Umvwe Bena Kilishitu Bebolulula Nobe Wichi

BYO kwashajile kimye kicheche kya lufu lwanji, Yesu wajimwine baana banji ba bwanga amba: ‘Talai, Satana wimusakile bonse amba nebolulule nobe kajo nangwa’mba wichi.’ (Luka 22:31) Watazhizhe mwepi byo aambile bino byambo?

Mu moba a kwa Yesu, kunowa wichi kwatayanga bingi kimye ne ngovu. Patanshi, aba banowanga babungizhanga pamo wichi kufuma mu bujimi. Panyuma ya bino, bapulanga pa kipujilo nangwa kwingijisha banyama ba mu bujimi babena kukoka kyela kya kupujilako ne kwikipisha pa kajo pa kuba’mba kitotole. Kino kyalengelanga makunzhi ne bipu kufuma ku kajo. Kyalondelangapo, banjimi baulululanga kajo pa kuba’mba kufume muungu. Pa kululula kwafumangatu makunzhi, bino kajo kaponenanga po babena kululwila. Kyapelangako, kajo bekolululanga bulongo kuba’mba kufume biswaswa byonse.

Monka mwaambijile Yesu, Satana walukukile baana ba bwanga ba kwa Yesu ba ku kala, ne lelo jino napo ubena kwitulukuka. (Efi. 6:11) Kya kine, kechi makatazho onse o tupitamo mu bwikalo afuma kwi Satana ne. (Sapwi. 9:11) Pano bino, Satana ukebesha bingi kwingijisha jishinda jiji jonse konawinamo bulumbuluke bwetu. Kya kumwenako, wakonsha kwitweseka kuba’mba tulondele bwikalo bwa kutemwa bintu bya ino ntanda, kusala bintu byatama bya kisangajimbwe, nangwa kubanga bulalelale. Kabiji wakonsha ne kwingijisha bakwetu ku sukulu nangwa pa nkito nangwatu balongo betu babula mu lwitabilo kwitukanjikizha kuba’mba betulengele kubanga bintu bya ino ntanda nabiji mu bya mfunjilo nangwatu mu mingilo ikwabo ya ino ntanda. Kunungapo, Satana wakonsha kwitulukuka luntunanwa mu kukebatu kwitonawina bulumbuluke bwetu kwi Lesa. Mu ñambilo ya kifwanyikizho, kuji mashinda akwabo engijisha Satana kuba’mba etululule.

Pano twakonsha kushinda byepi uno mulwanyi uji na bulume? Kechi twakonsha kumushinda na bulume bwetu ne. Satana witukila bulume. Nangwa byonkabyo, twayuka’mba Yehoba uji na bulume kukila Satana. Umvwe twakinka manungo mwi Yehoba, kukelwa mu lulombelo kuba’mba etupe maana ne bulume bwa kuchinchika, ne kuketekela mu lutangijilo lwanji, uketukosesha ne kumushinda Satana.—Sala. 25:4, 5.

Umvwe ke tupite mu lweseko, twafwainwa kwikala na ‘maana alumbuluka a kupima ne kuyuka byawama ne byatama,’ ne mu jino jishinda tukakonsha kuchinuzhuka mashinda a kwa Satana. (Hebe. 5:13, 14) Yehoba wakonsha kwitukwasha kwikala na buno bulume. Kabiji twafwainwa ne kulondela jishinda jaoloka, nangwatu pafwe nzovu. Umvwe ke tulondele lutangijilo lwa Yehoba, uketukwasha kuba byawama.—Efi. 6:10.

Satana wakonsha kukeba kwitululula nobe wichi. Bino mu bulume bwa Yehoba, twakonsha kumushinda, ne kukosela mu lwitabilo. (1 Pe. 5:9) Ee, Mambo a Yehoba etulaya’mba: ‘Diabola, mukanai, ne aye ukemunyema.’—Yako. 4:7.