo akijinga muno mu Yelusalema ku kijiilo kya Lupitailo, waubile bya kukumya byavula bingi. Panyuma ya bino, Yesu wafumine mu Yudea ne kutendeka lwendo lwanji lwa kubwela ku Ngalilea. Bino pa lwendo lwanji, wapichile mu nkambi ya Samaliya. Twaya tumone byamwekele kokwa.