Bantu Bavula Babena Kunungwako
1 Byonkatu byokyajinga mukitota-myaka kitanshi, kipwilo kyabwina Kilishitu lelo jino kibena kukoma bingi mujishinda jakukumya. (Byu. 2:41; 4:4) Mwaka wapwa, baana babwanga bakatataka babatizwe bafikile ku 288,907. Kino kibena kulumbulula’mba bantu 791 babatizwenga pajuba pajuba. Pamyaka isatu yapitapo bantu pepi namilyonyi umo bobabatizwe. Ee, Yehoba ubena kunungako bantu baitabila bavula bingi.—Byu. 5:14.
2 Aba bakatataka bavula bakyangye kuyuka byavula mubwikalo bwabwina Kilishitu bakebewa bukwasho nelufunjisho kuboba bakosa mulwitabilo. (Loma 15:1) Mubena Kilishitu batanshi mwajinga bamo, nangwatu pakupitapo myaka kufuma kimye babatizwe, bakankelwe ‘kuya kulutwe kufika ku bukulumpe.’ (Hebe. 5:12; 6:1) Munkalata yanji ku Bahebelu, Paulo kyokyo atongawijile mbaji bena Kilishitu mobafwainwa kukomenako kumupashi. Ñanyi mbajiyo, kabiji bukwasho bukebewa bwafwainwa kupanwa byepi?
3 Kwikala Namuteeto Wawama Wakufunda: (Hebe. 5:13, 14). Kwesakana namwayila mukambizho wakwa Paulo, pakuba’mba muntu ekale ufunda wawama kikebewa kwibikishako kufunda, kubwezha-bwezhapo, nekujanga “kajo kakosa” kapana jibumba ja Yehoba. (Monai Kyamba kya Usopa kya Kibemba kya August 15, 1993, mapeja 12-17.) Umvwe kemwisambe byakumupashi nabaiya katataka mulwitabilo nekwisamba nabo bintu byawama byabukine byomwatangile kimye kyomwapesele-peselenga, mwakonsha kwibatundaika kwikala namuteeto wakufunda. Nga mamboka pakimye nepakimye kyomubujila kwitapo umo wakatataka kuba’mba mufunjile nanji pamo lufunjisho lwenu lwapabunke nangwa lwakisemi, kampepo nangwatu kunengezhezha pamo lufunjisho lwa Kyamba kya Usopa?
4 Kutanwanga Kukupwila Kimye Kyonse: Byubilo byenu byabukishinka byawama nebyambo byenu byalutundaiko bikakwasha baiya katataka mukipwilo kuchinuzhuka lubaji lukwabo lubula kukebewa loatongwele Paulo—kisela kyakushalanga kukupwila kwabwina Kilishitu byonka “byo boba” bamo. (Hebe. 10:24, 25) Bakwashai bayuke kuba’mba kupwila loluzhikijilo lwabumi bwabo kumupashi lwibakwasha kutwajijila kwikala mukipwilo. Bonse mukipwilo pamuntu pamuntu bafwainwa kutambwila bakatataka kwibalengela kwiumvwa bakasuluka’mba nabo baji lubaji lwabwanabwankazhi bwetu. Kupwila saka kukyangye kutendeka, mukifulo kyakufikenatu mwaikala pakipona, nga mamboka akubula kupitamo nakwiimuna-imuna nekwilumbulwila anweba bene kubamukipwilo, kikatakata aba bomwabula kuyuka.
5 Kumusolomoka Yehoba Naluketekelo: Pakuba’mba tushinde bukoke nekubula kwikebela tubilubo, twafwainwa kulomba kwi Yehoba, kumulumbulwila milanguluko yetu kufuma panshi yamuchima nebijikila byotuji nabyo. Kwashai bakatataka bayuke kuba’mba umvwe kebasanshijile Yehoba amba ebakwashe byonka byakambizhe Paulo, kechi bakakokane. (Hebe. 4:15, 16; 10:22) Kushimikizha byomwapitamo mubwikalo nako kukakosesha luketekelo lwamuntu wakatataka kuyuka kuba’mba Yehoba umvwa milombelo ifuma panshi yamuchima.
6 Kwikalangako Nakimye kya Mumwingilo Wamubujimi: Kabiji Paulo waambile’mba kikosesha bingi kumupashi ‘kuleta kitapisho kya kutota Lesa moba onse.’ (Hebe. 13:15) Abya mwakilangulukapo kala kwitako musapwishi wakatataka kuyila nanji pamo mulunengezho lwenu lwamulungu nemulungu mumwingilo wamubujiminyi? Kampepo anweba bonse bubiji bwenu mwakonsha kunengezhapo ñambilo yenu momusakwambilanga nangwa kumonapo mbaji imo yamwingilo awo wakatataka yoakyangye kwesekapo kala.
7 Kileta bingi lusekelo lukatampe pakumona bantu bavula sabanungwako, pano bino bakebewa kukwashiwa. Kwipana atweba bene nakufunjisha nekutundaika bakatataka mukipwilo kukebakwasha kwikala nalwitabilo lwakosa lukebewa ‘kupulusha myeo yabo.’—Hebe. 3:12, 13; 10:39.