Mwingilo Ukebewa Kwipelula
1 Byambo bya Lesa bitukambizha kwikala bantu ba “michima ya kwipelula: ne kubwezha kibi mu kibi kikwabo ne, ... kana bibusa byonka.” (1 Pe. 3:8, 9) Bino byambo byafwainwa bingi kulabijilwa mumwingilo wabusapwishi. Kyakine kyakonsha kushupa bingi kwipelula mumwingilo wabwina Kilishitu.
2 Kwipelula kekyubilo kimo kyawama kitukwasha kuchinchika bintu byatama bitumwekela. Kimye kyotusapwila tusolomoka bantu bamo babula nekwitukeba, bino satwayukila nejimo kuba’mba basakwitutupanya. Pakuba’mba tutwajijile kusapwila kubantu bauno mutundu, kwipelula kukebewa. Munyaunda imo yakatazha bingi, banyenga bapainiya babiji bayanga pajuba pajuba pamazubo abantu pamyaka ibiji amba basapwile, kafwako muntu nangwa umo washinkwilenga kukinzhilo nekwisamba nabone! Nangwa byonkabyo, bachinchikile, kabiji lelo jino byotubena kwamba muyoya nyaunda muji bipwilo bibiji.
3 Byotwakonsha kuba Nabantu Babuluunji: Kwipelula kuketukwasha kulonda Yesu umvwe twatana bantu babula lusa nangwa baji nakapunyi. (1 Pe. 2:21-23) Nyenga umo bamunenawine bingi panzubo imo bibye, patanshi bakimunenawine kumukazhi kepo nemwata wanji naye wayishile nekumutukaula wamukambizha nekumukambizha’mba yanga fuma papo. Nyenga wamwemweselatu nekwibambila’mba ukesamba nabo kimye kikwabo. Bamulume nemukazhi bakuminye bingi pakumona nyenga wamwemwesela. Kino kibalengejile kuteleka ku Kamonyi mukwabo wibafwakashijile, kabiji baitabile nekwiya nakutanwa kukupwila pa Nzubo ya Bufumu. Nyenga yenka yebatupenye wayishile nekwibemuna kabiji nekwibasapwila byambo bikwabo. Neatweba twakonsha kukokesha michima yabantu babula kukeba kwitutambwila umvwe twamwesha “bukimote ne mushingi.”—1 Pe. 3:15; Mana. 25:15.
4 Chinuzhukai Kwijantula: Maana amu Baibolo otwafunda kechi afwainwa kwikala kintu kyakwitulengela kusula bantu nangwa kwamba nakwibalengululane. (Yoa. 7:49) Byambo bya Lesa bitufunjisha’mba: “Kechi bamunene bya mwenga nangwa muntu umotu ne.” (Titu. 3:2) Umvwe twakoka muchima byonka byajinga Yesu, tukakokolosha bakwetu. (Mat. 11:28, 29) Kusolomoka bantu namuchima wakwipelula kulengela nebyambo byetu kukebula bantu.
5 Ee, kwipelula kwitukwasha kuchinchika nakwingila mumanyaunda akatazha. Kwipelula kunekenya michima yabantu babula kukeba bukine, nekukebula bakwabo kubyambo bya Bufumu. Kyakila pabyonse kekyakuba’mba, kusangajika Yehoba aye “upana bupe ku bepelula.”—1 Pe. 5:5.