Ingijishainga Kimye Kyenu Bulongo
1 Kukeba kwetu kwa kusekesha Yehoba pa muchima kwitulengela kutatu muchima mu kwingila mingilo ya ku mupashi. Mambo Anji etukambizha’mba “sambilai kukebesha bufumu” ne kuba’mba “mwitabe bintu byawamisha.” (Mat. 6:33; Fili. 1:10) Twakonsha kumonapo byepi kimye kya bintu bya Bufumu, kabiji ne kubika bintu byabula kunemesha kwikala byapelako?—Efi. 5:15-17.
2 Bikai Mingilo ya Bufumu Palutwe: Tanchikai kimye kyenu, pa kuba’mba kibulenga kutaiwa pa bintu byabula kunema. Bamo batendeka ñondo yense na kutanchika kimye kyo bafwainwa kuya mu mwingilo wa mu bujimi pa kalenda wabo. Kabiji bajimuka kuchina kuba bintu bikwabo kulubankanya bintu byo batanchika. Twakonsha kwingijisha jishinda jimotu kumonapo kimye kya kutanwa ku kupwila, kya lufunjisho lwa pa bunke, ne kya kutanwa ku kupwila kwa nkambi. Bamo baji na mutanchi ye balondela pa juba pa juba wa kutendeka nangwa kupezhako na kutanga Baibolo. Tanchikai kimye kyafwainwa kya mwingilo yense wanema, kabiji ne kumona amba kechi twaswisha bintu bikwabo byabula kunema kulubankanya ne.—Sapwi. 3:1. 1 Ko. 14:40.
3 Kepeshaiko Kwivwanga mu Bintu bya Panopantanda: Mu byalo bimo, bisela, bya kusangalala, bya kukayakaya, bintu bya kubauba ne bintutu bikwabo bibasampukile ne pa katele. Bantu bavula bataya kimye kyabaya bingi na kutamba televizhonyi nangwa na kwingijisha kompyuta. Nangwa byonkabyo, kutabankana na bya kukayakaya ne bintu byo balenga bya bukumo abyo bibena kuleta ino ntanda, kuketulengeshatu bumvu. (1 Yoa. 2:15-17) Onkao mambo, Binembelo bitujimunako kubula kutwezhamo ne mutwe mu bintu bya ino ntanda. (1 Ko. 7:31) Kupichila mu kulondela luno lujimuno lwawama, mwakonsha kumwesha Yehoba amba mpopwelo yanji yo itanshi mu bwikalo bwenu.—Mat. 6:19-21.
4 Kimye kyashalako kya ino ntanda bukumotu kipwe. Aba babika mingilo ya Bufumu palutwe, bakekala na lusekelo kabiji bakatambwila bibusa bya Lesa. (Mana. 8:32-35; Yako. 1:25) Onkao mambo, nanchi twayayi twingijishenga bulongo kimye kyetu kyanema.