Kwingijisha Kimye Kyetu Bulongo
1. Kika kitutundaika kwingijisha kimye kyetu bulongo?
1 Kimye kyanema bingi. Byonka biji mali, kimye kyakonsha kutayiwa nangwa kwingijishiwa bulongo. Abya mubena kwingijisha byepi kino kimye? Byo tuji bena Kilishitu, butemwe bwetu bo twatemwa Yehoba, Yesu Kilishitu, ne bakwetu bantu bwafwainwa kwitutundaika kwingijisha kimye kyetu bulongo, ‘kasa tupulusha bimye.’—Efi. 5:16.
2. Nga kwingijisha kimye kyetu bulongo kyo twikala nakyo kwitulengela byepi kwikala bapusanako?
2 Mu kuba bino, bwikalo bwa bwina Kilishitu bupusenshatu na bwikalo buchinamina boba batemwa buno bwikalo bukote. Yesu wayukile amba kimye kikataiwanga ku bijikila byakilamo bya bintu bya ku mubiji. (Luka 12:16-21; 17:28, 30) Paulo waambijile jimo kuba’mba, bantu bakekalanga mu moba a kupelako bakekala bantu “ba kutemwa bya lusangajiko.” (2 Timo. 3:4) Nanchi kimukatazha kutwajijila na kulondela mutanchi wawama wa bintu bya ku mupashi nyi? Abya mulangulukapo amba kyakonsha kuwama umvwe mwaikalako na kimye kya kuya mu busapwishi nyi? Twakonsha kwingijisha byepi kimye kyetu bulongo?—Sala. 90:12; Fili. 1:9-11.
3. Ñanyi bintu byo twafwainwa kulondela pa kuba’mba tutangizheko bintu bya ku mupashi?
3 Kutangizhako Bintu bya ku Mupashi: Yesu mu bumi bwanji kechi watangizheko kajo, bya kutoma nangwa bintu bya lusangajiko ne. Nangwa kyakuba wajinga sendwe wayuka mingilo, kechi walekele bintu bya ku mubiji nangwa bya mu kisemi kumuzhikijila ne. Pakuba aye, watangizheko kuba kyaswa muchima wa Shanji. (Mat. 13:55; Luka 9:58; Yoa. 4:34) Ko biji bintu bimo byo twafwainwa kulondela pa kuba’mba twingijishe kimye kyetu bulongo. Jishinda jimo ke ja kwikala na mutanchi wawama wa kubilamo bintu. Nangwa kyakuba uno mutanchi yemwanengezha pafwainwa kwikala kimye kya kukokoloka nangwa kya kubilamo mingilo ikwabo, bino kimye kya kubilamo bintu bya ku mupashi kyafwainwa kwikalapo. Pa mutanchi wenu pafwainwa kwikala kimye kya kutanwa ku kupwila konse kwa kipwilo, kuya mu mwingilo wa mu bujimi, ne kimye kya kufunda lufunjisho lwa Baibolo lwa pa bunke kuba’mba muyuke bukine bwa mfunjilo yakatataka.
4. Mambo ka bansemi o bafwainwa kutelako maana ku mutanchi wabo wa kisemi?
4 Bansemi baji na mutembo mukwabo wa kukwasha baana babo kwikala babambakana ku bintu bya ku mupashi. Onkao mambo, kyakonsha kwibakwasha bingi kutanchika mutanchi wawama wa kubila pamo bintu bya teokalasi na kisemi kyabo kyonse. Mu jino jishinda, bamwesha lusekelo mu bwikalo bwa baana babo ne kwibakwasha kwingijisha kimye kyabo bulongo.—Mpitu. 6:6-9; Efi. 6:4.
5, 6. Kwibikila bikonkwanyi bya kwingila mu mwingilo kwakonsha kwitukwasha byepi kwingijisha kimye kyetu bulongo?
5 Tai Maana ku Bintu Bikatampe Kabiji Byawama: Kyawama bingi kwibikila bikonkwanyi mu kwingila mwingilo wa mu bujimi. Twakonsha kufuukulapo kuba’mba tusapwilanga maawala mukananga mu mwingilo wa mu bujimi pa ñondo pa ñondo. Bavula batana kuba’mba kyawama bingi kwibikila kikonkwanyi kya kwingilako mwingilo wa bupainiya bwa kukwasha nangwa bwa kimye kyonse. Umvwe pa kino kimye kechi mwakonsha kunungako kimye kyabaya kya kwingila mu busapwishi ne kufunjisha ne, abya mwakonsha kuwamishako mwingilo wenu nyi? Mwakonsha kwingijisha byepi kimye kyenu bulongo mu mwingilo?
6 Nanchi mwakonsha kuwamishako mfunjishisho yenu kupichila mu kwingijisha ntendekelo yapusana pusana umvwe mubena kusapwila nyi? (km-KD January 2002 pe. 3) Abya mwakonsha kuwamishako jishinda jo mufunjishishamo mafunjisho a Baibolo nangwa kuwamishako jishinda jo mubujilamo bantu baji na lusekelo lwa kufunda bukine ku Byambo bya Yehoba ne jibumba janji nyi? (km-CW June 1996 kyamukachi, mape. 14-16) Mu kuba bino, mwakonsha kwingijisha kimye kyenu bulongo mu mwingilo.
7. Twakonsha kupulushako byepi kimye kya kuba bintu bya ku mupashi, kabiji mfweto ka yo twakonsha kutanamo mu kuba bino?
7 Umvwe muji mumo mumo mo mukeba kuwamishako, ingijilaipo bukiji bukiji. Nanchi mwakonsha kupulushako kichika kya awala umo pa juba pa juba ku mingilo ikwabo yo muba nyi? Kino, kyo kimye kyakonsha kwingijishiwa kuba’mba mupwishe kutanga Baibolo mu mwaka umo. Kino kyakonsha kuleta mfweto ikatampe bingi ya ku mupashi! (Sal. 19:7-11; 119:97-100) Vulukai kwibikila kimye kyafwainwa kya kutangilamo Baibolo, kunengezhezhamo kupwila, ne kya kuya mu mwingilo wa mu bujimi. (1 Ko. 15:58) Kwingijisha kimye kyenu bulongo kukemukwasha ‘kuyuka mwayila kyaswa muchima wa Yehoba.’—Efi. 5:17.