Kwingijisha Baibolo pa Kukumbula

UMVWE bantu betushikisha pa mambo a bintu byo twaitabilamo, bwikalo bwetu, milanguluko yetu pa mambo a bintu bibena kumweka ano moba ne luketekelo lwetu lwa kulutwe, twesekesha kwingijisha Baibolo pa kukumbula oo mepuzho. Mambo ka? Mambo o Mambo a Lesa. Mu Baibolo mo muji bintu byo twaitabilamo. Mo muji ne mafunde o tulondela mu bwikalo bwetu. Witukwasha kuyuka mwatala bintu bibena kumweka mu ntanda. Luketekelo lwetu lwa kulutwe lwaimena pa milaye ya mu Baibolo yanembelwe na lutangijilo lwa mupashi.—2 Timo. 3:16, 17.

Twayukishatu bulongo mutembo ye tuji nanji pa mambo a jizhina jetu. Twi Bakamonyi ba kwa Yehoba. (Isa. 43:12) Byonkabyo, kechi tukumbula mepuzho kwingijisha maana a bantu ne, tukumbula kwesakana na byaamba Yehoba mu Mambo anji anembelwe na lutangijilo lwa mupashi. Ibyo kuba’mba muntu yense uji na mo alangulukila, bino nangwa byonkabyo, tuswisha Mambo a Lesa kwitutangijila mu ndangulukilo yetu mambo twasumininwa kuba’mba bo bukine. Pano bino, Baibolo witupa bwana bwa bene bwa kwisajila byo twafwainwa kuba na bintu byo tukeba. Mu kifulo kya kukanjikizha bakwetu kuba bintu byo tukeba, twibafunjishako mafunde aji mu Binembelo. Mu jino jishinda tukwasha banteleki betu nabo kwikala na bwana bwa bene bwa kwisajila bintu byonka byo kiji kwi atweba. Byonka byajinga mutumwa Paulo, tukebesha bakwetu kwikala na ‘lukokelo kupichila mu lwitabilo.’—Loma 16:26.

Yesu Kilishitu watongolwa mu Lumwekesho 3:14 amba “kamonyi wa kishinka.” Nga Yesu wakumbulanga byepi mepuzho ne kuyuka mwa kubila na bintu byamwishilanga? Kimye kimo waingijishanga bishimpi byalengelanga bantu kulanguluka. Kabiji pa bimye bikwabo waipuzhanga yewo muntu wamwipuzha kwamba mo aumvwina kyokyo kinembelo. Javula wakumbulanga kupichila mu kwamba byambo byaambiwapo mu binembelo, kwibyambila mu jishinda jikwabo nangwa kwibitongolatu. (Mat. 4:3-10; 12:1-8; Luka 10:25-28; 17:32) Mu myaka kitota kitanshi, mivungilo panembelwe Binembelo beilaminanga mu mashinagoga. Kafwako kiyukilo kimwesha’mba Yesu wajinga na mivungilo yanji mwine ne, bino wayukile bingi Binembelo kabiji wibitongolanga javula pa kufunjisha bantu. (Luka 24:27, 44-47) Kyo kyamulengejile kwamba’mba bintu byo afunjishenga kechi byajinga byanji mwine ne. Waambanga byo afunjile kwi Shanji.—Yoa. 8:26.

Tukeba kulondela byaubanga Yesu. Tukyangye kumumvwapo kala Lesa saamba byonka byo kyajinga kwi Yesu. Bino Baibolo Mambo a Lesa. Umvwe saka tukumbula mepuzho kwingijisha Baibolo, bantu kechi bakatotako atweba ne. Tumwesha’mba mu kifulo kya kwamba milanguluko ya bantu bambulwakoloka, tukeba Lesa kwamba bukine.—Yoa. 7:18; Loma 3:4.

Nkebelo yetu kechi ya kwingijishatu Baibolo ne, bino ke ya kumwingijisha mu jishinda ja kukwasha ye tubena kwisamba nanji. Tukeba aye kumvwisha. Kwesakanatu na muchima wa mwine muntu, mwakonsha kwisamba nanji milanguluko ya mu Baibolo kupichila mu kwamba’mba: “Nanchi bintu byaamba Lesa kechi byo byawama kulondela nenyi?” Nangwa mwakonsha kwamba’mba: “Nanchi mwayuka’mba Baibolo wakumbula bobo bwipuzho nyi?” Umvwe mubena kwamba ku muntu ubula kunemeka Baibolo, mwakonsha kwingijisha ñambilo ingi. Mwakonsha kwamba’mba: “Mwane nesambeko nenu buno bungauzhi bwaambiwe kala.” Nangwa mwakonsha kwamba’mba: “Buku ye basampanya panopantanda ponse mwapita bwikalo bwa bantu waamba bino amba . . . ”

Bimye bimo, mwakonsha kwambapotu byambo bimo byaambiwapo mu kinembelo. Pano bino, po kyafwainwa, kyanema bingi kuzhikula Baibolo ne kutanga byo aamba. Mumweshai muntu kinembelo mu Baibolo wanji umvwe uji nanji. Kwingijisha Baibolo mu jino jishinda javula kukwasha bingi bantu.—Hebe. 4:12.

Bakulumpe mu kipwilo baji na mwingilo mukatampe bingi wa kwingijisha Baibolo pa kukumbula mepuzho. Kintu kimo kikebewa pa kwikala mukulumpe mu kipwilo ke kya kuba’mba mulongo wafwainwa ‘kukwachisha ku mambo a kishinka a mwayila lufunjisho lwanji.’ (Titu. 1:9) Musapwishi mu kipwilo wakonsha kukeba kuba kintu kyanema bingi mu bwikalo bwanji panyuma ya kumufundako ku mukulumpe. Byo kyakonsha kuwamapo umvwe ao mafunde afuma mu Binembelo! Umvwe mukulumpe mu kipwilo keobe bino, ukalengela bakwabo nabo kwingijisha binembelo mu mfunjishisho yabo.