Bakulumpe Balufunjisho lwa Buku pa Kipwilo Byobakwasha Bonse Pamuntu Pamuntu
1 Lufunjisho lwa Buku pa Kipwilo lwaikelako kuba’mba “kipelengako kukwasha muntu yense kukomenako kumupashi... . Kino kekiyukilo kyakifyele nelusa lwa Yehoba loobila bantu banji.” (om-CW pe. 75; Isa. 40:11) Mukulumpe walufunjisho lwa buku wingila mwingilo mukatampe bingi wakukwasha bonse pamuntu pamuntu.
2 Palufunjisho lwa Buku: Pakuba mabumba alufunjisho lwa buku byoanengezhewa kwikala acheache, mukulumpe walufunjisho lwa buku uyuka bulongo bantu bonse baji mujibumba janji. (Mana. 27:23) Javula mulungu nemulungu kwikala bimye byakwiimunaimuna nekwisambaisamba lufunjisho saka lukyangye kutendeka nepanyuma yalufunjisho. Pakuba’mba ñondo apwe, wakonsha kukumbanya kwamba nabonse pamuntu pamuntu mujibumba janji. Kino kikwasha bonse mujibumba jalufunjisho lwa buku kwiumvwa bakasuluka kumusolomoka umvwe baji mumeseko nangwa bakeba lutundaiko.—Isa. 32:2.
3 Mukulumpe Walufunjisho lwa Buku weseka nangovu kutundaika bonse baji mujibumba kukumbulangapo kimye kyalufunjisho. Jishinda jimo joobilamo kino kekupichila mukufunjisha lufunjisho mubutemwe nenalusa. (1 Tesa. 2:7, 8) Umonapo mashinda akuba bonse kebakumbulepo, kuvwangakotu nebanyike. Umvwe bamo baji namoyo wakukumbulapo, wakonsha kwibakwasha kumbaji kwibabujila jimo kuba’mba beye batange kinembelo nangwa kukumbulapo mupalagalafu imo. Nangwa kimo kimye wakonsha kwibabula byakukumbula mukumbu mumawi abo bene.
4 Umvwe nkwasho ukwashako mukulumpe walufunjisho lwa buku nkwasho mukipwilo, mukulumpe walufunjisho lwa buku umupako kutangijila lufunjisho jimo umvwe papita bañondo babiji. Kino kilengela mukulumpe kumona bibena kufunjisha nkwasho wanji nekumukwashako mashinda amo moafwainwa kufunjishishanga bulongo. Luno kelunengezho lwawama bingi lwakukwasha balongo kuyilako palutwe mubusendwe bwabo bwakufunjisha.—Titu. 1:9.
5 Mumwingilo Wamubujimi: Mwingilo umo mukatampe mumingilo yamukulumpe walufunjisho lwa buku kewakutangijila mumwingilo wabusapwishi. (Bala. 27:16, 17) Unengezha lunengezho lwakusapwila mujibumba janji nekweseka nangovu kukwasha bonse mujibumba kutana lusekelo mumwingilo wabo. (Efi. 4:11, 12) Pakuba’mba bonse ebakwashe, wibikila kikonkwanyi kyakwingila mumwingilo naumo umo wamujibumba. Kabiji wingijila pamo nautangijila mwingilo wa mu bujimi mukukwasha boba bakeba kuyilako palutwe mumbaji imo yamwingilo wabo mukwibanengezhezha kwingijila pamo namusapwishi wayuka bulongo kuba’mba ebakwashe.
6 Byoaji Kafunga Wabutemwe: Mukulumpe walufunjisho lwa buku ukwasha neboba bengilakotu pacheche mumwingilo wabusapwishi namambo abwikalo bobajimo. Umona kuba’mba aba bakankalwa kwenda namambo abukote nangwa namambo akwikalatu munzubo neboba babula kwenda pakimye kimo mambo akuswezha kikola nangwa bekozhezhe kyabaya wibabula lunengezho lwakwibetabizha kutumanga sawakya wamumwingilo wamubujimi wamaminiti 15 umvwe bakankalwa kutuma sawakya waawala mutuntulu pakupwa kwañondo. (Kometi ya Mwingilo wa Kipwilo yoiyuka ñanyi wafwainwa luno lunengezho.) Kabiji ukwasha neboba batongwelwa kutanwanga mujibumba janji umvwe bakoka, saesekesha nangovu kwibakwasha kutendeka jibiji kwingijila pamo nakipwilo.—Luka 15:4-7.
7 Byotwasanchilapo bukwasho bwabutemwe bumwesha bakulumpe balufunjisho lwa buku! Bukwasho bobakwasha muntu yense bukwasha ‘bonse kulumbuluka mu lwitabilo ... , kufika ku kipimo kya kimino kya kufikila kwa Kilishitu.’—Efi. 4:13.