Nanchi Mwinengezha Kulumbulwila Bantu Byo Mwaitabilamo Nyi?

ABYA mwakipitapo kala mu lweseko lwimulengejile kulumbulwila bantu bintu byo mwaitabilamo nyi? Akimonai kyamwekejile Susana, nyenga uji na myaka ya kusemwa 16, wikala mu kyalo kya Paraguay. Kimye kyo bajinga mu kalasi, bakwabo baambile’mba Bakamonyi ba kwa Yehoba kechi balondela “Lulayañano lwa Kala,” kumwitabila Yesu Kilishitu, nangwa Maliya ne. Kabiji baambile ne kuba’mba Bakamonyi bakosela bingi ku lwitabilo lwabo kya kuba’mba basalapo ne kufwa kukila kwibabuka ku kipatela. Umvwe yenu mwajingapo inge mwakumbwile’mba ka?

Susana walombele kwi Yehoba, kepo asuntwile kuboko kwanji. Kwashajiletu pacheche kuba’mba bakomboke, onkao mambo watambwile lūsa ku bafunjishi banji amba akalumbulule bulongo bintu byo aitabilamo byo aji Kamonyi wa kwa Yehoba. Mufunjishi wanji waswile. Pa milungu ibiji yalondejilepo, Susana wanengezhezhengatu kuba’mba akambe byo aitabilamo kupichila mu kwingijisha buloshuwa wa Inte Sha Kwa Yehova Ni Bani? Finshi Basuminamo?

Juba ja kwamba jafikile. Susana walondolwele ene mambo o tutelelwa amba Bakamonyi ba kwa Yehoba. Kabiji walumbulwile ne luketekelo lo tuji nalo pa mambo a kimye kya kulutwe ne ene mambo o tubujila kubikwa mashi. Byo apwishishe kulumbulula, wabujile bakwabo mu kalasi amba bepuzhe mepuzho. Baana ba sukulu bavula basuntwile maboko abo. Mufunjishi watemenwe bingi pa kumvwa mwana mucheche ke akumbule mepuzho kufuma mu Binembelo.

Mwana wa sukulu umo waambile’mba: “Natainweko ku Nzubo ya Bufumu jimo, kabiji kechi bakobekamo kipashañano kiji kyonse ne.” Mufunjishi wakebele kuyuka ene mambo o mwabujila bipashañano. Susana watangile Salamo 115:4-8 ne Kulupuka 20:4. Mufunjishi wakuminye bingi ne kwamba’mba: “Mambo ka mu machechi etu kyo mwavujila bipashañano, bino Baibolo saka ebikanya?”

Mwisambo wabo wa mepuzho ne mikumbu wapwishishe maminiti 40. Susana byo aipwizhe kalasi yonse inge kya kuba bakebelenga kutamba vidyo yaamba’mba, No Blood—Medicine Meets the Challenge, bonse bakumbwijiletu kya mumo amba, ee. Mufunjishi wanengezhezhe kuba’mba bakatwajijile na kwisamba juba jikwabo jalondejilepo. Panyuma ya kutamba vidyo, Susana watongwelepo mashinda akwabo aitabizhiwa na Bakamonyi ba kwa Yehoba a kubukilwamo kwa kubula kwingijisha mashi. Byo aambile bino, mufunjishi waambile’mba: “Kechi nayukile amba kujipo mashinda akwabo avula a kubukilañenamo ne. Kabiji kechi nayukile buwame buji mu kubukwa kwa kubula kubikwa mashi ne. Nanchi ano mashinda a kubukilañenamo engijiwatu ku Bakamonyi ba kwa Yehoba kwapwa nyi?” Mufunjishi byo aumvwine amba engijishiwatu ku bantu bonse, waambile’mba: “Kimye kikwabo inge Bakamonyi ba kwa Yehoba baiya pa nzubo yami, nkesamba nabo.”

Mwisambo ye anengezhezhe Susana wa maminiti 20, waishile kupwisha maawala asatu. Byo papichile mulungu umo, baana ba sukulu bakwabo nabo baambile pa bintu byo baitabilamo mu machechi abo. Byo bapwishishe kwamba, bebepwizhe mepuzho avula bingi, bino bano baana ba sukulu baletele uno mwisambo bakankelwe kulumbulula bintu byo baitabijilemo. Mufunjishi wibepwizhe’mba: “Mambo ka o mwakankelwa kulumbulula bintu byo mwaitabilamo byonka byalumbulwile mukwenu mwana wa sukulu Kamonyi wa kwa Yehoba?”

Abo bakumbwile’mba: “Bakamonyi ba kwa Yehoba bafunda Baibolo kya kine kine, pano atweba ne.”

Mufunjishi wabwelele waambila Susana amba: “Ee, kya kine mufunda Baibolo ne kwibikako na ngovu kwingijisha byo ifunjisha. Mwafwainwa kusanchilwa.”

Susana wakonsheshe kwikalatu nzo. Pano bino pa kuba’mba abule bakwabo baana ba sukulu bintu byo babujile kuyuka, walondejile kya kumwenako kyawama kya kamwale mwina Isalela wabula kutongolwa jizhina ye batwajile mu buzha ku bena Silya. Awa kamwale waishile kufikila mu nzubo ya mukulumpe wa nzhita ya bena Silya wa jizhina ja Nemani, wajinga na kikola kyatama kya pa kikoba. Awa kamwale mwina Isalela waambile kwi nkambo yanji wa mukazhi amba: “Inge bankambo ba Nemani bajinga konka kuji ngauzhi wikala mu Samaliya! Inge wibabuka mbumba yabo.” Uno kamwale wamwene kuba’mba wafwainwe kusapwila pe Lesa wa kine. Kino kyalengejile Nemani nkambo yanji kwikala mupopweshi wa Yehoba.—2 Mfu. 5:3, 17.

Popamotu, Susana naye kechi wazhindaminetu ne kuleka kusapwila pe Yehoba ne pa bantu banji ne. Byo aambile pa mambo a bintu byo aitabilamo byo bazhinaukilenga bakwabo, Susana wakokejilenga mukambizho wa mu Binembelo wa kuba’mba: “Zhijikai Kilishitu mu michima yenu bu Nkambo: moba onse ikajilai jimo na mwa kwibakumbwila bonse bemwipuzha mambo a luketekelo lo muji nalo, bino kasa muba na bukimote ne mushingi.” (1 Pe. 3:15) Nanchi ne anweba mwinengezha kwamba bintu byo mwaitabilamo ne kwitendekelako umvwe kyakebewa nyi?

[Kipikichala pa peja 17]

Bino bingijisho byakonsha kwimukwasha kwamba bintu byo mwaitabilamo