LUFUNJISHO 32
Bufumu bwa Lesa Bubena Kulama!
Bufumu bwa Lesa bwatendekele kulama mwiulu mu mwaka wa 1914. Mu uno mwaka mo mwatendekejile ne moba a kupelako a bukalama bwa bantu. Twayuka byepi kino? Tusakwisamba pa bintu byaambijilepo jimo Baibolo ne bintu bibena kumweka mu ntanda lelo jino ne byubilo bya bantu byo biji kufumatu mu mwaka wa 1914 kufika luno.
1. Ñanyi bintu Baibolo byo aambijilepo kala jimo?
Mu buku wa Danyela, tutangamo kuba’mba Bufumu bwa Lesa bwatendekele kulama ku mpelo ya moba atongolwa’mba “bimye bitanu na bibiji.” (Danyela 4:16, 17) Kabiji palutwe kacheche, Yesu waambilepo pa kyonkakye kimye amba “bimye byatongolwa bya bisaka bya bantu.” Yesu wafunjishe ne kuba’mba akye kimye kechi kyapita kala ne. (Luka 21:24) Byonkatu byo tusakufunda mu uno mutwe, bimye bitanu na bibiji byapwile mu mwaka wa 1914.
2. Ñanyi bintu ne byubilo bya bantu bibena kumweka mu ntanda kufumatu mu mwaka wa 1914?
Baana ba bwanga ba kwa Yesu bamwipwizhe’mba: “Kiyukilo kya kwikalapo kwenu ne kya mpelo ya buno bwikalo kyo kyepi?” (Mateo 24:3) Pa kwibakumbula, Yesu waambile pa bintu byavula bingi bikamweka inge waikala Mfumu mwiulu mu Bufumu bwa Lesa. Bintu bimo byo aambilepo ke makondo, bipowe bya nzala ne bitentanshi. (Tangai Mateo 24:7.) Kabiji Baibolo waambijile jimo ne pa byubilo bya bantu mu “moba a kupelako” amba bikekala “byakatazha” bingi. (2 Timoti 3:1-5) Abino bintu ne byubilo byatama bibena kumwesha bantu, byatendekele mu mwaka wa 1914.
3. Mambo ka bintu pano pa ntanda o byatamina bibye kufumatu patendekejile kulama Bufumu bwa Lesa?
Aku Yesu wikalatu Mfumu mu Bufumu bwa Lesa, walwile ne Satana mwiulu ne bandemona banji. Satana bamushinjile. Baibolo waamba’mba: “Bamutayile pa ntanda ne bamalaika banji bebatayile pamo nanji.” (Lumwekesho 12:9, 10, 12) Kabiji Satana wazhingila bingi mambo wayuka’mba washalatu na kakimye kacheche kuba’mba bamonaune. O ene mambo o abena kuletela makatazho apusana pusana ne buyanji pano pa ntanda ponse. Akino kyo kitukwasha kuyuka ene mambo bintu o byatamina bibye! Onkao mambo, Bufumu bwa Lesa bo bonkatu bukapwisha ano makatazho onse pano pa ntanda.
FUNJILAIPO BIKWABO
Monai bishinka bitukwasha kushiinwa’mba Bufumu bwa Lesa bwatendekele kulama mu 1914 ne kuyuka bintu byo twafwainwa kuba.
4. Bungauzhi bwa mu Baibolo ne bintu bibena kumweka mu ntanda byamwesha’mba Bufumu bwa Lesa bubena kulama
Lesa walengejile Mfumu Nebukaneza wa mu Babilona wa kala kulota kiloto kya bintu bikamweka kulutwe. Bintu byo tutanga pa kino kiloto ne Danyela byo ekilumbulwile kimwesha’mba kino kiloto kechi kyaambilengatu pa bukalama bwa kwa Nebukaneza bonkatu ne. Pakuba kyaambilenga ne pa Bufumu bwa Lesa.—Tangai Danyela 4:17.a
Tangai Danyela 4:20-26, ne kwingijisha uno chati kukumbula ano mepuzho:
(A) Ñanyi bintu byamwene Nebukaneza mu kiloto?—Monai kyepelo 20 ne 21.
(B) Ñanyi kintu kyamwekejile kichi?—Monai kyepelo 23.
(C) Ñanyi bintu byamwekele ku mpelo ya “bimye bitanu na bibiji”?—Monai kyepelo 26.
Kiloto Kyaamba pa Kichi byo Kyakwatankana na Bufumu bwa Lesa
BUNGAUZHI (Danyela 4:20-36)
Bukalama
(A) Kichi kikatampe
Bukalama bebuchibikizha
(B) “Tema kichi” poso “pakapite bimye bitanu na bibiji”
Babwezha bukalama
(C) “Bufumu bwenu bukekala bwenu jikwabo”
Kufika kutanshi kwa buno bungauzhi . . .
(D) Ñanyi waimenejilengako kichi?—Monai kyepelo 22.
(E) Bukalama bwanji bebuchibikizhe byepi?—Tangai Danyela 4:29-33.
(F) Ñanyi kintu kyamwekejile Nebukaneza ku mpelo ya “bimye bitanu na bibiji”?—Tangai Danyela 4:34-36.
KUFIKA KUTANSHI KWA BUNO BUNGAUZHI
Bukalama
(D) Nebukaneza ye Mfumu wa Babilona
Bukalama bebuchibikizha
(E) Pa kupwa mwaka wa 606 B.C.E., Nebukaneza wakonyenye kabiji wakankelwe kulama pa Myaka 7
Babwezha bukalama
(F) Bukonye bwa kwa Nebukaneza bwapwa ne kutendeka kulama jikwabo
Kufika kwa bubiji kwa buno bungauzhi . . .
(G) Kichi kyaimenejilengako bañanyi?—Tangai 1 Byambo bya Moba 29:23.
(H) Bukalama bwabo bebuchibikizhe byepi? Twayuka byepi kuba’mba abuno bukalama bebuchibikizhe nangwatu kimye Yesu kyo ajinga pano pa ntanda?—Tangai Luka 21:24.
(I) Ñanyi kimye kabiji kwepi buno bufumu ko bebubwezhezhe?
KUFIKA KWA BUBIJI KWA BUNO BUNGAUZHI
Bukalama
(G) Bamfumu ba bena Isalela baimenangako bukalama bwa Lesa
Bukalama bebuchibikizha
(H) Yelusalema byo bamonawine kafwako mfumu mwina Isalela walaminepo pa myaka 2,520 ne
Babwezha bukalama
(I) Yesu ye Mfumu wa mu Bufumu bwa Lesa bwa mwiulu
Bimye bitanu na bibiji [nangwa’mba myaka] byalepa byepi?
Binembelo bimo bya mu Baibolo bitukwasha kumvwisha binembelo bikwabo biji mu Baibolo. Buku wa Lumwekesho waamba’mba myaka isatu ne kichika ke moba 1,260. (Lumwekesho 12:6, 14) Akino kibena kulumbulula’mba mwaka umo mu bungauzhi bwa mu Baibolo ke moba 360. Ko kuba’mba “myaka itanu na ibiji” ke moba 2,520. Bimye bimo, mu Baibolo kyambo kya kuba’mba “juba” kilumbulula mwaka umo. (Ezikyo 4:6) Onkao mambo, bimye bitanu na bibiji biji mu buku wa Danyela ke myaka, 2,520.
5. Bintu mu ntanda byataminako bingi kufumatu mu mwaka wa 1914
Yesu waambijile jimo bintu bikamwekanga pano pa ntanda inge waikala Mfumu. Tangai Luka 21:9-11, ne kwisamba buno bwipuzho:
Ñanyi bintu byaambapo kino kinembelo byo mwimwena na meso nangwa byo mwaumvwapo kala?
Mutumwa Paulo walumbulwile bantu byo bakekala mu moba a kupelako a bukalama bwa bantu. Tangai 2 Timoti 3:1-5, ne kwisamba buno bwipuzho:
Ñanyi byubilo bimo byo mubena kumona mu bantu lelo jino?
6. Ubainga bintu bimwesha’mba mwaswa’mba Bufumu bwa Lesa bubena kulama
Tangai Mateo 24:3, 14, ne kwisamba ano mepuzho:
Ñanyi mwingilo wanema ye tubena kwingila ubena kumwesha’mba Bufumu bwa Lesa bubena kulama?
Mwakonsha kwingilako byepi uno mwingilo wa kusapwila?
Bufumu bwa Lesa bubena kulama kabiji katatakatu butendeke ne kulama ino ntanda yonse. Tangai Bahebelu 10:24, 25, ne kwisamba buno bwipuzho:
Ñanyi kintu kyo twafwainwa kuba atweba bonse ‘byo tubena kumona aja juba saka jifwenya pepi’?
Inge kya kuba mwafunjilepo bintu bimo byafwainwa kukwasha ne kupulusha bakwenu, mwafwainwa kuba byepi?
INGE BEMWIPUZHA’MBA: “Mambo ka Bakamkonyi ba kwa Yehoba o bambila bingi pa mwaka wa 1914?”
Mwakonsha kukumbula’mba ka?
ÑANYI BISHINKA BYO MWAFUNDA?
Bungauzhi buji mu Baibolo ne bintu bibena kumweka mu ntanda byamweshatu patoka’mba kine Bufumu bwa Lesa bubena kulama. Tumwesha’mba Bufumu bwa Lesa bubena kulama inge ke tusapwile pa buno Bufumu ne kutanwa ku kupwila.
Mepuzho a kupitulukamo
Ñanyi bintu byamwekele ku mpelo ya bimye bitanu na bibiji byonkatu byaambijile jimo kala Baibolo mu buku wa Danyela?
Ñanyi bintu bimulengela kushiinwa’mba Bufumu bwa Lesa bwatendekele kulama mu mwaka wa 1914?
Ñanyi bintu byo mwafwainwa kuba kumwesha’mba Bufumu bwa Lesa bubena kulama?
KEBAI BISHINKA BIKWABO
Monai byaambapo bantu bamo ne bakwabotu pa bintu byo byajinga mu ntanda mu mwaka wa 1914.
Tangai bungauzhi buji pa Mateo 24:14 mumone byo bwakwashishe mwanamulume umo kupimpula byubilo byanji.
“Natemenwe Bingi Mpila ya Baseball Kukila Bintu Byonse” (Kyamba kya Usopa Na. 3 2017)
Twayuka byepi kuba’mba bungauzhi buji pa Danyela kitango 4 bwaambilenga pa Bufumu bwa Lesa?
Ñanyi bishinka byamwesha’mba “bimye bitanu na bibiji” byo batongola pa Danyela kitango 4 byapwile mu mwaka wa 1914?
a Monai bibaaba bibiji byapelako mu kipungu kya kuba’mba Kebai Bishinka Bikwabo mu uno mutwe.