Wafunjishe Kwilekelako Mambo

Bantu baumvwijilenga byambo byaambilenga Yesu mu mashinda apusana pusana kwesakana na byajinga ndangulukilo yabo. Kino kyasolokele patooka kimye Yesu kyo ajinga mu nzubo imo mu Ngalilea. Mufaliseo wa jizhina ja Shimona waichile Yesu ku kijiilo. Kampe wakebelenga kumona Yesu na mambo a bya kukumya byo aubilenga. Kyamweka Yesu walangulukile’mba kuya ku nzubo ya uno muntu kusakumulengela kusapwila bantu basakutanwako. Onkao mambo, waswile luno lwito byonkatu byo aswanga inge basonkeshi ne bandengamambo bamwita ku bijiilo.

Nangwa byonkabyo, Yesu kechi bamunemekele byonka byo banemekanga benyi ne. Na mambo a kwenda mu mikwakwa ya lufukuchi ya mu Palesitina, makwabilo atwanga bingi kyuya ne kuba lukungu. Onkao mambo, pa kutambwila benyi kyajinga kisho kya kwibovwa ku maulu na mema a munyango. Bino Yesu byo afikile, kechi bamovwele ku maulu ne. Kabiji kechi bamutambwijile na kumufyompa byonka byo baubanga benyi ne. Kabiji pa kutambwila benyi, kyajinga kisho kya kwibashinga manyi mu nsuki kumwesha kifyele ne muchima wawama. Kino nakyo kechi bekyubile kwi Yesu ne. Abino byonse byamwesheshetu patoka kuba’mba Yesu kechi bamutambwijile bulongo ne.

Kimye kyo bajiilenga ne benyi saka baikala ku tebulu, mwanamukazhi umo ye babujile kwita ku kijiilo watwelele kishinshi mu kibamba mo bajinga. Uno mwanamukazhi “wayukanyikilwe mu muzhi amba ndengamambo.” (Luka 7:37) Bantu bonse bandengamambo, pano bino, uno mwanamukazhi kyamweka waikelenga bwikalo buncha, kampe kuba bupite. Kampe waumvwine mafunjisho a kwa Yesu kuvwangakotu ne lwito lwa kwita ‘bonse banemenwa kwiya kwi aye amba ebakokoloshe.’ (Mateo 11:28, 29) Kyamweka watundaikilwe na byambo ne byubilo bya kwa Yesu, onkao mambo, wayile kwi Yesu.

Uno mwanamukazhi wapichijile kunyuma ya kwa Yesu ku tebulu ne kufukama ku maulu anji. Wajijile ne kuzobesha maulu a kwa Yesu na mipolo yanji, ne kwiashimuna na nsuki yanji. Wamufyompele ku maulu ne kwitulwilako manyi anunka bulongo. Shimona byo amwene kino kechi watemenwe ne. Waambile mu muchima wanji amba: “Umvwe kine uno muntu wajinga ngauzhi, inge wayuka biji uno mwanamukazhi ubena kumukwata kuba’mba ndengamambo.”—Luka 7:39.

Yesu byo ayukile byalangulukilenga Shimona, wamwambijile’mba: “Shimona, kuji kintu kyonkeba kukubuula.” Ne aye waambile’mba: “Mufunjishi, mbuulai!” Yesu watwajijile na kwamba’mba: “Bantu babiji bajinga na nkongole ku muntu umo wibakongweshe; umo wakongwele mandenali 500, bino mukwabo wakongwele mandenali 50. Byo babujile mali a kumubwezhezha, wibalekejileko mambo bonse. Onkao mambo, pa bano bonse babiji, wepi ukakilapo kumutemwa?” Kyamweka Shimona wakumbwile buno bwipuzho mu jishinda jamwesheshe nobe kechi wateleko maana ne, amba: “Amiwa nalanguluka’mba awa ye alekejileko nkongole yabaya.”—Luka 7:40-43.

Yesu waitabizhe byo aambile. Byo aalulukijile ku mwanamukazhi, waambijile Shimona amba: “Wamumona uno mwanamukazhi nyi? Naji kutwela muno mu nzubo yobe; bino obewa kechi waji kumpapo mema a kowa ku maulu ami ne. Pakuba uno mwanamukazhi waji kuzobesha maulu ami na mipolo yanji ne kwiashimuna na nsuki yanji. Kechi waji kumfyompa ne, bino uno mwanamukazhi kufumatu kimye kyo naji kutwela muno, kechi waji kuleka kufyompa ku maulu ami ne. Obewa kechi waji kwitulwila manyi ku mutwe wami ne, bino uno mwanamukazhi waji kwitulwila manyi anunka bulongo ku maulu ami.” Yesu wamwene kuba’mba uno mwanamukazhi walapijile kya kine ku byubilo byanji byatama. Onkao mambo, Yesu wamwambijile’mba: “Mambo anji alekelwa, mambo wamwesha butemwe bukatampe. Bino awa ye balekela mambo acheche umwesha butemwe bucheche.”—Luka 7:44-47.

Yesu kechi waswishishenga byubilo byatama ne. Bino, kino kyamwekele kyasolwele byo omvwina lusa bantu balenga mambo akatampe inge balapila ne kwiya kwi Kilishitu amba ebakwashe. Uno mwanamukazhi kyamutekeneshe bingi pa kumvwa Yesu wamwambila’mba: “Mambo obe alekelwa. . . . Lwitabilo lobe lwa kupulusha; yanga mu mutende.”—Luka 7:48, 50.