Mwakonsha Kwikala ba Lusekelo

1. Kwikala na “muchima wa kukeba kuyuka Lesa” kwakonsha kwitulengela byepi kwikala na lusekelo?

BANTU kechi bafwainwa kwikalatu na lusekelo lwa pa kimye kacheche ne. Bakonsha kwikala na lusekelo mu bwikalo bwabo bonse. Mu ñanyi jishinda? Yesu walumbulwile mu Jashi Janji ja pa Mutumba amba: “Bo ba lusekelo aba baji na muchima wa kukeba kuyuka Lesa.” (Mat. 5:3) Yesu wayukile kuba’mba bantu balengelwe na “muchima wa kukeba kuyuka” ne kupopwela Mulenga wabo aye Yehoba Lesa. Na mambo a kuba’mba Yehoba ke “Lesa wa lusekelo” ne bantu ba mupopwela nabo bakonsha kwikala na lusekelo.—1 Timo. 1:11.

2-3. (a) Bañanyi bakwabo Yesu bo ambilepo’mba bakonsha kwikala lusekelo? (b) Ñanyi bintu byo tusakwisambapo mu uno mutwe kabiji mambo ka?

² Nanchi kubula makatazho mu bwikalo bwetu ko kwakonsha kwitulengela kwikala na lusekelo nyi? Ine. Mu Jashi Janji ja pa Mutumba Yesu waambilepo kintu kimo kyashinkile bantu bulaka. Waambile’mba: “Aba bajila” na mambo a bundengamambo bwabo nangwa aba bajila na mambo a makatazho abo a mu bwikalo bakonsha kwikala na lusekelo. Kabiji Yesu waambile’mba ‘aba bonse bo bamanyika’ nangwa aba bo bambila “mwenga” na mambo a kwikala baana ba bwanga ba kwa Kilishitu bakonsha kwikala na lusekelo. (Mat. 5:4, 10, 11) Pano nga bantu bapita mu bintu byaambilepo Yesu bakonsha kwikala byepi na lusekelo?

³ Yesu wafunjishe kuba’mba bantu kechi bakonsha kwikalatu na lusekelo inge kechi babena kupita mu makatazho a mu buno bwikalo ne. Pakuba bantu bakonsha kwikala na lusekelo inge baji na muchima wa kukeba kuyuka Lesa kabiji ne kufwenya kwipi ne aye. (Yako. 4:8) Pano bakonsha kuba byepi bino? Mu uno mutwe tusakwisamba pa bintu bisatu byakonsha kwitulengela kwikala bingi na lusekelo.

KUTANGA NE KUFUNDA BAIBOLO

4. Ñanyi kintu kitanshi kyakonsha kuba muntu pa kuba’mba ekale na lusekelo? (Salamo 1:1-3)

⁴ KITANSHI: Twakonsha kwikala na lusekelo umvwe ketutange ne kufunda Mambo a Lesa. Yesu waesakenye mambo a Lesa ku kajo. Pa kuba’mba bantu ne banyama batwajijile kwikala na bumi bafwainwa kujanga kajo. Bino bantu bo bonkatu bafwainwa kutanganga Mambo a Lesa. O ene mambo Yesu o aambijile’mba: “Muntu kechi ukamwena bumi mu kajo konkatu ne, poso ne mu byambo bifuma mu kanwa ka Yehoba.” (Mat. 4:4) Onkao mambo, twafwainwa kutanganga Baibolo mambo a Lesa pa juba pa juba. Nyimbi wa masalamo waambile’mba: ‘Ye mwine wa lusekelo muntu usekela monka mu mizhilo ya Yehoba kabiji wiitanga mute ne bufuku.’—Tangai Salamo 1:1-3.

5-6. (a) Ñanyi bintu byo twakonsha kufunda mu Baibolo? (b) Kutanga Baibolo kwakonsha kwitukwasha byepi?

⁵ Yehoba witubuula mu mambo anji Baibolo byo twafwainwa kuba pa kuba’mba twikale na lusekelo mu bwikalo bwetu mambo witutemwa bingi. Twafunda’mba Yehoba wakebelenga’mba bantu bekalenga myaka ne myaka. Twafunda byo twakonsha kufwenya kwipi ne aye ne byo twafwainwa kuba pa kuba’mba etulekeleko mambo etu. Kabiji twafunda kuketekela bintu byawama byo etulaya kulutwe. (Yele. 29:11) Abino bintu byo tufunda mu Baibolo bituletela lusekelo.

⁶ Twayuka kuba’mba Baibolo witubuula ne bintu bikwabo byakonsha kwitukwasha mu bwikalo bwetu. Kabiji kulondela byambo biji mu Baibolo kwitulengela kwikala na lusekelo. Inge mwalefulwa na mambo a bijikila bya mu bwikalo mwafwainwa kwikalanga na kimye kyabaya kya kutanganga mambo a Yehoba ne kulanguluka langulukapo. Yesu waambile’mba: ‘Balusekelo ke boba bomvwa mambo a Lesa ne kwialama.’—Luka 11:28.

7. Ñanyi bintu byakonsha kwimukwasha kumvwisha inge mubena kutanga mambo a Lesa?

⁷ Inge mubena kutanga mambo a Lesa mwafwainwa kulanguluka langulukangapo pa byo mubena kutanga. Lekai twambe bino. Fwanyikizhai kuba’mba muntu umo wimutekela kajo ko mwatemwa bingi. Bino kimye kya kuja bulongo kano kajo kimukepela nangwa mubena kulanguluka bikwabo, mwapelawizha kwikaja ne kwiyowatu ne. Byo mwapwisha kuja mwavuluka kuba’mba mwapelawizha kwikaja ne kulanguluka’mba inge mwaji kwikajangatu pachepache pa kuba’mba mwiyowe bulongo. Atweba bamo byo byo tutanga Baibolo, tupitamotu kapambala kabiji kechi tulangulukapo ne Yehoba byo abena kwitufunjisha pa kyo kyo kintu kyo tubena kutanga ne. Twafwainwa kwikalanga na kimye kya kutanganga mambo a Lesa. Kufwanyikizha bintu bibena kumweka, mawi a bantu bajimo ne kulanguluka langulukapo pa bintu byo tubena kutanga. Umvwe ketube bino po po tukekala na lusekelo.

8. Ñanyi mwingilo ubena kwingila “kalume wa kishinka kabiji wa maana”? (Monai kakitenguluzha.)

⁸ Atweba tuji na mabuku alumbulula Baibolo avula, mambo Yesu watongola “kalume wa kishinka kabiji wa maana” kwitupanga bino bintu pa kimye kyafwainwa.b (Mat. 24:45) Byonse bitunengezhezha kalume wa kishinka kabiji wa maana bifuma mu binembelo. (1 Tesa. 2:13) Bino byambo bya Lesa bitukwasha kuyuka bilanguluka Yehoba. Ino mulanguluko ya Yehoba beisolola mu Baibolo. O ene mambo o tutangila Kyamba kya Usopa, Labainga ne bibaba bikwabo bitanwa pa jw.org. Tunengezha kupwila kwa mukachi ka mulungu ne kwa ku mpelo ya mulungu. Kabiji tutamba mutanchi wa pa ñondo pa ñondo wa JW Broadcasting^®. Kuba bino bintu kwakonsha kwitulengela kuba kintu kya bubiji kyakonsha kwituletela lusekelo.

KOKELAINGA MAFUNDE A YEHOBA

9. Ñanyi kintu kya bubiji kyakonsha kwitulengela kwikala na lusekelo?

⁹ KYA BUBIJI: Umvwe saka tukokela mafunde a Yehoba tukekala na lusekelo. Nyimbi wa masalamo wanembele’mba: “Bo bene ba lusekelo aba bakamwa Yehoba, bonka benda mu mashinda anji.” (Sala. 128:1) Bantu bakamwa Yehoba ke boba bamunemeka ne kubula kuba bintu bimufichisha ku muchima. (Maana 16:6) Onkao mambo, twafwainwa kulondelanga mafunde a Yehoba aamba pa kyawama ne kyatama o aambapo aye mwine mu Baibolo. (2 Ko. 7:1) Umvwe twatemwa bintu byatemwa Yehoba ne kushikwa bintu byo ashikwa tukekala na lusekelo.—Sala. 37:27; 97:10; Loma 12:9.

10. Kwesekana na Loma 12:2, ñanyi kintu kyo twafwainwa kuba?

¹⁰ Tangai Loma 12:2. Muntu wakonsha kuyuka kuba’mba Yehoba ye uji na luusa lwa kufuukula kintu kyawama ne kyatama. Bino muntu mwine wafwainwa kwifuukwilapo kulondela mafunde a Lesa nangwa ne. Atweba bonse twayuka kuba’mba kafulumende ye uji na luusa lwa kwitubula bya kwendesha motoka, wakonsha kwamba’mba mu iwe mukwakwa muntu kechi wafwainwa kwendeshanga masekenyi ne. Bino muntu mwine ye wafwainwa kufuukula kulondela byaamba kafulumende. Wakonsha kufuukulapo kwendanga masekenyi kwesakana na byo abena kukeba mwine. Byo tuba mu bwikalo bwetu bimwesha inge tubena kulondela Yehoba nangwa ne. (Maana 12:28) O ene mambo Davida o aambijile pe Yehoba’mba: “Mundengela kuyuka mashinda a ku bumi. Ku meso enu ko kuji lusekelo lukatampe; mu kuboko kwenu kwa kilujo muji lusekelo lwa myaka ne myaka.”—Sala. 16:11.

11-12. (a) Ñanyi kintu kyo twafwainwa kubula kuba umvwe tubena kupita mu makatazho nangwa inge tuji na bijikila? (b) Byambo biji pa Filipai 4:8 byakonsha kwitukwasha byepi kusala bulongo bya kisangajimbwe?

¹¹ Umvwe tubena kupita mu makatazho nangwa twalefulwa tulanguluka pa bintu byo twafwainwa kuba pa kuba’mba tufume mu lolo lukatazho. Kechi kyatama kuba bino ne. Pano bino, inge twabula kujimuka twakonsha kuba kintu kyashikwa Yehoba.—Efi. 5:10-12, 15-17.

¹² Mu nkalata yo anembejile Bena Filipai, mutumwa Paulo watundaikile bena Kilishitu kutwajijila kuba ‘byaoloka, kwilama, kuba bintu bileta butemwe ne byawamisha.’ (Tangai Filipai 4:8.) Nangwa kya kuba Paulo kechi wanembele kikatakata pa bintu bya kisangajimbwe ne. Bino byo anembele byafwainwa kwitukwasha kusalanga bulongo byakisangajimbwe. Esekai bino: Ponse po banemba’mba “bintu” mu kino kyepelo bikaipo kyambo kya kuba’mba “nyimbo,” “mafilimu,” “mabuku” nangwa “makayo a pa kompyuta.” Kuba bino kwakonsha kwimukwasha kusala bulongo bintu bitokesha Lesa ku muchima ne bibula kumutokesha ku muchima. Tukebesha bingi kulondela mafunde a Yehoba. (Sala. 119:1-3) Kepo jiwi ja mu muchima jiketulengela kuba kintu kikwabo kyakonsha kwitulengela kwikala na lusekelo.—Byu. 23:1.

NEMEKAINGA MPOPWELO YENU

13. Ñanyi kintu kya busatu kyakonsha kwitulengela kwikala na lusekelo? (Yoano 4:23, 24)

¹³ KYA BUSATU: Kintu kitanshi kyo twafwainwa kubanga mu bwikalo bwetu ke kupopwela Yehoba. Twafwainwa kupopwelanga Yehoba mambo ye witulengele. (Lum. 4:11; 14:6, 7) Onkao mambo, kintu kyo twafwainwa kunemeka bingi mu bwikalo bwetu ke kupopwelanga Yehoba, byonka byo akeba’mba tumupopwelenga nangwa’mba kumupopwelanga “na mupashi ne na bukine.” (Tangai Yoano 4:23, 24.) Tukeba mupashi wazhila wa Lesa kutangijilanga mpopwelo yetu, pa kuba’mba tulondelenga bukine buji mu mambo anji. Twafwainwa kupopwelanga Yehoba nangwatu inge twikala mu kyalo mo balekesha nangwa kukanya mwingilo wetu. Balongo ne banyenga yetu kukila 100 bebakasa na mambo a kwikala Bakamonyi ba kwa Yehoba.c Nangwa byonkabyo, baji bingi na lusekelo mambo batwajijila kulomba, kufunda ne kubuula bantu pe Lesa ne pa Bufumu bwanji. Inge bantu betwambila mwenga ne kwitumanyika, tutwajijila kwikala na lusekelo mambo twayuka’mba Yehoba uketukwasha kuchinchika kabiji uketufweta.—Yako. 1:12; 1 Pe. 4:14.

BINTU BYAMWEKEJILE NSONGWALUME UMO

14. Ñanyi kintu kyamwekejile nsongwalume wa mu Tajikistan? Kabiji mambo ka?

¹⁴ Balongo ne banyenga bavula bapita mu meseko avula bingi. Pano bino, batwajijila kwikala na lusekelo na mambo a kulondela bino bishinka bisatu byo twisambapo. Akyumvwai byamwekejile nsongwalume uji na myaka 19 aye Jovidon Bobojonov, wakaine kwingila mingilo ya bushilikale mu kyalo kya Tajikistan. Pa 4 October, 2019, bamusendele pa nzubo ne kumutaya mu kaleya kabiji bamumanyikilenga bingi. Na mambo a kuba’mba bamukashiletu kya shinji, bantapatwambo ba mu byalo byapusana pusana batatwile kwambapo pa mambo anji. Baambilepo kuba’mba bamupumine bingi pa kuba’mba aswe kutwela bushilikale ne kumuchipisha kuba’mba aswe kuvwala bivwalo bya bushilikale. Byo bamwene kuba’mba wakana bazhachishe ne kumutaya pa kazhima. Kufikatu kimye Ndamakyalo wabo kyo amulekejile mambo ne kwibakambizha kuba’mba bamukasulule. Mu kikye kyonse kimye kyo bamanyikilenga Jovidon watwajijile kwikala wa kishinka kabiji wajinga bingi na lusekelo. Mambo ka? Mambo wajinga na muchima wa kufunda ne kukeba kuyuka Lesa.

15. Jovidon watwajijile byepi kufunda pe Yehoba kimye kyo ajinga mu kaleya?

¹⁵ Jovidon watwajijile kufunda pe Yehoba kimye kyo ajinga mu kaleya nangwa kya kuba kechi wajingapo na Baibolo nangwa mabuku alumbulula Baibolo ne. Pano wafunjilenga byepi pe Yehoba? Balongo ne banyenga bamuletelanga bya kuja banembanga kinembelo kya juba pa kyola kyo bamutwajilanga kajo. Abino byo byo atanganga Baibolo kabiji walanguluka langulukanga pa byo atanganga pa juba pa juba. Wabuulanga bonse bo kikyangye kumwekelapo kala kyo apichilemo amba: “Kino kyo kimye kyo mwafwainwa kutanganga bingi mambo a Lesa ne mabuku alumbulula Baibolo pa kuba’mba mu muyuke bulongo Yehoba.”

16. Ñanyi bintu byalanguluka langulukangapo Jovidon?

¹⁶ Mulongo wetu walondelanga mafunde a Yehoba. Kechi walangulukanga pa bintu byatama nangwa kutendeka kuba bintu byatama ne. Walangulukanga pe Yehoba ne pa bintu byo anemeka. Jovidon wafunjilanga ne ku bintu byalenga Lesa. Wabukanga lukelo na mambo a bañonyi baimbanga. Kabiji bufuku wamonanga tubangabanga ne ñondo. Waambile’mba: “Bino bya bupe bitupa Yehoba byandetelanga bingi lusekelo ne kuntundaika.” Umvwe ketulanguluke languluke pa bintu byalenga Yehoba ne kulondela mikambizho ya Yehoba iji mu Mambo anji Baibolo tukatwajijila kwikala na lusekelo kabiji uketukwasha kuchinchika makatazho onse.

17. Byambo bitanwa pa 1 Petelo 1:6, 7 byakonsha kukwasha byepi muntu uji na lukatazho lwapichilemo Jovidon?

¹⁷ Jovidon watwajijile kupopwela Yehoba. Wayukile buneme bwa kutwajijila kwikala wa kishinka kwi Lesa wa kine. Yesu waambile’mba: “Wafwainwa kupopwelatu Yehoba Lesa wobe ne kumwingijila aye yenka kwapwa.” (Luka 4:8) Bakulumpe ba bashilikale ne bashilikale bakebelenga’mba Jovidon aleke kwikala Kamonyi wa kwa Yehoba. Bino aye watwajijile kulomba kwi Yehoba mute ne bufuku kuba’mba amukwashe kubula kusankilapo lwitabilo lwanji. Nangwa kya kuba Jovidon bamumanyikilenga watwajijile kwikala wa kishinka. Kabiji Jovidon watwajijile kwikala na lusekelo nangwa kya kuba kimye kimo bamukwachile, kumupuma, kumutaya pa kazhima ne kweseka lwitabilo lwanji.—Tangai 1 Petelo 1:6, 7.

18. Twakonsha kutwajijila byepi kwikala na lusekelo?

¹⁸ Yehoba wayuka bintu byo tukeba pa kuba’mba twikale na lusekelo. Umvwe mwatwajijila kulondela bino bishinka bisatu byo twisambapo, mukatwajijila kwikala na lusekelo inge mubena kupita mu meseko avula. Kepo mukamba bino byambo bya kuba’mba: “Bo bene ba lusekelo bantu baji na Lesa wabo Yehoba.”—Sala. 144:15.