Kwisamba na Bantu Nanchi Yesu Lesa Nyi?

BAKAMONYI BA KWA YEHOBA bomvwa bingi bulongo kwisamba bya mu Baibolo na bantu. Nanchi mujipo na bwipuzho pa bya mu Baibolo bwimukatazha nyi? Nanchi mukebesha kuyuka byaitabilamo Bakamonyi ba kwa Yehoba nyi? Umvwe byo kiji, kange mukazhinyezhinye kwipuzha kimye kyo mukamonañana na Kamonyi ne. Bakatemwa bingi kwisamba nenu.

Uno ke mwisambo Kamonyi wa kwa Yehoba ye akonsha kwisamba na bantu. Twayai tufwanyikizhe kuba’mba Kamonyi wa jizhina ja Karen wafika pa nzubo ya mwanamukazhi wa jizhina ja Mata.

Nanchi kya Kine Kuba’mba Kechi Mwaitabila mwi Yesu Nenyi?

Mata: Ba Pashita bamba’mba Bakamonyi ba kwa Yehoba kechi baitabila mwi Yesu ne. Kya kine nyi?

Karen: Ine. Twaitabila mwi Yesu. Twaitabila ne kuba’mba kwikala na lwitabilo mwi Yesu kwanema bingi pa kuba’mba tukapuluke.

Mata: Ne amiwatu byobyo naitabila.

Karen: Ko kuba’mba anweba ne amiwa twaitabilatu mu kintu kimo. Kana yenu bañanyi jizhina mwane? Amiwa ne Karen.

Mata: Amiwa ne Mata. Natemwa bingi kumonañana nenu.

Karen: Ne amiwatu natemwa bingi. Kampe mwakonsha kukumya’mba, ‘Inge kya kuba Bakamonyi ba kwa Yehoba baitabila mwi Yesu, mambo ka bantu o bambila’mba kechi bamwitabila ne?’

Mata: Ee ne amiwa kyokyo mbena kukebesha kuyuka kyonkakyo.

Karen: Nsakutetakotu pacheche, twaitabila mwi Yesu kya, pano bino kechi twaitabilatu byonse byamba bantu pe aye ne.

Mata: Mbulai ñanyi bintu byo mwabula kwitabila pe Yesu?

Karen: Bantu bamo bamba’mba Yesu wajingatu muntu wawama. Pano atweba kechi byobyo twaitabila ne.

Mata: Ne amiwatu.

Karen: Mwamona pa kino napo bonse byobyo twaitabila. Kya bubiji ke kya kuba’mba Bakamonyi ba kwa Yehoba kechi baitabila mu mafunjisho apusana na byaambile Yesu mwine pa bulunda bwanji ne Shanji ne.

Mata: Mwatazha mwepi?

Karen: Bupopweshi bwavula bufunjisha’mba, Yesu Lesa. Kampe ne anwebatu byo bemufunjisha.

Mata: Ee, ba pashita bamba’mba Lesa ne Yesu kechi bapusana ne.

Karen: Nanchi mwaswa kuba’mba mwakonsha kufunda bukine pe Yesu inge mwapesapesa byo aambile aye mwine nyi?

Mata: Ee.

Yesu Waambilepo’mba Ka?

Karen: Kyawama, twayai twisambe kinembelo kya mu Baibolo kisakwitukwasha kumvwisha. Twayai tutange Yoano 6:38. Yesu waambile’mba: “Naiya kufuma mwiulu kechi na kuba kyaswa muchima wami ne, poso na kuba kyaswa muchima wa yewa wantumine.” Inge Yesu wajinga Lesa, bino byambo byakonsha kwituvulañanya bingi.

Mata: Mwikitazha mwepi?

Karen: Yesu waambile’mba kechi waishile kufuma mwiulu na kuba kyaswa muchima wanji ne.

Mata: Kya kine, waambile’mba waishile na kuba kyaswa muchima wa yewa wamutumine.

Karen: Pano inge kya kuba Yesu wajinga Lesa, ñanyi wamutumine kufuma mwiulu? Kabiji mambo ka Yesu o aubijile kyaswa muchima wa yewa wamutumine?

Mata: Pano po naumvwisha. Nangwa byonkabyo, kechi naswa kuba’mba kino kyepelo kibena kumwesha’mba Yesu kechi Lesa ne.

Karen: Akimonai byaambile Yesu pa kimye kikwabo. Bino byambo wibyambilepo ne mu kyepelo kyalondelapo kiji mu Yoano. Tangai Yoano 7:16.

Mata: Pa bena kutangwa’mba: “Yesu wibakumbwile amba: ‘Byo mfunjisha kechi byami ne, bino bya yewa wantumine.’”

Karen: Nasanta bingi ba Mata. Kwesakana na kino kyepelo, abya mwaumvwa’mba Yesu wafunjishanga byanji mwine nyi?

Mata: Ine, waambile’mba byo afunjishanga byajinga bya yewa wamutumine.

Karen: Kya kine. Kampe twakonsha ne kushikisha’mba, ‘Pano ñanyi wamutumine Yesu? Kabiji ñanyi wamupele bukine bo afunjishenga?’ Nanchi kechi twakonsha kwamba’mba aye wakila Yesu nenyi? Mambo watumana wakila yewa ye batuma.

Mata: Natemwa bingi. Nkyangye kutangapo kino kinembelo.

Karen: Kabiji monai byambo bya kwa Yesu biji pa Yoano 14:28 bya kuba’mba: “Mwaumvwine byo nemwambijile amba, Mbena kuya kabiji nkabwela ko muji. Umvwe mwantemwa, inge mwasekela kuba amba mbena kuya kwi Batata, mambo abo bo bankila.” Kwesakana na kino kyepelo, mwakonsha kwamba’mba Yesu wibikile pepi kwi Shanji?

Mata: Waambile’mba Bashanji bamukila. Onkao mambo, wamonanga Shanji amba wakila aye.

Karen: Kya kine. Akimonai Yesu byo aambijile baana banji ba bwanga pa Mateo 28:18. Kino kyepelo kyaamba’mba: “Lesa wampa lūsa lwa kulama bintu byonse bya mwiulu ne bya pano pa ntanda.” Nanchi pano Yesu waambile’mba uji na lūsa lonse nyi?

Mata: Ine, waambile’mba bamupa.

Karen: Pano umvwe Yesu wajinga Lesa bakonsha kumupa byepi lūsa? Kabiji ñanyi wamupa luno lūsa?

Mata: Nsakulangulukishapo pa kino.

Waambilenga ne Bañanyi?

Karen: Kuji kintu kikwabo kyakonsha kwitukumisha bingi umvwe Yesu kya kine wajinga Lesa.

Mata: Ñanyi kintu kyonkakyo?

Karen: Ke kyokya kyo tutanga pa lubatizhilo lwa kwa Yesu. Akimonai jishimikila janembwa mu Luka 3:21, 22. Mwane batange bino byepelo.

Mata: “Bantu bonse byo baishile na kubatizhiwa, Yesu naye wabatizhiwe. Kabiji byo alombelenga, jiulu jashinkukile, ne mupashi wazhila waishile pe aye mu bunkunda ne jiwi jafumine mwiulu amba: ‘Obewa wi Mwanami ye natemwa; mo namwena lusekelo.’”

Karen: Mwamona byaubile Yesu kimye kyo abatizhiwenga nyi?

Mata: Ee, Walombelenga.

Karen: Kya kine. Pano kampe twakonsha kwishikisha’mba, ‘Inge kya kuba Yesu Lesa, walombelenga kwi ñanyi?’

Mata: Mwaipuzha bingi bulongo. Nkepuzha ba pashita.

Karen: Kabiji twafwainwa ne kulanguluka pa kino, monai kuba’mba kimye Yesu kyo bamutumpwile mu mema, kuji waambile mwiulu. Mwayuka byo aambile nyi?

Mata: Waambile’mba Yesu Mwananji, ye atemwa kabiji moamwena lusekelo.

Karen: Pano inge kya kuba Yesu wajinga Lesa, ñanyi waambilenga mwiulu?

Mata: Kechi nakilangulukapo bino ne.

Mambo ka Bulunda bwa kwa Lesa ne Yesu kyo Bebwesakenya ku bwa “Mwana” ne “Shanji”?

Karen: Twayai twisambe pa kishinka kikwabo. Twatanga kuba’mba Yesu waambile pe Lesa amba Shanji wa mwiulu. Kabiji kimye kyo a batizhiwe, jiwi jafumine mwiulu jaambilenga pe Yesu amba Mwananji. Kabiji mwine waambile’mba wajinga Mwana Lesa. Pano fwanyikizhai kuba’mba mubena kukeba kumfunjisha pa bantu babiji baesakana, bañanyi mu kisemi bo mwakonsha kwambapo pa kuba’mba kishinka kyumvwanyike bulongo?

Mata: Nakonsha kwamba pa bankasa ne kolo.

Karen: Kya kine, kampe mwakonsha ne kwamba pa mapasa. Pano Yesu waambile pe Lesa amba Shanji kabiji pe aye mwine waambile’mba Mwana. Mwalanguluka’mba Yesu waambilenga pa ka?

Mata: Naumvwa mo mwatazha. Yesu walumbulwilenga’mba umo pa bano mukulumpe kabiji uji na bulume kukila mukwabo.

Karen: Kya kine. Kabiji akilangulukai pa kwesakana kwa mapasa o twajikwambapo. Umvwe Yesu wajinga Lesa, byo aji Mufunjishi Wayukisha, nanchi inge kechi walangulukile pa kino nenyi?

Mata: Inge walangulukilepo.

Karen: Mu kifulo kya kuba byobyo, waingijishe byambo bya kuba’mba “Shanji” ne “Mwana” kulumbulula bulunda bujipo.

Mata: Mwalumbulula bingi bulongo.

Baana ba Bwanga Batanshi ba kwa Yesu Baambilepo’mba Ka?

Karen: Umvwe muji na kimye, nakonsha kutemwa kwisamba nenu kishinka kikwabo, saka nkyangye kuya.

Mata: Kijitu bulongo.

Karen: Umvwe Yesu kya kine wajinga Lesa, nanchi mwalanguluka’mba baana banji ba bwanga inge kechi baambilepo nenyi?

Mata: Inge baambile.

Karen: Mu Binembelo, kafwako nangwa pamo potutanga amba bafunjishenga bino ne. Pano akyumvwai byanembele Paulo, mutumwa wa kwa Yesu. Pa Filipai 2:9, walumbulwile byaubile Lesa panyuma ya lufu ne lusanguko lwa kwa Yesu amba: “Lesa kyo kyo amupela kifulo kikatampe ne jizhina jakila mazhina onse.” Kwesakana na byaamba kino kyepelo, Lesa wapele Yesu ñanyi kintu?

Mata: Kyaamba’mba Lesa wamupele kifulo kikatampe.

Karen: Inge kya kuba Yesu wajinga Lesa saka akyangye kufwa kabiji palutwe kacheche bamupa kifulo kikatampe, nanchi kino inge kechi kyalengejile Yesu kunemekwa kukila Lesa nenyi? Kafwako wakila Lesa ne.

Mata: Kechi kyakonsheshe kubiwa ne.

Karen: Kwesakana na bino bishinka byonse byo twaambapo, nanchi mwakonsha kwamba’mba Baibolo ufunjisha’mba Yesu Lesa nyi?

Mata: Ine, kechi byobyo yaamba ne. Baibolo waamba’mba, Yesu Mwana Lesa.

Karen: Kya kine. Bakamonyi ba kwa Yehoba bamunemeka bingi Yesu. Twaitabila kuba’mba lufu lwanji byo aji Mesiasa walayiwe lwashinkwijile bantu bakishinka jishinda ja kupulukilamo.

Mata: Ne amiwatu byobyo naitabila.

Karen: Kampe mwakonsha kuba ke mwishikishe’mba, ‘Pano twakonsha kumwesha byepi kwi Yesu amba tusanta pa byo etufwijile?’a

Mata: Kyo kyo mbena kulangulukapo.

Karen: Kampe nakonsha kubwela jibiji na kwisamba nenu pa mikumbu ya mu Baibolo. Mukekala pa nzubo mulungu wiya nyi?

Mata: Ee mwane nkekala ponka.

Karen: Kyawama nanchi tukamonañana mulungu wiya.

[Tubyambo twa mushi]