Byomwafwainwa Kumonapo Kimye
1 Kukelwa mumwingilo wa Yehoba kokwitulengela kwikala bapayankana! (1 Ko. 15:58) Twayuka’mba twafwainwa kwikala nalufunjisho lwapabunke bwetu, nelwakisemi, kutanga Baibolo kimye kyonse, kunengezhezha jimo byotukafunda pakupwila, kutanwa kukupwila kwabwina Kilishitu, apa bino nekuyanga kimye kyonse mumwingilo wamubujimi. Bakulumpe mukipwilo baji namwingilo wabukafunga, kabiji nemingilo ikwabo yakipwilo. Bamo baji namingilo yabaya yakulama bisemi byabo nangwa mingilotu ikwabo yapusana-pusana yakukwasha bakwabo. Pakuba’mba byonsebye bingijiwe bulongo, atweba bonse twafwainwa kwikala panshi nekumonapo kimye mwakwibyubila bulongo.
2 Yukai Byafwainwa Kubiwa Patanshi: Pakuba’mba ‘tumonepo kimye,’ (NW) twafwainwa kwingijisha maana nekulanguluka bulongo. (Efi. 5:15, 16) Twafwainwa kuyuka “bintu byanemesha” nekwibibika pabyobya byafwainwa kubiwa patanshi. (Fili. 1:10, NW) Bamulume nemukazhi bamo baambile bino pamambo a mingilo yabo yateokalasi panzubo amba: “Bumi bwetu bwayula nabukine ... Bukine kechi kintu kiikajila mubwikalo bwetune, bo bwikalo bwetu bwine. Abi byashala byakungaminakotu.” Kutangizhako kupopwela Yehoba nemwingilo wanji kyanema bingi mubwikalo bwamuntu.
3 Yukai Byonauna Kimye: Mumulungu umo byomuji maawala 168, twafwainwa kwingijisha bulongo kimye kyotuji nakyo. Pakuba’mba twikalengako nakimye kyakwingijilamo mingilo yateokalasi, twafwainwa kuyuka nekukepeshako kuba bintu byonaunatu kimye. Bantu bamo bayile nakwipuzhaipuzha kukeba kuyuka bantu byobengijisha kimye kyabo baambile’mba bakulumpe bavula mu United States bataya maawala 30 mulungu nemulungu nakutambatu Televizhonyi! Bakwabo nabo, bataya kimye kyabo nakutangatu mabuku akukyalo. Bamo nabo bayuka’mba bataya kimye kikatampe nakwingila mingilo ingilapo bavula, nabiji kuba byobatemwa bene, kukaya, nemingilotu yapakompyuta. Twafwainwa kumona mutanchi wabintu byotuba pajuba pajuba nekumona byotwafwainwa kwingijisha bulongo kimye kyetu. Kukepeshako kimye kyakubilamo bintu byabula kunema kokwingijisha maana etu bulongo.
4 Tanchikai Bulongo: Kechi namambo abwikalo botujimone, atweba bonse pamuntu pamuntu twakonsha kumonapo kimye kyakwingijilamo mingilo yakumupashi. Bamo batana kuba’mba kutatula mingilo lukelokelo pajuba pajuba kwawama mambo boba byavula. Umvwe papita kimye kyabaya pakuya kunkito namotoka nangwa pakupembelela bakwetu, kyawama kwingijisha kyokyo kimye kutangilamo Baibolo, kunengezhezha jimo byotukafunda pakupwila, nangwa kuteleka kumatepu a Sosaiti. Kumonapo kimye kyakufunjila pamo bonse kimye kyonse, kukwasha bingi bisemi. Umvwe bonse mukisemi pamuntu pamuntu kebendeshe kwiya kulufunjisho lwakisemi, kilengela bonse kushalako nakimye kyakubilamo bintu bikwabo.
5 Pajuba nejuba twafwainwa kuyuka’mba ‘kimye kyashalako kyakepa.’ (1 Ko. 7:29) Bumi bwetu bwaimena pabyotwingijisha kimye kyashalako. Tukatokwa bingi umvwe ketwikaleko nakimye kyakutangizhako bintu bya Bufumu!—Mat. 6:33.