Yehoba Unonkesha Bantu Banji

¹ “Yehoba waamba’mba: Moba akeya o bakoba, awa ujima ukamutana awa unowa kasa akinowa, kabiji awa unyantaula mañanzañanza ukamutana awa ubyala kasa akibyala nkunwa.” (Amo. 9:13) Akikifwanyikizhaitu—kajo kavula kya kuba kamo kechi kanowenwe ne kunowatu ne, kufikilatu ne kimye kya kujima ne kubyala kyafika, buno ke bunonshi bwabaya bingi!

² Nangwa kya kuba Yehoba wayuka kukajilwa kwetu kwa bintu bya ku mubiji mu ano moba a kupelako, Mambo anji etutundaika kukeba mutende wa kine kine ne kusangalela mu bunonshi bwa ku mupashi bo twiyowa. (Luka 12:29-31; 16-21; Loma 12:12) Byo aji Mfumu wa bu Mesiasa, Yesu Kilishitu wapewa bintu byanema ku meso a Lesa. (Isa. 43:⁠4) Byo tubena kwingila mwingilo ye twapewa wa kusapwila na mukoyo “mambo awama a bufumu,” “bintu” byanji bibena kuvujilakotu.—Mat. 24:14; Luka 12:42-44.

³ Pa bintu bimo bya ku mupashi bya panopantanda bibaikale bya Kilishitu, ke maofweshi a musampi, Mazubo a Bufumu ne Nzubo ya Kupwilamo Kukatampe ya mu Lusaka yatungiwatu katataka. Kino kishimikwa kyawama, kyapanwa kupopwelamo Yehoba, kibena kukwasha kuleta “bavula ku bololoke.”—Da. 12:3.

⁴ Ku mpelo ya mu ma 1990, Jibumba Jitangijila jaitabizhe kutunga Nzubo ya Kupwilamo Kukatampe mu mpunzha ya Lusaka. Kwajinga kukeba mpunzha yawama kabiji yabaya bulongo ya kwikalapo bantu bakapwilanga mu kikye kishimikwa. Mpunzha yawama yamwekele ku musela wa Lusaka.

⁵ Nga Nzubo ya Kupwilamo Kukatampe yafwainwe kutungiwa byepi? Bakalume bengijila mu byalo bingi babiji, kabiji ne bakulumpe mu kipwilo bayuka bulongo mwingilo wa buntungi, bapewe mwingilo wa kutangijila mwingilo wa buntungi pa ino mpunzha. Besambile na tumpanyi twavula, ne pa tuno tonse basajilepotu kamo kakonsheshe kutunga ino Nzubo kwesakana na byakebelenga Jibumba Jitangijila. Byo tuji Bakamonyi ba kwa Yehoba kuba twakankalwa kutunga ne kupwisha kino kishimikwa kikatampe ne, pano mambo ka a kwingijishisha bantu bangi? Kyanema ke kya kuba’mba, kwingijisha bantu bangi kutunga kwitukwasha kwingila mwingilo ye tuji naji wanema—wa kusapwila “mambo awama a bufumu bwa Lesa.”—Luka 4:43.

⁶ Mwingilo watendekele pa ino mpunzha mu April 2004. Lubumbulu wapita mu mupaka wa mamita abiji kuya peulu kabiji walepa pepi nobe kilomita umo watungiwe kuba’mba mpunzha ya kutungilapo ikale mukachi. Byela biji na kinemenezhi kyafika ku matani 80 byaingijishiwe kwimika mashiki a kishimikwa kiji na mutenge waesakana na konkili walepa mubula mamita 40 kabiji ne mu bwipi namo mamita 40 pa kubika mabenchi pafwainwa kwikala bantu bafika ku 3,000. Kabiji kunsakunsa ya kino kishimikwa kwabyalwa lunkoto pa kuba’mba kwikale mpunzha ikwabo yawama ya kwikalapo bantu bafika ku 7,000. Pulatifomu yazandama, ka kizhiba kawama ka kubatizwamo, ne biñambañamba bya kwambilamo byalumbuluka byanengezhiwa pa kuba’mba bantu bakamwenengamo mu ma pologalamu a kupwila kukatampe. Mashinyi ingijisha manyi a dizelo ipana bulume bwa malaichi umvwe malaichi engila jonse aya, yabikwa pa ino mpunzha pa kuba’mba kukabulenga kwikala kuvulañanya kupwila.

⁷ Pa bintu bikwabo byatungiwenga, kwajinga ne kutunga byolonyi byavula bulongo kabiji ne kutunga mwakowela ku maboko. Kwashimikwa ne byolonyi byakila pa 70 bya kukumpa byawama bulongo byo basokekamo mipaipi ifumya mwela kabiji byo balambwizha bulongo panshi na shamende. Ku kibelo kwa kutwelela pa ino mpunzha, kwatungiwa kazubo kacheche, jishinda mwa kupichila mwabikwa shamende, ne mpunzha pa kwimikila myotoka, kubikapotu ne nzubo ya bukumo muji bibamba bina mwa kwikala kasopa ne bakulumpe benda basatu.

⁸ Bimye bya kupwila pamo ‘na kumvwa ku mambo a Yehoba’ ke bimye byawama bingi. (Mpitu. 4:10) Mu byalo mo balekeshe kupwila pamo, pano luno bakasuluka mu kupopwela Lesa saka basangalala, kintu kyo bajijilenga pa myaka yavula. (w75 p. 547.) Mu Zambia, kechi twiyowatu bwana bwa bene bwa kupopwela bonka ne, pano bino ne kukomenako kubena kumweka kwa kuwamisha bifulo pa kupopwela ne kutunga bishimikwa bikwabo bya bukumo.

⁹ Byo kiji kuba’mba mu ntanda ipya ya Lesa mukekala bintu bya bunonshi byo etulaya, tutatu muchima pa bintu byawama bya ku mupashi bijiko: Ntanda ipya muji butemwe bubula kwaluka, bukishinka, bololoke, ne mutende. Byo tubena kusangalala pa mwingilo waingijiwa kala wa kunengezha kino kishimikwa kyapanwa kupwilamo kupwila kukatampe, tutengelatu na muchima yense bunonshi bwa ku mupashi bwa kulutwe amba “Yehoba ukapana kyonka kyawama.”—Sala. 85:10-13.

[Kipikichala pa peja 4]

Kutungiwa kwa lubumbulu wapita mu mupaka

[Kipikichala pa peja 4]

Bamwingilo ba kwitemenwa bavula bakwashishe, abya ne anweba mwakonsha nyi?