‘Mwingilo Wenu Kechi ye Watu Ne’
1 Byo ajipo mawi a lutundaiko! Kwingila kwenu mu mwingilo wa kwa Yehoba kechi kwatu ne. (1 Ko. 15:58) Mu kupusanako, langulukai pa bantu ba ku kyalo byo balwisha kweseka kuwamya bwikalo bwabo, nangwa kuwamishako mashinda a kutainamo mali avula. Bakonsha kutaya myaka yavula mu lufuundo lwaya palepa, nangwa kwingila nobe bazha pa kuba’mba bekale ke banonshi. Bino, na mambo a “bimye byabo ne bintu bibasolomokelatu bibafikila bonse,” kimye kimo kechi bakonsha kutana bintu byo bakeba ne, nangwa bakonsha kukanjikizhiwa kwikala na bintu bicheche kukila pa byo bakebelenga. Nobe ‘kukabakanatu kujatu mwela,’ mingilo yabo yo yatutu. (Sapwi. 1:14; 9:11) Byo kyawamapo nanchi kuba’mba tukelwa kwingila mwingilo ufweta, mambo uno mwingilo muji munema wa myaka ne myaka!
2 Mwingilo Wakilapo Kunema: Kusapwila mambo awama a Bufumu bwa kwa Lesa ye mwingilo wanemesha pano pa ntanda. Ye mwingilo wakonsha kwingijiwa nangwa kyakuba bantu baumvwa nangwa bakana kumvwa. Tukeba kwamba byonka byaambile mutumwa Paulo kuba’mba: “Amiwa nabinga ku mashi enu anweba bonse. Mambo kechi nachiine kwimubula monse mwasakila Lesa ne.”—Byu. 20:26, 27.
3 Byo kisangajikapo, inge bantu baumvwa ne kubapo kimo kutazha ku mawi a Bufumu! Nsongwakazhi umo wafwishishe bashanjinkazhi. Wakuminye kobaile. Nanchi bashanjinkazhi baile kwiulu nyi, inyi ku helo? Walombele bukwasho kwi Lesa, kwingijisha jizhina ja Yehoba, byonka bya mufunjishe kolojanji wamukazhi. Bukiji-bukiji watatwile kufunda Baibolo ne kutanwa ku kupwila kwa Bwina Kilishitu. Kino kyamulengejile kupimpula bwikalo bwanji mu jishinda jipya kabiji wafumine mu kipanyi kya bambanzhi ba mu mikwakwa. Uno nsongwakazhi wikilekele kupeepa, kwingisha bizhima, ne bwivi. Mwine witaba kuba’mba: “Kutemwatu Yehoba ko kwandengejile kuleka bwikalo bwatama bwa uno mutundu. Yehoba mu lusa lwanji lukatampe ye wakonshatu kumpa luketekelo lwa bwikalo bwa myaka ne myaka.” Luno uno nsongwakazhi wikileka kutaya kimye kyanji mu kwingila bintu byatutu.
4 Nangwatu kya kuba’mba bantu bakana kumvwa, mwingilo wenu ye mubena kwingila wanema bingi. Bayuka kuba’mba Bakamonyi ba kwa Yehoba bebafwakashisha. Bulumbuluke bwenu, bukishinka, ne butemwe byaikala ke bya kine. Nanchi mwingilo wenu mwi Nkambo ye watu nyi? Ine kechi ye watu ne!