Nkalata Kufuma Ku Jibumba Jitangijila
Kwi Anweba Bakwetu Bakamonyi ba kwa Yehoba:
Mutumwa Paulo wamweshanga butemwe ne kusanchila bakwabo ba mu lwitabilo pa kimye kiji kyonse. Wanembejile bena Kilishitu mu Loma amba: “Napika sante kwi Lesa wami mwi Yesu Kilishitu mambo a anweba bonse, mambo lwitabilo lwenu lwaya nkuwa panopantanda ponse.” (Loma 1:8) Ee kine, aba bena Kilishitu ba mu myaka kitota kitanshi bayile bingi nkuwa mu Bufumu bwa bena Loma monse na mambo a lwitabilo lwabo lwakosa kabiji ne na mambo a kwingila na mukoyo mwingilo wa kusapwila. (1 Tesa. 1:8) O ene mambo mutumwa Paulo o ebatemwejile kya kine balongo banji!
Byonka byajinga Paulo, ne atweba tumusanchila bingi Yehoba kimye kyonse kyo tulanguluka pe anweba. Twimutemwa bingi! Kabiji yukai kuba’mba Yehoba wimutemwa bingi pa muntu pa muntu. Anweba bamo nangwa kya kuba mubena kumanama bingi, mwatwajijila na kusapwila. Kuchinchika kwenu kubena kusangajika bingi muchima wa Yehoba!—Mana. 27:11.
Byo mubena kutanga ne kulanguluka languluka pa “Mingilo ya Bakamonyi ba kwa Yehoba mu ano Moba” iji mu Yearbook ukosesha lwitabilo, musakumona bishiino byavula bibena kumwesha’mba Nkambo Yesu Kilishitu ubena kuya na “kushinda amba nkashinde” kabiji ne kuba’mba kafwako kyela nangwa kimo kyo bakabunda kya kulwishako baana ba bwanga ba kwa Kilishitu kikengila bulongo ne.—Lum. 6:2; Isa. 54:17.
Paulo wanembejile bena Kilishitu mu Filipai amba: “Nsanta kwi Lesa wami . . . na mambo a kukwashañana kwenu mu kwendesha mambo awama.” (Fili. 1:3-5) Ne atweba ba mu Jibumba Jitangijila byo byo twiumvwa pe anweba. Mu mwaka wa mwingilo wa 2007, basapwishi 6,691,790, baingijile maawala 1,431,761,554 na kusapwila mambo awama mu byalo 236 kuzhokoloka ntanda yonse. Mubena kwingila bingi mwingilo mukatampe wa kutwala palutwe mambo awama! Akilangulukai pa bantu bakukankalwa kubala bakwashiwa na mambo a kwingijila kwetu pamo. Aye mingilo yonse ibena kuletela bingi Yehoba lutotelo!
Pa kimye kikwabo, Paulo wamwesheshe’mba wibomvwijile bingi lusa balongo banji. Wanembejile boba bajinga mu Tesalonika amba: ‘Tuvuluka . . . butekanye bwenu bwa luketekelo lwa mwi Nkambo yetu Yesu Kilishitu konka ku meso a Lesa wetu Tata.’ (1 Tesa. 1:2, 3) Ee, mu bwikalo muji bingi makatazho. Ibyo ee kuba’mba makatazho koaji, pano bino kyanema bingi kuchinchika. Makatazho ka o mubena kupitamo anweba pa bunke bwenu? Nanchi mwalefulwa na mambo a kuba kikola kikatampe kibena kwimulengela kubula kwingilako pakatampe mu mwingilo wa Yehoba nyi? Nanchi mwina kwenu ye mwabanda nanji mu masongola waya mu Kalunga ka bafu kabula kutondwa nyi? (Mana. 30:15, 16) Nanchi kibena kumweka nobe mubena kukabakanatu byo mubena kukeba mukwenu wa kutwela nanji mu masongola watemwa Yehoba byonka byo mwamutemwa anweba aku saka mwakosela ku jifunde ja mu Binembelo ja kusongola nangwa kusongolwatu kana monka mwi Nkambo nyi? (1 Ko. 7:39) Nanchi mubena kwibikako bingi kukomesha baana aku na kupita mu lukatazho lwa kubulwa mali nyi? Kikale muji mu lukatazho lwa byepi nangwa lwa byepi, umvwe saka mutangizhako bintu bya Bufumu, Yehoba kechi ‘ukavulama mwingilo wenu ne butemwe bo mwijimwesha jizhina janji ne.’ Mwane kine balongo ne banyenga, kange ‘mukoke mu kuba byawama ne’!—Hebe. 6:10; Nga. 6:9.
Ki ka kikemukwasha kuchinchika? Byonka byajinga bena Tesalonika, ke “luketekelo lwa mwi Nkambo yetu Yesu Kilishitu.” O ene mambo palutwe kacheche Paulo o aesakenyejile “luketekelo lwa lupulukilo” ku kampompo kakosa kakonsha kuzhikijila mwina Kilishitu ku ndangulukilo yabula kufwainwa ne ku luzhinauko lubula kupwa.—1 Tesa. 5:8.
Ee kine, kupichila mu kuchinchika na lusekelo, mubena kumwesha’mba myendeleko ya kwa Satana yakwendeleka bumfumu bwa Yehoba, ke yatutu. Satana wamba’mba bakalume ba Lesa bauba lwiso kabiji ne kuba’mba nangwa kya kuba bakonsha kumwingijila Lesa pa kimye kicheche, bakalefulwa mu mpopwelo yabo umvwe kya kuba meseko avujilako nangwa umvwe buno bwikalo bwabula kupwa bukiji kwesakana na byo baketekela. Muji na jishuko jikatampe bingi ja kumwesha patokatu to kuba’mba Diabola ye mwine wa bubela bwafitatu bwii! Juba jonse jipita, jimufwenya kwipi na bibusa byo mubena kutengela.
Byonkatu Paulo byo aikalangako na bimye bya kutakaikilamo balongo banji na mambo lwitabilo lwabo lwakosa, kwingilako pakatampe mu mwingilo wa kusapwila, ne kuchinchika kwabo, ne atweba twibalusekelo bingi kwikalako na kino kimye kya kwimutakaikilamo ne kumwesha’mba twimutemwa bingi. Twajijilai na uno mwingilo wawama!
Lekai mwaka wiya akekale mwaka wa bintu byavula byawama bya ku mupashi. Na muchima wetu yense,
Atweba balongo benu,
Jibumba Jitangijila ja Bakamonyi ba kwa Yehoba