LUFUNJISHO 31
Bufumu bwa Lesa bo bu ka?
Bufumu bwa Lesa ye mutwe mwine mukatampe uji mu Baibolo. Yehoba ukengijisha Bufumu bwanji kufikizha kyaswa muchima wanji ku ino ntanda. Nanchi buno Bufumu bo bu ka? Twayuka byepi amba bwatendeka kala kulama? Ñanyi bintu byo bwaubapo kala? Kabiji ñanyi bintu byo bukooba kulutwe? Ano mepuzho beakumbula mu uno mutwe ne walondelapo.
1. Bufumu bwa Lesa bo bu ka? Kabiji ñanyi Mfumu mu buno Bufumu?
Bufumu bulumbulula kafulumende wanengezha Yehoba Lesa. Mfumu wa buno Bufumu ke Yesu Kilishitu kabiji ukalaminanga mwiulu. (Mateo 4:17; Yoano 18:36) Baibolo waamba pe Yesu amba: “Ukekala Mfumu . . . myaka ne myaka.” (Luka 1:32, 33) Yesu byo aji Mfumu wa mu Bufumu bwa Lesa, ukalamanga bantu bonse bakekala pano pa ntanda.
2. Bañanyi bakalamanga pamo ne Yesu?
Yesu kechi ukalamanga bunke ne. Pakuba ukalamanga pamo na bantu bafuma mu “mikoka yonse ne mu njimi ne mu mitundu ya bantu ne mu bisaka bya bantu . . . bakekala bamfumu ba kulama ntanda.” (Lumwekesho 5:9, 10) Nanchi bantu banga bakalamanga pamo ne Kilishitu? Kufumatu kimye Yesu kyo aishile pano pa ntanda kufika ne lelo jino, bena Kilishitu bavula basalapo kwikala baana banji ba bwanga. Nanchi abano bonse bakalamanga pamo ne aye nyi? Ine mwane. Kanatu ba 144,000 bo bonkatu bakalamanga pamo ne Yesu mwiulu. (Tangai Lumwekesho 14:1-4.) Onkao mambo, bena Kilishitu bonse bashala baji pano pa ntanda bakekala bangikazhi mu buno Bufumu.—Salamo 37:29.
3. Bufumu bwa Lesa bwapusana byepi na makafulumende a bantu?
Nangwa kya kuba bakalama ba bantu bebikako kuba bintu byawama, pano bino kechi baji na bulume bwa kuba bintu byonsetu byo bakeba ne. Kabiji bebafumyapo ne kubikapo bakwabo. Abano bo babikapo kechi bakwasha bantu bo balama ne. Bino Mfumu wa mu Bufumu bwa bwa Lesa aye Yesu, kafwako ukamufumyapo ne. Baibolo waamba’mba Lesa “ukaleta bufumu bo bakabula konauna.” (Danyela 2:44) Yesu ukalamanga ino ntanda yonse kabiji kechi ukekala na misalululo ne. Yesu uji na butemwe, lusa ne kifyele kabiji ukafunjisha bantu kutemwa bakwabo, kwiubila lusa ne kwiubila bintu byawama.—Tangai Isaya 11:9.
FUNJILAIPO BIKWABO
Monai Bufumu bwa Lesa kyo bwawamina kukila makafulumende a bantu.
4. Kafulumende wa Lesa ukalamanga ino ntanda yonse
Yesu Kilishitu uji na bulume bwa kulama bantu bulongo kukila bakalama ba bantu. Tangai Mateo 28:18, ne kwisamba buno bwipuzho:
Bulume bo bapa Yesu bwa kulama bantu bwapusana byepi na bulume buji na bakalama ba bantu?
Makafulumende a bantu javula beapingizhapo na akwabo. Kabiji ye basala ulamatu lubaji lumo lwa kyalo. Pano kiji byepi ku Bufumu bwa Lesa? Tangai Danyela 7:14, ne kwisamba ano mepuzho:
Mambo ka o kyawamina kuba’mba Bufumu bwa Lesa “kechi bakebonauna ne”?
Mambo ka o kyawamina kuba’mba Bufumu bwa Lesa bukalama ntanda yonse?
5. Makafulumende a bantu kechi afwainwa kupwisha makatazho etu ne
Mambo ka Bufumu bwa Lesa o bwafwainwa kufumyapo makafulumende a bantu? Tambai VIDYO, ne kwisamba buno bwipuzho.
Ñanyi bintu byafuma mu bukalama bwa bantu?
Tangai Musapwishi 8:9, ne kwisamba ano mepuzho:
Mwalanguluka’mba kijitu bulongo Bufumu bwa Lesa kufumyapo makafulumende a bantu nyi? Mambo ka o mwakumbwila byobyo?
6. Mu Bufumu bwa Lesa muji bamfumu betuyuka bulongo
Kyawama bingi kuba’mba Mfumu wetu aye Yesu waikelepo muntu kabiji wafwainwa “kwitumvwina lusa pa kubula kukosa kwetu.” (Bahebelu 4:15) Mu ba 144,000 muji banabalume ne banabakazhi bakishinka bakalamanga pamo ne Yesu. Onkao mambo, Yehoba wibasala “kufuma mu mikoka yonse ne mu njimi ne mu mitundu ya bantu ne mu bisaka bya bantu.”—Lumwekesho 5:9.
Nanchi mwatemwa kuyuka’mba Yesu ne bo akalamanga nabo betuyuka bulongo kabiji bayuka makatazho o tubena kupitamo nyi? Mambo ka o mwakumbwila byobyo?
Yehoba wasala banabalume ne banabakazhi bapusana pusana kabiji bapita mu bintu byapusana pusana kulama pamo ne Yesu mwiulu
7. Bufumu bwa Lesa buji na mizhilo yawama bingi kukila mizhilo ya makafulumende a bantu
Makafulumende a bantu alenga mizhilo ya kukwasha ne kuzhikijila bantu. Kabiji Bufumu bwa Lesa nabo buji na mizhilo yafwainwa kukookela bantu. Tangai 1 Kolinda 6:9-11, ne kwisamba ano mepuzho:
Mwalanguluka’mba ntanda yafwainwa kwikala byepi inge kya kuba bantu bonse ke bakookele mizhilo ya Lesa?a
Mwalanguluka’mba kijitu bulongo bantu bakekala mu buno Bufumu kukookela mizhilo ya Yehoba nyi? Mambo ka o mwakumbwila byobyo?
Ñanyi bishinka byamwesha’mba bantu babula kukookela mizhilo ya Lesa bakonsha kupimpula byubilo byabo?—Monai kyepelo 11.
Makafulumende a bantu alenga mizhilo ya kukwasha ne kuzhikijila bantu. Pakuba Bufumu bwa Lesa buji na mizhilo yawamisha ya kukwasha ne kuzhikijila bantu
INGE BEMWIPUZHA’MBA: “Bufumu bwa Lesa bo bu ka?”
Mwakonsha kwibakumbula’mba ka?
ÑANYI BISHINKA BYO MWAFUNDA?
Bufumu bwa Lesa ke kafulumende wa kine uji mwiulu kabiji ukalamanga ino ntanda yonse.
Mepuzho a kupitulukamo
Bañanyi bakekala bakalama mu Bufumu bwa Lesa?
Mambo ka Bufumu bwa Lesa kyo bwawamina kukila makafulumende onse a bantu?
Ñanyi bintu bimo Yehoba byo akeba bangikazhi ba mu Bufumu bwanji kuba?
KEBAI BISHINKA BIKWABO
Monai byafunjishe Yesu kuji Bufumu bwa Lesa.
“Nanchi Bufumu bwa Lesa Buji mu Muchima Wenu Nyi?” (Kibaaba kiji pa jw.org)
Mambo ka Bakamonyi ba kwa Yehoba o bakookela bingi Bufumu bwa Lesa kukila makafulumende a bantu?
Monai byaamba Baibolo pa ba 144,000 Yehoba bo asala kulama pamo ne Yesu.
Ñanyi kintu kyalengejile mwanamukazhi umo wajinga mu kaleya kuswa’mba Lesa ye yenkatu ukawamisha bintu pano pa ntanda?
“Kyandengejile Kuyuka’mba Bubi Bukapwa” (Labainga!, November 2011)