Nkalata Kufuma Ku Jibumba Jitangijila
BYO ketunankame kwipi na bwikalo bupya, kibena kukebewa bingi bukiji bukiji kumupembelela Yehoba. (Zefwa. 3:8) Ngauzhi Danyela waambile’mba “Lesa usolola byafyamika, kabiji aye wamwesha . . bintu bikekalako mu moba a kulutwe.” (Da. 2:28) Kine byo jaikalapo jishuko ja kwikala mu ano moba apelako atongwejilwe jimo ne kumvwisha byafyamika Yehoba byo abena kuyukanyikisha!
Kupichila mwi ‘kalume wa kishinka ne wa maana,’ Yehoba ubena kumweshatu patoka nkebelo yanji ya kukonkanya “jibumba jikatampe” ja bapopweshi banji ntanda yonse mu ano ‘moba apelako’ akatazha. (Mat. 24:45; Lum. 7:9; 2 Timo. 3:1) Isaya 2:2, 3 waamba pa kuno kukonkana kwa bantu ntanda yonse kuba’mba kubena kubiwa ‘mu moba apelako.’ Pa mwaka pa mwaka, kuno kukonkanya kubena kutwajijilatu nangwa kya kuba makatazho ne bumbanzhi bibavulemo bingi mu ino ntanda.
Kutendekatu mu January shoo ne mu December 2004, twavulwilweko bingi pa mambo a kumvwina byambo kya kwa Yesu bya kuba’mba: “Labainga mukenkentenga . . . Mwikale ba kutengelela jimo.” (Mat. 24:42, 44) Kinetu, bintu bibena kumwekana mu ino ntanda bilumbulula bintu byavula bingi ku bena Kilishitu bayuka “biyukilo bya ino myaka” ne kwingijilapo na maana. (Mat. 16:1-3) Mu kufikizhiwa kwa Byambo byanji, Yehoba ukatwajijila kwikala na jibumba ja bantu banji bakwatankana mu kwingila mwingilo wanji nangwa kya kuba babena kupita mu makatazho.
Nangwa kya kuba bantu bamo bakeba kulekesha mwingilo wa Bufumu, balongo betu batwajijila na kushimuna bukine ne kupwila pamo. (Byubilo 5:19, 20; Hebe. 10:24, 25) Mu Russia, mu June 2004, kije kya mambo mu Moscow kyafuukwile kulekesha mwingilo wa Bakamonyi ba kwa Yehoba ne kushinka kije kyabo kyaswishiwa na muzhilo mu uno yenka muzhi wa Moscow. Nangwa byonkabyo, balongo kechi bomvwa moyo ne; bayuka Lesa kyo akeba’mba bobe, kabiji bamukokela amba ye Kalama kukila kukokela bantu. (Byubilo 5:29) Tuji bingi na luketekelo kuba’mba Yehoba ukakwasha bakalume banji nangwa kya kuba babena kupita mu makatazho.
Mu kyalo kya Georgia pa myaka icheche yapitapo, balongo bebonawijile bipe, kwibamanyika, kabiji ne kwibasokela mabuku abo saka batalapo ne meso. Bino kafwako kyela kyo babunda kya kwibalwishako kyaingila bulongo ne. (Isa. 54:17) Mu mwaka wa Mwingilo wa 2004, Bakamonyi ba kwa Yehoba mu Georgia bebaswishishe jibiji kusapwila kwesakana na mwayila mizhilo. Kupwila kwa nkambi kwaubiwetu bulongo, kabiji luno mabuku obatu monka aishila mu kino kyalo. Kibelengelo kya basapwishi ne bantu batainwe ku Kivuluko kyabaijileko bingi.
Mu Armenia, Eritrea, Republic of Korea, Rwanda, ne Turkmenistan, balongo babena kwibakasa na mambo a lwitabilo lwabo. Nangwa kya kuba babena kwibamanyika, bayuka Binembelo byo byaamba pa mambo a lumanamo lo bapitamo, kabiji kino kibakwasha kusunga bulumbuluke bwabo byo babena kupembelela Yehoba kwibapokolola.—1 Pe. 1:6; 2 Pe. 2:9.
Byo musakutanganga Sawakya wa Mwingilo wa Mwaka wa 2004 mu Kyamba kya Usopa kya February 1, 2005, musa kusekela bingi pa buwame bwa Yehoba. (Sala. 31:19; 65:11) Twaketekela namba uno sawakya usa kwimutundaika bingi kutwajijila na kwenda mu jishinda jitokesha Lesa pa muchima.—1 Tesa. 4:1.
Kuji bingi kwingila na ngovu kuba’mba bukine bushimunwe ku bantu bonse. Kya kumwenako, Mavidyo, ma DVD, ne bintutu bikwabo mu mulaka wa kwamba na maboko ne mabuku a Bampofu byanembwa kuba’mba bikwashenga ku mupashi bantu bashinka matwi ne bampofu. Basapwishi ba Bufumu bavula bafunda milaka yamba bantu ba mu byalo bingi bekala mu nyaunda yabo ya kipwilo.
Kabiji kunungapo, mu mapunzha aikela kwalepa kufika, mwalengwa mabumba avula bingi. Ofweshi umo wa musampi utala pa mabumba kukila pa 300, muji basapwishi kukila pa 7,000. Kino kibena kumweshatu patoka kuba’mba bipwilo bya bukumo bibena kukebewa! Kabiji pa bantu 16,760,607 batainwe ku Kivuluko mu iwe mwaka wa mwingilo wapwa, bantu kukila pa 10 milyonyi kechi Bakamonyi ne. Kino kibena kumweshatu patoka’mba kine bipangwa byapya kabiji bibena kukebewa kunowa.
Tubena kumusanchila bingi Yehoba pa mapesho anji ne byo abena kwitulama mu butemwe pa juba pa juba. (Mana. 10:22; Mala. 3:10; 1 Pe. 5:7) Byo twakwatankana ne kwendela pamo mu ano ‘moba apelako,’ twaketekelatu mwi Yehoba. Nangwa kya kuba twakonsha kupita mu makatazho, twayai tumvwine byambo bya kinembelo kyetu kya mwaka wa 2005, bya kuba’mba: “Bukwasho bwami bufuma kwi Yehoba.” (Sala. 121:2) Mwane twimwimuna mutende wa bwina Kilishitu kabiji kimye kyonse tukelwa kwimulombelako.
Atweba balongo benu,
Jibumba Jitangijila ja Bakamonyi ba kwa Yehoba