Nanchi Nkito Ibena Kwitulekesha Kusapwila Nyi?

¹ Bantu bavula bapayankana bingi namingilo. Ne atweba Bakamonyi bakwa Yehoba twibantu bapayankana—bafunda Byambo bya Lesa, batanwa kukupwila kwakipwilo, nekwingila mwingilo wa mubujimi. Kabiji kununga pakino, twingila nenkito yakumubiji, mingilo yapanzubo nangwa yaku sukulu nemingilotu ikwabo yavula ikebewa kutaya kimye kyabaya pakwiingila. Kino kibakatazhe bingi kikatakata kumitwe yabisemi.

² Na mambo amakatazho amubwikalo mubyalo byavula, mitwe yavula yabisemi ingila kimye kyabaya pakubatu’mba itane bikebewa. Na mambo akwingila mingilo yakumubiji kimye kyabaya nekukoka, kechi bekala nakimye nebulume bwakuya mubusapwishi ne. Byobaji namwingilo wakumwena bamunzubo yabo byaku mubiji, bamo balanguluka’mba pano bengilangatu kyabyonkabya mumwingilo wabusapwishi. (1 Timo. 5:8) Kyakine, kechi twakonsha kukana ne, mambo ano moba kyashupa bingi kutana bikebewa mubwikalo. Pano bino mwingilo wa kumubiji muntu yeengila kechi wafwainwa kumulekesha kusapwila mambo awama ne. (Mako 13:10) Onkao mambo, twafwainwa kulangulukapo bulongo pamingilo yetu.

³ Mambo akuba misango ya ino ntanda yalauka-alaukatu, mutwe wakisemi uba keatetu muchima nakwingila nkito kimye kyabaya pakuba’mba asungengako mali akwingijisha inge waponena mulukatazho lwakubazhimukila. (1 Ko. 7:31) Nangwa kyakuba mingilo yaku mubiji yakonsha kulengela muntu kwikala nabintu byavula nemashuko akukaya nekukokoloka, nanchi kino kyo kyakonsha kulengela kisemi kwikala nalusekelo umvwe kimye kikebewa kubilamo bintu bya kumupashi nekuyilamo nakupwila kebekingijishe kutainamo byobyo bintu nyi? Twafwainwa kuchinuzhuka kintu kyonse kyakonsha kulengela bumupashi bwetu kwikala mulukatazho. Kumvwina lujimuno lwakwa Yesu ‘lwakwibikila nsabo mwiulu’ nekwikala nabya “bunonshi mwi aye Lesa” jo jishinda ja maana.—Mat. 6:19-21; Luka 12:15-21.

⁴ Sambilai Kukeba Bintu bya Bufumu: Yesu wafunjishe baana banji babwanga kubika bintu bya kumupashi palutwe ya byonse. Wibakambizhe’mba: “Kechi mubambishe michima yenu’mba, Lelo tusakuja ka? Nangwa’mba, Lelo tusakutoma ka? Nangwa’mba, Lelo byo tusakuvwala i bi ka?” ne. Mambo ka kyoaambijile byobyo? Walumbulwile’mba: “Pakuba Shenu wa mwiulu wayuka’mba, Bino byonse mwibifwainwa.” Umvwe kine twaketekela bino byambo, kafwako kiketulekesha kuba byaambile Yesu amba: “Nanchi sambilai kukebesha bufumu bwanji, ne bololoke bwanji; ne bino bintu byonse [bimufwainwa kumubiji] bikemubikilwapo.” Lesa uketupa bitufwainwa! (Mat. 6:31-33) Kino kechi kyokimye kyakulabama nabyakutabataba namambo abya mubwikalo nangwa kukeba bunonshi mubuno bwikalo buji pepi nakupita ne.—1 Pe. 5:7; 1 Yoa. 2:15-17.

⁵ Kintu kine muntu kyoakebela nkito ke kumwenamo bya kumubiji byamufwainwa. Pano nanchi tukeba bintu binga? Mutumwa Paulo wanembele’mba: “Pa kwikala na kajo ne bivwalo, byonkabyo tukasekela monka.” Nanchi tukeba kwikala nabyakila pabino nyi? Umvwe tukeba byavula, kimo kimye tukekala mulukatazho lwitujimwineko Paulo kuba’mba: “Aba baji na muchima usaka bunonshi baponena mu lweseko ne kufwa mu bwina, ne mu bya lwiso bya kukosama ne bya kwiipaya, byo bibebizha bantu mu lufu ne mu lonaiko.” (1 Timo. 6:8, 9; Mat. 6:24; Luka 14:33) Twakonsha kuyuka byepi kuba’mba kutemwisha bintu bya kumubiji kubena kwitulabika?

⁶ Umvwe namambo ankito yotusebeza, ketwingile mwingilo wa mubujimi namuleele nangwa kukankalwa kumonapo mashinda mwakwingijila mwingilo wa mambo awama, abya twafwainwa kwikala panshi ne kumona bintu byotwafwainwa kutangizhangako. (Hebe. 13:15, 16) Kwikala bwikalo bwakubula kukebesha bintu byaku mubiji kuketukwasha kufumyapo luno lukatazho lwakwitulekesha kusapwila. Bintu bya kumupashi kimye kyonse byobyo twafwainwa kutangizhangako pamambo a kimye kyetu nebulume bwetu.

⁷ Uno Mwingilo Kechi Watu Ne: Byambo byakwa Paulo bitutundaika kimye kyonse “kwingijisha mwingilo wa Nkambo, byo [twayuka’mba], mwingilo wetu wa mwi Nkambo kechi ye watu ne.” (1 Ko. 15:58) “Mwingilo wa Nkambo” mukatampe ke mwingilo wakusapwila Bufumu ne kulenga baana babwanga. (Mat. 24:14; 28:19, 20) Pakuba’mba twingile uno mwingilo papelela ngovu yetu yonse, twafwainwa kutanchika bulongo kimye kyakuya mumwingilo wa mubujimi mulungu nemulungu nekumona’mba mukino kimye kechi tubena kubilamo bintu bingi ne. (Efi. 5:15-17) Umvwe twauba byobyo, nkito nangwa bintu bikwabo kechi byakonsha kwitulekesha mwingilo wetu ne.

⁸ Umvwe twipana atwe bene kusapwila bukine bwa mu Baibolo kubakwetu, twikala nalusekelo lwakine kine luji mukupana. (Byu. 20:35) Umvwe satwingila mwingilo wakusapwila Bufumu, tukatengelanga kimye kya kulutwe naluketekelo, “mambo Lesa kechi wabula koloka’mba, avulame mwingilo [wetu] ne butemwe bo [t]wijimwesha jizhina janji” ne.—Hebe. 6:10.