Buntungi bwa Mazubo a Bufumu mu Byalo Bimo bya mu Europe
1 Mu myaka ya kunyuma kwe, mwingilo wa Bakamonyi bakwa Yehoba mu byalo byavula bya ku Europe, kuvwangako ne ku Eastern Europe, bamushinkile. Javula kwajinga bingi lumanamo. Kyashupanga bingi kupwila bantu sa bemumona, kabiji ne kwikala na Nzubo ya Bufumu nako kwakatezhe bingi. Bino nangwa byonkabyo, muyonkaye myaka yapitapo “Yehoba witubila bikatampe, ne kusekela twasekela.”—Sala. 126:3.
2 Kutendeka mu 1983, kumanyikwa kwa Bakamonyi bakwa Yehoba kwayilenga na kupopotela. Byo kyafikilenga mu 1989, byalo bya Poland ne Hungary byaswishishe Bakamonyi bakwa Yehoba kwingila mwingilo wabo. Mu 1991, Bakamonyi bakwa Yehoba bebaswishishe kunembesha mwingilo wabo mu Russia. Kutendekatu kyokya kimye, mwingilo wayilako palutwe kyakine kine mu Russia ne byalo byajinga kala mu Soviet Union. Pakachi ka March 1996 ne October 1998, Jibumba Jitangijila jaitabizhe ma loni akutunga Mazubo a Bufumu 359 afumine ku ma ofweshi a misampi itala pa byalo 11 bya mu Europe.
3 Byo mubena kutala pa bipikichala biji mu kino kya mukachi, langulukai pa bintu bikatampe byakukumya Yehoba byoaubila bantu banji. (Sala. 136:4) Musakutemwa bingi kuyuka’mba bupe bupana balongo mwaya ntanda yonse bubena kwingijishiwa bingi bulongo kumwesha byaambile Yesu mu Yoano 13:35 amba: ‘Pa kyo kino po po bakayukila bonse amba anweba mwi baana bami ba bwanga, inge mwitemwe anwe bene na bene.’
4 Pa byalo bimo biji mu Europe bibena kukwashiwa mu lunengezho lwa bukwasho bwa kutunga Mazubo a Bufumu mu byalo byabula mali avula, ke kyalo kya Romania mwatungiwa Mazubo a Bufumu 36 kutatula mu July 2000. Kwingijisha ntungilo imotu ya kutungilamo Mazubo a Bufumu, kyalo kya Ukraine kyatungile Mazubo a Bufumu 61 mu mwaka wa 2001, kabiji batungijilepo ne akwabo 76 mu 2002. Na mambo a bukwasho bupanyiwa ku kipao kya Mali a Mazubo a Bufumu, Mazubo a Bufumu avula atungiwa mu byalo bya Bulgaria, Croatia, Macedonia, Moldova, Russia, ne Yugoslavia.
5 Mu byalo bimo, kechi kyapelelenga kutunga Mazubo a Bufumu ne, kabiji kwajinga kukosapo pa kubatu’mba mutendeke kutunga. Javula kyatayanga bingi kimye pa kunengezha bya kutunga. Kabiji mutengo wa kutunga Nzubo ya Bufumu mu mapunzha a Europe wabaya bingi kukila mu mapunzha avula a mu Africa ne mu South America. Pano bino nangwa byonkabyo, na mambo a kuvula kwa bantu babena kupopwela Yehoba, Mazubo a Bufumu avula akikebewa ne luno kutungiwa mu byalo bya mu Europe byabula mali avula!
6 Byo kyawamapo pakumona ano Mazubo a Bufumu avula abena kutungiwa bukiji bukiji! Ano Mazubo abena kwisapwila bingi ku bantu beamona mu mapunzha moatungiwa. Mu mapunzha amo, bakulumpe ba mu ma kafulumende batemwa bingi pakumona kwipana kubena kumwekela mu kulondela mizhilo ya bya kutunga.
7 Isaya waawile pa mambo a kuyilako palutwe kwa bupopweshi bwa kine pa kino kimye. Kupichila mu uno ngauzhi, Lesa waambijile jimo amba: “Amiwa Yehoba yami nkapelawizha kwikifikizha mu kimye kyakyo.” (Isa. 60:22) Kya kine, myaka ya kunyuma kwe, yajinga kimye kya Yehoba kya kuvujilako bantu mu Eastern Europe. Mwane Yehoba atwajijile kwitukosesha kuba’mba tupelawizhe kutunga Mazubo a Bufumu mu byalo byavula kupichila mu kupanako bukwasho ku kipao kya Mali a Mazubo a Bufumu! Kino kikakwasha kutunga Mazubo a Bufumu avula mu byalo byabula mali avula. Kabiji kikakwasha bupopweshi bwa kine kuyilako palutwe mu Europe kabiji ne busapwishi bukakumbana “konsetu ne kwapela ntanda.”—Byu. 13:47.
[Bipikichala pa peja 3]
Mazubo a Bufumu mu Moscow, Russia
[Bipikichala pa peja 4-6]
Mazubo a Bufumu Akatataka mu Eastern Europe
Strumica, Macedonia
Daruvar, Croatia
Sokal, Nkambi ya Lviv, Ukraine
Bitola, Macedonia
Sofia, Bulgaria
Mladost, Bulgaria
Plovdiv, Bulgaria
Kurdzhipskoye, Maykop, Russia
Bački Petrovac, Yugoslavia
Tlumach, Nkambi ya Ivano-Frankivsk, Ukraine
Rava-Ruska, Nkambi ya Lviv, Ukraine
Stara Pazova, Yugoslavia
Zenica, Bosnia ne Herzegovina
Sokal, Nkambi ya Lviv, Ukraine
Zhydachiv, Nkambi ya Lviv, Ukraine