Kitango 24

Kafwako Kyakonsha “Kwitwabanya na Butemwe bwa Lesa” Ne

1. Ñanyi milanguluko yabula kufwainwa ikatazha bantu bavula kuvwangakotu ne bena Kilishitu bakine?

NANCHI Yehoba Lesa wimutemwa anweba pa bunke bwenu nyi? Bamo betabizha’mba Lesa watemwa bantu bonse byonka byaamba Yoano 3:16. Pano bino, balanguluka’mba: ‘Lesa kuba wantemwa amiwa pa bunke bwami ne.’ Nangwatu bena Kilishitu bakine, bimye bimo bazhinauka pa kino. Na mambo a kulefulwa, mwanamulume umo waambile’mba: “Nkishupa bingi kuswa’mba Lesa wantemwa.” Nanchi ndangulukilo ya uno mutundu yo yo mwikalapo nayo kimye kimo nyi?

2, 3. Ñanyi ukeba atweba kwitabila’mba kechi twanema ne kwitutemwa ku meso a Yehoba ne, kabiji twakosha kushinda byepi ino ndangulukilo?

² Satana ukebesha bingi atweba kwitabila’mba Yehoba Lesa kechi witutemwa nangwa kwitunemeka ne. Kya kine, Satana javula ujimbaika bantu kupichila mu kwibalengela kwikala ba kwilundumika ne kwitota. (2 Kolinda 11:3) Pano bino, usekela ne mu kulengela bantu bezhinauka kulanguluka’mba kechi banema ne. (Yoano 7:47-49; 8:13, 44) Akino byo byo kiji kikatakata mu bino bimye byakatazha bya ‘moba apelako.’ Bavula lelo jino bakomena mu bisemi mwabula “muchima wa bumuntu.” Bakwabo nabo kimye kyonse monka bamonañena na bantu bashinta, betemwa abo bene, ne na balupata lwa kuba bibi. (2 Timoti 3:1-5) Kupita mu luyanjisho ne mu misalululo ya bikoba nangwa kupatwa pa myaka yavula kyamweka kwalengela bantu ba uno mutundu kusumininwa’mba kechi banema ne, kabiji kafwako wakonsha kwibatemwa ne.

³ Umvwe mwamona’mba milanguluko yabula kufwainwa ya uno mutundu muji nayo, kange mulukushe muchima ne. Atweba bavula twatemwa bingi kwizhachisha atweba bene pa kimye pa kimye. Bino vulukai kuba’mba, Mambo a Lesa anengezhiwa ‘kolola bintu’ ne “kukundula masakwa akosa.” (2 Timoti 3:16; 2 Kolinda 10:4) Baibolo wamba’mba: ‘Tukakosesha michima yetu ku meso anji monse monse mo ituzhachisha michima yetu, mambo Lesa ye wakila michima yetu, ne kuyuka wayuka byonse.’ (1 Yoano 3:19, 20) Twayai twisambe mashinda ana Binembelo mo bitukwashisha “kwikosesha michima yetu” pa mambo a butemwe bwa Yehoba.

Yehoba Wimunemeka

4, 5. Kya kumwenako kyaambile Yesu kya bwalula kimwesha byepi amba twanema ku meso a Yehoba?

⁴ Kitanshi, Baibolo ufunjisha’mba Lesa umona bakalume banji bonse kwikala banema. Kya kumwenako, Yesu waambile amba: “Nanchi tuñonyi [tubwalula, NW] tubiji ke bapota na kangwee kamo nenyi? kabiji nangwa kamo kakapona panshi pabula kwitaba Shenu ne: kabiji nangwa nsuki yenu ya ku mitwe, yonse beibala. Byonkabyo kechi muchine ne: mambo mwibakila bañonyi [bwalula] bavula mu kunema.” (Mateo 10:29-31) Akilangulukai bino byambo mo byatajile ku banteleki ba kwa Yesu ba mu myaka kitota kitanshi.

⁵ Twakonsha kuzhinauka kine kintu muntu kyo akonsha kupotela kabwalula. Mu moba a Yesu, kabwalula ko kajinga manyi akepeshe bingi mutengo pa bañonyi bonse. Monai kuba’mba na kangwee kamo, muntu wapotanga tubwalula tubiji. Bino Yesu wanungilepo jikwabo amba umvwe muntu waiya na tubangwee tubiji, kechi wapotanga tubwalula tuna ne, wapotanga tutanu. Kañonyi kamo kabikwangapo kwikala mpasela uba nobe kafwapo ne byo kaji ne. Kampe bino bilengwa kechi byanemene ku meso a bantu ne, pano nga Mulenga wibimonanga byepi? Yesu waambile amba: “Mwi ato [kubikapotu ne koka ka mpasela] ka muji kamo kalubikwa ku meso a Lesa ne.” (Luka 12:6, 7) Pano twakonsha kutendeka kumvwisha kishinka kya kwa Yesu. Inge kya kuba Yehoba wikanemeka kabwalula kamo, ko kuba’mba nanchi muntu wakijishamo kunema! Byonka byo alumbulwile Yesu, Yehoba wayuka byonse pe atweba. Mambo ne nsuki ya ku mitwe yetu yabalwa!

6. Mambo ka o twasumininwa’mba Yesu wayukile kyo aambilengapo byo aambilenga pa nsuki ya ku mitwe yetu amba yabalwa?

⁶ Nsuki yetu kubalwa? Bamo bakonsha kulanguluka’mba Yesu wanungilengakotu ne bubela papo. Nangwa byonkabyo, akilangulukaipotu pa luketekelo lwa lusanguko. Yehoba byo afwainwa kwituyukisha pa kuba’mba aketulenge jikwabo! Witunemeka bingi kya kuba uvuluka tuntu tonse pe atweba, kubikapo ne ndengelo ya mubiji wetu ne bintu byonse byo twimwena na meso ne byo twapitamo pa myaka yavula.a Kubala nsuki yetu ke mwingilo wapela bingi kwi aye umvwe twamwesakanya ku mingilo ikwabo mambo mitwe ya bantu bavula imenatu nsuki yafika ku 100,000.

Ki ka Yehoba kyo Anemeka mwi Atweba?

7, 8. (a) Ñanyi byubilo bimo bimusekesha Yehoba pa kwibitana kimye kyo akebakeba mu michima ya bantu? (b) Ñanyi mingilo imo yo tuba Yehoba yo anemeka?

⁷ Kya bubiji, Baibolo witufunjisha kintu Yehoba kyo anemeka mu bakalume banji. Kwambatu byo kiji, usekela mu byubilo byetu byawama kabiji ne kwingila na ngovu ko tuba. Mfumu Davida wabujile mwananji Solomone amba: “Yehoba ukebakeba mu michima ya bonse ne kuyuka byonse byo bafuukula ne kulanguluka.” (1 Byambo bya Moba 28:9) Lesa byo akebakeba mu michima yavula ya kifwanyikizho ya bantu mu ino ntanda mwavula bukapondo ne lupato, usekela bingi umvwe watana muchima watemwa mutende, bukine, ne bololoke! Ki ka kyubiwa inge Lesa watana muchima wayula butemwe bwa kumutemwa, ukeba kufunda pe aye ne kubulako bakwabo byo abena kufunda? Yehoba witubula’mba umona aba bonse babulako bakwabo pe aye. Uji ne na “buku wa kwibavulukilako” aba ‘bamwakamwa Yehoba ne kulanguluka jizhina janji.’ (Malakai 3:16) Byubilo bya uno mutundu byanema bingi kwi aye.

⁸ Ñanyi mingilo imo yawama Yehoba yo anemeka? Kwibikishako kwetu kwa kulonda Mwananji Yesu Kilishitu. (1 Petelo 2:21) Mwingilo umo wanema Lesa ye anemeka bingi ke wa kusampanya mambo awama a Bufumu bwanji. Mu Loma 10:15, tutangamo amba: “Byo auba buya aa maulu a boba baleta mambo a lusekelo a bintu byawama.” Kampepo kuba twalanguluka’mba maulu etu onkae auba “buya” ne. Pano bino, apano abena kwimenako kwingila na ngovu kwa bantu ba Yehoba ko boba kwa kusapwila mambo awama. Kwingila kwa uno mutundu ke kwa buya kabiji kwanema bingi ku meso anji.—Mateo 24:14; 28:19, 20.

9, 10. (a) Mambo ka o twafwainwa kusumininwa’mba Yehoba unemeka kuchinchika kwetu kimye kyo tubena kupita mu makatazho apusana pusana? (b) Ñanyi mulanguluko watama Yehoba ye abula kulangulukila bakalume banji bakishinka?

⁹ Kabiji Yehoba unemeka ne kuchinchika kwetu. (Mateo 24:13) Vulukai kuba’mba, Satana ukeba anweba kumuvundamina Yehoba. Juba ne juba jo mwikala bakishinka kwi Yehoba mumwesha kuba’mba myendeleko ya kwa Satana ya bubela. (Byambo bya Mana 27:11) Bimye bimo kechi kyapela kuchinchika ne. Kubelabela, lukatazho lwa mali, kukatazhiwa mu milanguluko, ne bintutu bikwabo byakonsha kulengela moba onse kwikala akatazha bingi. Kabiji kubula kufikizhiwa kwa kintu kyaketekelwa nako kwakonsha kulefula bingi. (Byambo bya Mana 13:12) Kuchinchika mu bimye bya uno mutundu kwanema bingi kwi Yehoba. O ene mambo Mfumu Davida o aambijile Yehoba kulonga mipolo yanji mu “mutumwa,” kabiji ne kunungapo na kusumininwa amba: “Kechi iji mu buku wenu nenyi?” (Masalamo 56:8) Ee, Yehoba unemeka bingi kabiji ne kuvuluka mipolo yetu yonse ne buyanji bo tuchinchika aku saka tulama bukishinka bwetu kwi aye. Ino mipolo ne buyanji nabyo byanema bingi ku meso anji.

¹⁰ Nangwa byonkabyo, muchima wetu watemwa kwituzhachisha, wakonsha kukana bino biyukilo bya byo twanema ku meso a Lesa. Wakonsha kukosako na kwitunongotwela’mba: ‘Bino kuji bakwetu bavula bingi boba bulongo kunkila amiwa. Byo kimufitapo Yehoba ku muchima umvwe wangesakanya kwi abo!’ Yehoba kechi wesakanya ne; kabiji kechi wakanama nangwa kushinta mu ndangulukilo yanji ne. (Ngalatiya 6:4) Yehoba umona bulongo mu michima yetu, kabiji unemeka bingi kintu kyawama kyo atanamo nangwatu kikepe mutundu ka.

Yehoba Wabanya Kyawama ku Kyatama

11. Ki ka kyo twafwainwa kufunda pe Yehoba byo aubile na Abiya?

¹¹ Kya busatu, Yehoba pa kukebakeba mwi atweba, wabanya bulongo sa akebako byawama. Kya kumwenako, kimye Yehoba kyo aambile’mba bamfumu bonse basendukile mu lwitabilo ba mu kisaka kya Mfumu Yeloboma bepaiwe, wakambizhe’mba mwana umo wa uno mfumu, aye Abiya akazhikwe mu kilende. Mambo ka? Mambo “ye yenka amonamo kintu kyamutokesha ku muchima wa Yehoba, Lesa wa Isalela.” (1 Bamfumu 14:1, 10-13) Ko kuba’mba Yehoba wakebelekebele mu muchima wa yewa nsongwalume ne kutanamo ‘kintu kyawama.’ Kikale kino kintu kyawama kyo atainemo kyajinga kicheche byepi, Yehoba wikimwene’mba kyafwainwa kunembwa mu Mambo anji. Wikinemekele kupichila mu kumwesha lusa lwafwainwe yewa wa mu kyokya kisemi kyasendukile mu lwitabilo.

12, 13. (a) Nga kya kumwenako kya Mfumu Yehoshafwata kimwesha byepi amba Yehoba umonamo byawama mwi atweba nangwa twalenga mambo? (b) Pa mambo a mingilo ne byubilo byetu byawama, Yehoba wingila byepi nobe Nsemi wa butemwe?

¹² Kya kumwenako kyakilamo kumvwanyikisha kyakonsha kutanwa mwi Mfumu wawama aye Yehoshafwata. Kimye uno mfumu kyo aubile kintu kyabula kufwainwa, ngauzhi wa Yehoba wamwambile’mba: “Bukaji bwafuma kwi Yehoba buji pe anweba.” Byo byajingapo byambo bileta kijikila! Bino byambo bya Yehoba kechi byapelejiletu ponkapa ne. Byatwajijile amba: “Nangwa byonkabyo, byawama bimo bebimona mwi anweba.” (2 Byambo bya Moba 19:1-3) Onkao mambo, bukaji bwa Yehoba bwa bololoke kechi bwamulengejile kukankalwa kumona byawama mwi Yehoshafwata ne. Byo apusanapo na bantu bambulwakoloka! Umvwe bakwetu betuzhingijisha, twakonsha kukankalwa kumona byawama mwi abo. Kabiji umvwe twalenga mambo, kufichiwa ku muchima, bumvu kabiji ne kuzhatwa ko twiumvwa, kwakonsha kwitulengela kukankalwa kumona byawama biji mwi atwe bene. Bino nangwa byonkabyo, vulukai kuba’mba umvwe twalapila ku mambo etu ne kwingijisha na ngovu yonse kubula kubwezhapo, Yehoba witulekelako mambo.

¹³ Yehoba pa kukebakeba mwi atweba, ufumyamo bubi bwa yenkao mutundu, byonka muntu ukeba mabwe byo a kukula balashi ku ngolode. Pano ibyepi pa byubilo byenu byawama ne mingilo? Abino byo bya “buneme” byo asunga! Abya mwakimonapo kala bansemi byo batemwa kusunga bipikichala bilenga baana babo nangwa mabuku o banembamo ku sukulu, bimye bimo papita ne myaka yavula panyuma ya kuba baana babo balubamo ne kulubamo nyi? Yehoba ke Nsemi watemwa bingi baana banji. Kikulutu twatwajijila bakishinka kwi aye, kechi ulubamo mingilo ne byubilo byetu byawama ne. Wakonsha kwikimona’mba bumbulwakoloka umvwe wibilubamo, pano bino aye kechi mbulwakoloka ne. (Bahebelu 6:10) Kabiji ukebakeba mwi atweba ne mu jishinda jikwabo.

14, 15. (a) Mambo ka bumbulwakoloka bwetu o bubujila kulengela Yehoba kukankalwa kumona byawama mwi atweba? Ambai kya kumwenako. (b) Yehoba ukobapo ka pa bintu byawama byo atana mwi atweba, kabiji bantu banji bakishinka wibamona byepi?

¹⁴ Yehoba kechi utesha muchima pa bumbulwakoloka bwetu ne, umonako buwame bwetu. Kya kumwenako: Bantu batemwa bya kulenga lenga bakonsha kwingila bingi na ngovu kuwamisha kipikichala kyaonaika bingi nangwatu mingilo ikwabo. Kya kumwenako, mu National Gallery mu London, England, muntu wajinga na buta bwa kifwefwe byo aonawine kipikichala kya Leonardo da Vinci kifwa mali a madola 30 milyonyi, kafwako waambilepo’mba bekitaye mambo kyaonaika ne. Mwingilo wa kuwamisha kino kipikichala kya buya kyaikele myaka pepi nobe 500 watendekele ponkapotu. Mambo ka? Mambo kyanemene bingi mu meso a bantu batemwa kulenga bipikichala. Nanchi anweba kechi mwanema kukila kyokya kipikichila kyo balenga na mashanga ne na machoko nenyi? Ku meso a Lesa mwanema bingi, nangwa kya kuba mwaonaunwa byepi nangwa byepi na bundengamambo bo mwaswana. (Masalamo 72:12-14) Yehoba Lesa, Mulenga wayukisha bantu, ukoba byonse bibena kukebewa kubiwa kubwezha ku bulumbuluke bonse babena kukokela kulama kwanji kwa butemwe.—Byubilo 3:21; Loma 8:20-22.

¹⁵ Ee, Yehoba umona byawama mwi atweba byo twakonsha kubula kumona atwe bene. Kabiji byo tubena kumwingijila, ukalengela akya kyawama kukoma kufikilatu ne kimye kyo tukalumbuluka. Nangwatu ntanda ya kwa Satana itube byepi nangwa byepi, Yehoba unemeka bingi bakalume banji nobe bya buneme.—Hagai 2:7.

Yehoba Umwesha kya Kine Butemwe Bwanji

16. Ñanyi kiyukilo kikatampe kya butemwe bo etutemwa Yehoba, kabiji twayuka byepi kuba’mba buno bupe bwapanwa kwi atweba pa bunke bunke?

¹⁶ Kya buna, Yehoba uba byavula kumwesha butemwe bwanji bo etutemwa. Ee kine, kitapisho kya bukuzhi bwa kwa Yesu ke kiyukilo kikatampe bingi kimwesha’mba Satana wa bubela byo amba’mba atweba kechi twanema nangwa’mba kechi betutemwa ne. Kechi twafwainwa kulubamo ne, kuba’mba lufu lwa malwa lo afwile Yesu pa kichi kya lumanamo kabiji ne lumanamo lukatampe Yehoba lo amanamine pa kumona kufwa kwa Mwananji ye atemwisha, ke kiyukilo kya butemwe bo betutemwa. Kya bulandatu ke kya kuba’mba, bantu bavula kibakatazha bingi kuswa amba buno bupe bwapainwe kwi abo bunke. Beumvwa babula kunema. Nangwa byonkabyo, vulukai kuba’mba mutumwa Paulo wajinga muntu wapachile baana ba bwanga ba kwa Kilishitu. Pano bino, wanembele amba: ‘Mwana Lesa ... wantemenwe ne kwipana wipaine mwine na mambo a amiwa.’—Ngalatiya 1:13; 2:20.

17. Mu ñanyi jishinda Yehoba mo etukokela kwi aye ne ku Mwananji?

¹⁷ Yehoba umwesha butemwe bwanji bo etutemwa kupichila mu kwitukwasha pa muntu pa muntu kumwenamo mu kitapisho kya kwa Kilishitu. Yesu waambile’mba: “Kafwako wakonsha kwiya kwi amiwa ne, poso abo Batata bantuma bamukoka.” (Yoano 6:44) Ee, Yehoba aye mwine witukokela ku Mwananji ne ku luketekelo lwa bumi bwa myaka. Mu ñanyi jishinda? Kupichila mu mwingilo wa kusapwila ye betusolomokelamo pa muntu pa muntu, kabiji ne kupichila mu mupashi wanji wazhila Yehoba ye engijisha kwitukwasha kumvwisha ne kwingijisha bukine bwa ku mupashi kechi na mambo a kupelelwa kwetu ne bumbulwakoloka bwetu ne. Onkao mambo, Yehoba wakonsha kwamba pe atweba byonka byo aambile pa bena Isalela amba: “Amiwa nemutemwa na butemwe bwa myaka ne myaka; onkao mambo amiwa natwajijila na kwimubila lusa.”—Yelemiya 31:3.

18, 19. (a) Ñanyi jishinda jikatampe Yehoba mo amweshesha butemwe bwanji pe atweba, kabiji ki ka kimwesha’mba aye mwine wikyuba kino bunke bwanji? (b) Nga Mambo a Lesa etubujisha byepi mu bukishinka amba Yehoba nteleki wa lusa?

¹⁸ Kimye kimo tumwena butemwe bwa Yehoba bo etutemwa kupichila mu lulombelo. Baibolo witutundaika atweba bonse pa muntu pa muntu ‘kulomba na kubula kuzhikilwa.’ (1 Tesalonika 5:17) Aye umvwa. Utelwa ne kuba’mba ‘umvwa milombelo.’ (Masalamo 65:2) Kechi wapana kino kifulo ku muntu mukwabo, nangwatu ku Mwananji ne. Akikilangulukaipotu: Mulenga wa byonse witukambizha kumusolomoka mu lulombelo, sa twakasuluka. Nga aye nteleki wa mutundu ka? Wakanama kabiji ubula kutako muchima nyi? Ine kwalepeshatu.

¹⁹ Yehoba umvwa lusa. Lusa lo lu ka? Mwina Kilishitu umo wakikulumpe wakishinka waambile’mba: “Lusa ke kumvwa misongo ya mukwenu mu muchima wobe.” Nanchi kine Yehoba umvwa misongo yetu nyi? Tutanga pa mambo a kumanama kwa bantu banji bena Isalela amba: “Mu moba onse a lumanamo lwabo wamanamine bingi.” (Isaya 63:9, NW) Yehoba kechi wamwenengatu lumanamo lwabo ne; wibomvwijile bantu lusa. Lusa Yehoba lo omvwa pa bantu banji lwalumbululwa mu byambo byanji mwine ku bakalume banji amba: “Awa wimukozha anweba wauba nobe wamukozha Yehoba pa kantu ka pa jiso janji.”b (Zekaliya 2:8) Byo kyakonsha kukolapo! Ee, Yehoba witumvwina bingi lusa. Umvwe twaumvwa kukola, ko kuba’mba nanji umvwa kukola.

20. Ñanyi ndangulukilo yabula kufwainwa yo twafwainwa kuchinuzhuka umvwe tukeba kulondela lujimuno luji mu Loma 12:3?

²⁰ Kafwako mwina Kilishitu ujitu bulongo wafwainwa kwingijisha bino biyukilo bya butemwe bwa Lesa kwikala ke mwa kwilundumikila nangwa kwitota kwatu ne. Mutumwa Paulo wanembele amba: “Mambo amiwa naambila monka mwayila bupe bwampewa, ku bonse ba mwi anweba, namba, kechi mwilanguluke kukilapo po mwafwainwa kwilangulukila ne; poso mulanguluke byonka byafwainwa kulanguluka, monka mo emupimina Lesa ku muntu ku muntu kipimo kya lwitabilo.” (Loma 12:3) Baibolo mukwabo wamba’mba: “Mbena kukeba kwimwambila anweba bonse namba kechi mwafwainwa kwimona anweba bene po mwabula kufwainwa ne, bino mwimonenga anweba bene mu jishinda jafwainwa.” (A Translation in the Language of the People by Charles B. Williams) Byo tubena kusekela mu butemwe bwa Shetu wa mwiulu, twayayi twikale na milanguluko yalumbuluka ne kuvulukanga kuba’mba lusa lwa Lesa ke bupetu.—Luka 17:10.

21. Ñanyi bubela bwa kwa Satana bo twafwainwa kutwajijila na kukana, kabiji ñanyi bukine bwa mu Baibolo bo twafwainwa kutwajijila na kukosesha michima yetu?

²¹ Twayai atweba bonse twingile na bulume bwetu bonse kukana bubela bwa kwa Satana, kubikapotu ne bubela bwa kuba’mba kechi twanema ne, nangwa’mba kechi betutemwa ne. Umvwe kya kuba bintu byo mwapitamo mu bwikalo bwenu bimulengela kulanguluka amba kechi mwafwainwa butemwe bukatampe bwa Lesa ne, nangwa’mba mingilo yenu yawama yakepesha bingi kya kuba meso anji amona byonse kuba eimona ne, kabiji nangwa kuba’mba mambo enu abayisha kya kuba lufu lwa Mwananji wanema kuba lwiavweta ne, ko kuba’mba mwabepwa bubela. Bukainatu nsalansala bubela bwa uno mutundu! Twayai tutwajijile kukosesha michima yetu na bukine bwaambiwe mu byambo bya kwa Paulo byatangijilwe na mupashi bya kuba’mba: “Mambo amiwa nayukishatu namba, nangwa lufu, nangwa bumi, nangwa bamalaika, nangwa bene bakatampe, nangwa bintu bya katataka, nangwa bintu bikeyako, nangwa bya bulume, nangwa bula bwa mwiulu, nangwa bula bwa panshi, nangwa kilengwa kingi, nangwa kya byepi, nangwa kya byepi, kechi bikakonsha kwitwabanya na butemwe bwa Lesa mwi Kilishitu Yesu Nkambo yetu ne.”—Loma 8:38, 39.

[Tubyambo twa mushi]

Mepuzho a Kulangulukapo

Masalamo 139:1-24 Nga byambo bya Mfumu Davida byanembeshiwa na mupashi bimwesha byepi amba Yehoba witutemwa atweba pa muntu pa muntu?

Isaya 43:3, 4, 10-13 Yehoba umvwa byepi pa boba bekala Bakamonyi banji, kabiji kwiumvwa kwanji kwamwekela byepi mu byubilo?

Loma 5:6-8 Mambo ka o twakonsha kuketekela’mba bundengamambo bwetu kechi bwakonsha kulengela butemwe bwa Yehoba kubula kwitufika ne kwitulengela kubula kumwenamo ne?

Yuda 17-25 Twakonsha kwilama byepi mu butemwe bwa Lesa, kabiji bintu ka byakonsha kwitulengela kubula kuba byobyo?

[Kipikichala pa peja 243]

‘Mwibukila bwalula bwavula mu kunema’

[Kipikichala pa peja 245]

Yehoba unemeka bingi kuchinchika kwetu mu bimye bya meseko