Mwingilo Wakushimika Mazubo a Bufumu Ubena Kutwajijila
1 Mu 1983 Pakupwila Kwankambi kwa “Kingdom Unity” (Kukwatankena Pamo mu Bufumu) kwajingako mu United States, kyabijikilwe kuba’mba kukekalako mali akukwasha mwingilo wakushimika nekuwamisha Mazubo a Bufumu mwaya kyalo kyonse kya United States ne Canada. Bino kechi twayukile mapesho akafumamo kutatwila kuino ntendekelo ichechene. Pachepache twatendekele kumona byaamba Masalamo 92:4 amba: “Mambo anweba, Yehoba, mwandengela lusekelo na mingilo yenu: Monka mu mingilo ya maboko enu mo nkasangalela.”
2 Pano luno tubena kusangalala bingi pakumona mwingilo ubena kwingijiwa. Lelo jino mwingilo wakutunga bukiji-bukiji Mazubo a Bufumu ubena kwingijiwa. Atweba bonse tuji najishuko jakwingilako uno mwingilo mumashinda amo. Tuba bino kupichila mukupanako bupe bwamali avula nangwa acheche akukwasha mwingilo wakutunga Mazubo a Bufumu avula akupopwelamo mwaya ntanda yonse. Kabiji balongo bavula bapanako bipe byabo, kimye, ngovu, nebusendwe mukwingilako uno mwingilo. Uno mwingilo yense ubena kwingijiwa bulongo namambo alutangijilo nebukwasho bwa Yehoba, kabiji tubena kumona mfweto yavula namambo akukwatankena kwetu pamo.—Sala. 127:1.
3 Kulondela mutanchi watanchikijilwe bipwilo byamu United States, Musampi wamu Zambia ubena kwingijisha ano mali pabapite kemyaka ina. Mubyalo byavula, mu Nzubo ya Bufumu muji kabokoshi basapwishi mobabika bupe bwabo bwa Mali a Mazubo a Bufumu. Kutendekatu kimye lunengezho lwa Mali a Sosaiti a Mazubo a Bufumu kyolwatendekele mu 1983 mu United States, balongo bapana bupe bwavula mukwifuukwila abo bene, nemujino jishinda kyalengela kuba’mba kwikale kupana maloni a kutungila Mazubo a Bufumu. Abino byotubena kwamba, bipwilo bimo mukino kyalo byamwenamo kala mfweto muluno lunengezho. Kutendekatu kimye kyatatwile uno mwingilo mu June 1999 kufika mu May uno mwaka, Mazubo a Bufumu 514 ashimikwa kala. Bino bipwilo byavula bikyangye kutunga Mazubo a Bufumu nangwa kuwamisha oa abena kukebewa kuwamishiwa. Pano kibena kukebewa bingi bukiji-bukiji kwingijisha buno bupe bwaano mali akupana maloni kubipwilo. Bupe bwenu bomwatwajijila nakupana muluno lunengezho busanchilwa bingi ku Sosaiti nekubyobya bipwilo bimwenamo mubupe bwenu.
4 Kubijika kwabijikilwe kubalongo betu mu United States kwajinga lwito lwakwingilako mwingilo ubena kwingijiwa wakutunga Mazubo a Bufumu. Mali a Mazubo a Bufumu afwainwa kuvujilako kuba’mba akwashe nebalongo baji mubyalo bikwabo, kuvwangakotu ne Zambia, bino neabo bene sabatwajijila kupanako bupe bwabo bwamali aloni akutungila Mazubo a Bufumu. Mazubo a Bufumu neakwabo abena kukebewa kushimikwa mwaya ntanda yonse. Mwaka wapwa wamwingilo yenkatu, bipwilo 3,288 byalengelwe. Bino bipwilo byavula byalengelwe mu Africa, Asia, Central ne South America, ne Eastern Europe.
5 Kika kyafumamo kutendekatu kyokya kimye? Sawakya wamu 2001 Yearbook washimuna’mba: “Namambo aluno lunengezho, mubyalo 30, Mazubo a Bufumu afika ku 453 ashimikwa kala, kabiji akwabo afika ku 727 akishimikwa. Kibena kukebewa kekukebapo mashinda amo akutungilamo Mazubo a Bufumu awama mukyalo kimo kimo kwingijisha bipe nemashinda amonkamo mwabo. Mu Kenya, bengijisha mabwe akupoya; mu Togo bengijishatu matafwali; mu Cameroon bengijisha matafwali ashamende kushimikila apa bino babwela babikako pulasita. Mujino jishinda, balongo bafikena kuyuka byakwingila mingilo ikatampe yobafwainwa kwingila mukyonka kyalo kyobajimo.”
6 Mapesho a Yehoba muluno lunengezho kikatakata abena kumweka mu Africa. Byomubena kutala pabipikichala bya Mazubo a Bufumu amo ashimikwa kala, akilangulukai pabyafumamo mumwingilo wauno mutundu ubena kwingila Bakamonyi bakwa Yehoba! Kino kyamwekela mumashinda asatu apusana—kukwatankana kwabalongo mwaya ntanda yonse, byaubapo bantutu bamwenengako mukimasamasa, nekuyilako peulu kwakibelengelo kyabatanwa kukupwila kwakipwilo. Nangwa kyakuba kino kyamukachi kyamweshatu Mazubo a Bufumu ashimikwa kala mu Africa, mwingilo wakushimika Mazubo a Bufumu ubena kutwajijila mumapunzha akwabo mwaya ntanda.
[Bipikichala pa peja 3]
CENTRAL AFRICAN REPUBLIC
Bimbo, Bangui
Begoua, Bangui
[Bipikichala pa peja 4]
Ukonga, Tanzania
[Kipikichala pa peja 4]
Accra, Ghana
[Kipikichala pa peja 4]
Salala, Liberia
[Kipikichala pa peja 4]
Karoi, Zimbabwe
[Bipikichala pa peja 4, 5]
Allada, Benin—Nzubo ya Bufumu yakala
Allada, Benin—Nzubo ya Bufumu yakatataka
[Bipikichala pa peja 5]
Kpeme, Togo
[Kipikichala pa peja 5]
Sokodé, Togo
[Bipikichala pa peja 5]
Fidjrosse, Benin
[Kipikichala pa peja 6]
Lyenga, Zambia—Nzubo ya Bufumu yakala
Lyenga, Zambia—Nzubo ya Bufumu yakatataka
[Kipikichala pa peja 6]
Kinshasa, Congo
[Kipikichala pa peja 6]
Musambira, Rwanda