Bantu Balusekelo Panopantanda
1 “Bo bene ba lusekelo awa mutundu wa bantu baji na Lesa wabo, Yehoba.” (Sala. 144:15) Bino byambo bibena kutongola Bakamonyi bakwa Yehoba byobaji bantu balusekelo panopantanda. Kafwako lusekelo lukwabo lwakila kwingijila Lesa mumi yenka wakine, aye Yehoba ne. Pakuba byoaji “Lesa wa [lusekelo, NW]” aba bamupopwela bamwesha lusekelo lwanji. (1 Timo. 1:11) Ñanyi mbaji imo yampopwelo yetu ileta lusekelo?
2 Ene Mambo Akwikela Balusekelo: Yesu witulaile’mba lusekelo lwiya umvwe ‘twata muchima ku mupashi.’ (Mat. 5:3, NW) Kufunda Baibolo kimye kyonse nekutanwa kukupwila konse kwa bwina Kilishitu kwitulengela kwikala balusekelo. Kufunda bukine bwa Byambo bya Lesa kwitukasulula kububela bwamubupopweshi. (Yoa. 8:32) Kabiji Binembelo bitufunjisha bwikalo bwawama botwafwainwa kwikelamo. (Isa. 48:17) Namambo abino byonse, tusangalala pakupwañena pamo nabalongo betu bena Kilishitu.—1 Tesa. 2:19, 20; 1 Pe. 2:17.
3 Twikala bingi balusekelo byotulondela mizhilo ya Lesa yabyubilo byawama, mambo twayuka namba kino kitulamawizha nekusangajika Yehoba. (Mana. 27:11) Munembeshi umo wapepala wabyambo wanembele’mba: “Nangwa kyakuba baji namizhilo yakosa, Bakamonyi bakwa Yehoba kechi bapopomenwane. Mukifulo kyakuba byobyo, banyike nebakulumpe [bobaji nabo] bamwekanatu balusekelo kabiji boba bintu mukwesakanya.” Twakonsha kukwasha byepi bakwetu kwikala balusekelo byonka byotuji?
4 Kwashai Bakwenu Kwikala Balusekelo: Panopantanda payula bulanda, kabiji bantu kafwapo nangwa kimo kyobayuka pamambo akimye kyakulutwene. Onkao mambo, atweba tuji naluketekelo lwakulutwe, twayuka namba juba jimo bulanda bukapwa. (Lum. 21:3, 4) Kyokyo tupayankena mumwingilo nakukeba bamichima yakishinka namba twibabuleko luketekelo lwetu nebyotwaitabilamo pamambo a Yehoba.—Ezi. 9:4.
5 Nyenga umo painiya waambile’mba: “Kafwako kikwabo kisangajika kyakila kukwasha bantu kuyuka Yehoba nebukine bwanjine.” Twayai twingile papelela bulume bwetu nakukwasha bantu kufunda Baibolo. Kwingijila Yehoba nekwipana atweba bene kukwasha bantu’mba bamwingijilenga kwituletela bingi lusekelo.—Byu. 20:35.