Nanchi kyaijilemo Davida kuketekela’mba Lesa wamuta muchima nyi? Nanchi Lesa wimuta muchima nyi? Bantu bavula kibakatazha bingi kuketekela kuba’mba Lesa wa bulume bonse wibata muchima. Mambo ka?

Kintu kimo kilengela ke kya kuba’mba, Lesa uji na bulume bwakila bwa bantu bonse. Umona mikoka ya bantu “nobe mundondo umo wa mema wayengelela ku mulondo, kabiji wiitala nobe tulukungu tuji pa shikelu.” (Isaya 40:15) Nembi umo naye uzhinauka wanembele’mba, “kuji Lesa wata bingi muchima ku byuba bantu.”

Bino bantu bakwabo balanguluka kuba’mba byubilo byabo byo byalengela Lesa kubula kwibata muchima. Ba Jim bazhingilanga bukiji baambile’mba: “Nalombanga kwikala mu mutende ne kwilama, bino nakankalwanga. Kyapeleleko, napwishishetu mu muchima namba ne ndengamambo, ne kuba’mba Lesa kechi wakonsha kukwasha ne.”

Nanchi Lesa uji kwalepa na bantu kya kuba wakankalwa ne kumona byo babena kupitamo nyi? Umona byepi bano bantu bandengamambo? Kwa kubula maana Lesa o etupa, kafwako muntu wakonsha kwambilako Lesa ne kukumbula ano mepuzho ne. Nangwa byonkabyo, mambo a Lesa Baibolo etubula’mba wanemeka bingi bantu kabiji kechi uji kwalepa ne abo ne. Baibolo waamba’mba: “Kechi uji kwalepa ne atweba ne.” (Byubilo 17:27) Mu mitwe ina yalondelapo, yamba pa bitubula Lesa kuba’mba wituta muchima ne byo amwesha bino.

ENE MAMBO BAMO O BAZHINAUKILA: Kwesakana na kupesapesa kwa katataka, batana’mba mu mwela umo wanshansha muji mapulaneti 100 bilyonyi. Na mambo a kumona jiulu byo jabaya, bantu bavula bepuzha’mba: ‘Mambo ka Mulenga wa bulume bonse kyo atela muchima bantu baji pa ka pulaneti kacheche?’

BIFUNJISHA MAMBO A LESA: Lesa kechi witupatu Baibolo ne, bino wituta bingi ne muchima. Yehoba witulaya’mba: ‘Nkakubulanga maana ne jiso jami saka jikutala.’—Salamo 32:8.

Akilangulukai pe Hegala, mwanamukazhi mwina Ijipita wajingako mu myaka kitota kitanshi Yesu saka akyangye kwiya pano pa ntanda. Hegala kechi wanemekele nkambo yanji Selai ne, onkao mambo Selai wamuyanjishenga, kabiji Hegala wanyemejile mu kiselebwa. Hegala byo alubankenye, nanchi Lesa walekele kumuta muchima nyi? Baibolo waamba’mba: “Malaika wa Yehoba wamutaine.” Malaika waambijile Hegala amba: “Yehoba waumvwa kumanama kobe.” Kepo Hegala aambijile Yehoba amba: “Anweba mwi Lesa wimwesha ku bantu.”—Ntendekelo 16:4-13.

“Lesa wimwesha ku bantu” wimumona ne anweba. Nsemi wa mukazhi uta bingi muchima mwananji ukiji mwanyike, mambo baana inge bakiji bacheche bakeba bingi kwibata muchima ku bansemi babo. Kyo kimotu, ne atweba Lesa wituta muchima kikatakata inge ketumaname ne kupelelwa. Yehoba waamba’mba: “Amiwa ngikala mwiulu mwine mwazhila, bino ngikala ne na boba bo bamanyika ne baji na bulanda.”—Isaya 57:15.

Nangwa byonkabyo, kimye kimo mwakonsha kwiipuzha’mba: ‘Nanchi Lesa wanta muchima nyi? Nanchi unchibila mambo kwesakana na mwekelo yami nyi? Inyi wangyuka bulongo byonji?’

ENE MAMBO BAMO O BAZHINAUKILA: Bantu bavula balanguluka’mba Lesa umona bantu amba bandengamambo—kechi bazhila kya kuba wibata muchima ne. Abino byo byalangulukanga ne ba Kendra bezhachishanga bingi, na mambo a kuyuka kuba’mba kechi bafikizha byonse byamba mizhilo ya Lesa ne. Kyafuminemo, baambile’mba, “Nekilekele kulomba.”

BIFUNJISHA MAMBO A LESA: Yehoba kechi utalatu pa bumbulwa kulumbuluka bwenu ne, kabiji wayuka byo muji. Baibolo waamba’mba “Mambo aye wayuka mibiji yetu byo iji, uvuluka’mba, bo ba lukungu.” Kyakilapo kuwama ke kya kuba’mba, kechi witubila monka “mwafwainwa mambo etu ne,” bino na mambo a lusa lwanji witulekelako mambo inge twalapila.—Salamo 103:10, 14.

Akilangulukai pe Davida, mfumu wa bena Isalela watongolwa mu mutwe mutanshi pa ino mitwe yalondankana. Pa kulomba kwi Lesa, Davida waambile’mba: “Meso enu amwenejile jimo mubiji wami saka akyangye kulengwa, ne byonse bya mubiji wami byanembejilwe jimo mu buku wenu . . . Muntaletale, anweba Lesa, muyuke muchima wami.” (Salamo 139:16, 23) Davida bamulekejileko mambo akatampe o alengele, mambo Yehoba wamwene mu muchima wanji kuba’mba walapila.

Yehoba wimuyuka bulongo kukila bimuyuka bantu. Baibolo waamba’mba: “Muntu utalatu pangye ya muntu, pakuba aye Yehoba utala mu muchima.” (1 Samwela 16:7) Lesa wayuka ene mambo o mubila bintu bimo, wayuka miteeto yo mwaswana ku bansemi benu, nkomeno yenu, mpunzha ko mwikala, ne byubilo byenu, bino byonse bimulengela kwikala byo muji. Umona bino ne kwimunemeka inge ke mwibikeko kwikala bantu bawama, nangwa kya kuba mulubankanya pa bimye bimo.

Lesa wingijisha byepi maana anji ‘kwimuyuka byo muji’ pa kuba’mba emutekeneshe?

ENE MAMBO BAMO O BAZHINAUKILA: Bamo balanguluka’mba kechi kyailamo kulomba Lesa kwi bakwasha kimye kyo baji mu makatazho ne. Ba Raquel baambile’mba: “Inge na languluka pa makatazho abena kupitamo bantu mu ntanda, mona kuba’mba makatazho ami akepa kya kuba kechi nakonsha ne kulomba kwi Lesa kunkwasha ne.”

BIFUNJISHA MAMBO A LESA: Lesa wayuka jishinda jawama ja kukwashishamo ne kutekenesheshamo bantu. Atweba bonse twaswana bundengamambo bwitulengela kubula kuba byonse bikeba Lesa. Pano bino, Lesa “witutemenwe ne kutuma Mwananji [Yesu Kilishitu] kwikala kitapisho kya kufuta mambo etu.” (1 Yoano 4:10) Kupichila mu kitapisho kya lufu lwa kwa Yesu, Lesa witulekela mambo etu, witulengela kwikala na jiwi ja muchima jawama ne kwikala na luketekelo lwa kwikala na bumi bwa myaka ne myaka mu ntanda mukekala mutende.a Nanchi kino kitapisho wikipainetu ku bantu bonse nyi, inyi kimwesha ne Lesa byo emuta muchima pa muntu pa muntu nyi?

Akilangulukai pa mutumwa Paulo. Kitapisho kya kwa Yesu kyamulengejile kunemba’mba: “Mbena kwikala na mambo a kwitabila mu Mwana Lesa, aye wantemenwe kabiji wipaine mwine na mambo a amiwa.” (Ngalatiya 2:20) Kya kine, Yesu wafwile Paulo saka akyangye kwikala mwina Kilishitu. Nangwa byonkabyo, Paulo wamonanga kino kitapisho kuba’mba bupe bo bamupa bwafuma kwi Lesa.

Lufu lwa kwa Yesu lwa bukitapisho ke bupe Lesa bo emupa ne anweba. Buno bupe bumwesha byo mwanema kwi Lesa. Kino kyakonsha ‘kwimutekenesha kikupu ne kwimupa luketekelo lwawama,’ kabiji kyakonsha “kwimukosesha mu mingilo yonse yawama ne mu byambo byonse byawama.”—2 Tesalonika 2:16, 17.

Papita ne myaka 2,000 kufuma kimye Yesu kyo apaine bumi bwanji kwikala kitapisho. Ñanyi bishinka bimwesha kuba’mba Lesa ukeba’mba mwikale balunda nanji ano moba?

ENE MAMBO BAMO O BAZHINAUKILA: Bavula baitabila mwi Lesa bamona kuba’mba uji kwalepa ne abo. Ba Christina bayanga ku chechi kimye kyonse bekala mu kyalo kya Ireland baambile’mba: “Nayukatu namba kuji Lesa walenga bintu byonse, bino kechi na muyuka ne. Kafwakotu nangwa juba jimo jo ñumvwa’mba nji kwipi ne aye ne.”

BIFUNJISHA MAMBO A LESA: Yehoba kimye kyonse witukwasha inge twapelelwa. Yesu walumbulwile Lesa byo etukwasha byo ambile’mba: “Umvwe muntu uji na mikooko kitota kimo bino paeleka umo, nanchi kechi ukasha aya makumi atanu na ana ne itanu na ina pa mutumba, ne kuya na kukeba yewa waeleka nenyi?” Tufunjilako ka ku kino? “Ne Batata ba mwiulu kechi bakeba nangwa umotu wa mu bano bantu baji nobe baana babacheche konaika ne.”—Mateo 18:12-14.

Yense wa mu “bano bantu baji nobe baana babacheche ” wanema bingi kwi Lesa. Lesa ‘ukeba byepi baeleka’? Kwesakana na kinembelo kiji kuntatwilo ya kino kibaba, Yehoba ukokela bantu ko aji.

Akilangulukai Lesa byo aubile pa kuba’mba akoke bantu banji bakishinka. Mu myaka kitota kitanshi, Lesa watumine mwana wa bwanga Filipa kuya na kutana mwina Etiopya ne kwisamba nanji pa bungauzhi bwa mu Baibolo bo atangilenga. (Byubilo 8:26-39) Byo papichile kimye, Lesa watangijile mutumwa Petelo kuya na kupempula mukulumpe wa bashilikale bena Loma wa jizhina ja Koneleusa, walombelenga ne kukebesha kwingijila Lesa. (Byubilo 10:1-48) Kabiji Lesa watangijile mutumwa Paulo ne balunda nanji kuya ku mukola uji pangye ya muzhi wa Filipai. Byo bafikile kuno bataine mwanamukazhi wa jizhina ja Lidiya “wapopwelanga Lesa” kabiji “Yehoba wamushinkwile muchima kuba amba omvwishe.”—Byubilo 16:9-15.

Mu bino bintu byonse, Yehoba wamwene kuba’mba bonse bakebelenga kumuyuka, bamuyuke. Bañanyi lelo jino baya ku mazubo a bantu ne ku mapunzha kutanwa bantu na kwisamba nabo byambo bya mu Baibolo byaamba pe Lesa? Bavula bakumbula’mba, “Bakamonyi ba kwa Yehoba.” Iipuzhai amba, ‘Nanchi Lesa ubena kwingijisha bano bantu kuba’mba bankwashe nyi?’ Tubena kwimutundaika kulombanga kwi Lesa kuba’mba emukwashe kufwenya kwipi ne aye.a