Bintu ka byo Mutangizhako?
1 Mwakonsha kukumbula byepi buno bwipuzho? Kya kine, atweba bonse tukeba kutangizhako bintu bya Bufumu. (Mat. 6:33) Bino, twafwainwa kwiipuzha atwe bene amba: ‘Nanchi bintu byo nguba bimwesha’mba ntangizhako bintu bya Bufumu nyi? Baibolo witutundaika amba: “Ipimai anwe bene.” (2 Ko. 13:5) Twakonsha ‘kwipima’ byepi atwe bene kuba’mba tubena kutangizhako bintu bya Bufumu?
2 Kimye Kyetu: Twakonsha kutendekelapo kumona byo twingijisha kimye kyetu. (Efi. 5:15, 16) Kimye kyabaya byepi kitayiwa mulungu ne mulungu mu kwisamba, kutamba televizhonyi, kwingijisha Intaneti, nangwa bya kubauba? Umvwe twanemba kimye kyo tutaya pa bintu bya uno musango ne kwikyesakanya na kimye kyo twingijisha ku bintu bya ku mupashi, mwane tukabokamatu. Abya tutaya maawala avujisha ku nkito ya ku mubiji kwa kubula kuta muchima ku mwingilo wazhila na mambotu a kukeba kupota bintu bya kisangajimbwe nyi? Bimye binga byo tushala ku kupwila nangwa kubula kuya mu mwingilo na mambotu a kukeba kuya na kuba bintu byetu ku mpelo ya mulungu?
3 Yukai bya Kutangizhako: Atweba bavula tufwakyo kimye kyabaya kya kubilamo bintu byonse byo twakonsha kukeba kuba. Onkao mambo, pa kuba’mba tubike bintu bya Bufumu palutwe, twafwainwa kulangulukapo pa bintu byo tutangizhako kuba kabiji ne kulenga mutanchi uji na kimye kya kubako ‘bintu byawamisha nangwa’mba byanema.’ (Fili. 1:10) Kino kyavwangamo kufunda Mambo a Lesa, kwingilako mu mwingilo, kulama kisemi, ne kutanwa ku kupwila kwa bwina Kilishitu. (Sala. 1:1, 2; Loma 10:13, 14; 1 Timo. 5:8; Hebe. 10:24, 25) Bintu bikwabo, nabiji bisela bya kukosesha mubiji ne makayo awama, bikwashañana. (Mako 6:31; 1 Timo. 4:8) Pano bino, abye bintu byabula kunemesha kechi byafwainwa kwitusendela kimye kyetu kyabaya kya kubilamo bintu bya Bufumu ne.
4 Mulongo umo wakyanyike walangulukile kubika bintu bya Bufumu palutwe kupichila mu kutendeka mwingilo wa kimye kyonse mu kifulo kya kuba’mba afunde kufika palepa pa kuba’mba akenengezhe kukatwela nkito ya ku mubiji. Wafunjile mulaka mukwabo kabiji wasajilepo ne kuya na kwingijila kwajinga kukajilwa kukatampe. Waambile’mba: “Mbena kwikala bingi bulongo kuno kuntu. Auno mwingilo byo akoseshañanapo! Kyakonsha kuwama bingi umvwe kya kuba bakyanyike bonse baubileko byonkabye pa kuba’mba nabo bapitemo mu byo mbena kupitamo. Kafwako kintu kyawama kyakonsha kukila kwingijila Yehoba na bintu byetu byonse ne.” Ee, kubika bintu bya Bufumu palutwe kuleta mapesho, pano bino kyakilamo kunema, kutokesha pa muchima Shetu wa mwiulu, aye Yehoba.—Hebe. 6:10.