Mepuzho Afuma ku Batanga

Mambo ka Mosesa o ebazhingijile baana ba kwa Alona ba Eleaza ne Itamala panyuma ya lufu lwa balongo babo ba Nadaba ne Abihu, kabiji bukaji bwanji bwapwile byepi?—Levi 10:16-20.

Byo papichiletu kimye kicheche kufuma po babikijileko buñanga, Yehoba waipaile baana ba balume ba kwa Alona ba Nadaba ne Abihu mambo balambwile mujilo ungi ye abujile kwibakambizha. (Levi 10:1, 2) Mosesa wakambizhe baana ba kwa Alona bashajile bomi kubula kuba bulanda na mambo a kufwa kwa balongo babo. Palutwe kacheche, Mosesa wibazhingijile ba Eleaza ne Itamala na mambo a kubula kuja mbuzhi wa mulambo wa bubi. (Levi 9:3) Mambo ka Mosesa o azhingijile?

Mizhilo yo apaine Yehoba kwi Mosesa yaambile amba ñanga wapananga mulambo wa bubi wafwainwe kuja lubaji lwa uno mulambo mu kipango kya tente wa lusambakeno. Kuba bino kwalumbulwilenga amba mulambo wa bubi wa boba bamupaine watambwijilwe. Nangwa byonkabyo, inge kya kuba mashi amo a kitapisho beatwala Mwine Mwazhijisha, ko kuba amba mu tente mutanshi wa nzubo yazhila, kino kitapisho kechi bafwainwe kwikija ne. Kyafwainwe kusokwa.—Levi 6:24-26, 30.

Panyuma ya byobya bya malwa byaubiwe joja juba, Mosesa wamwene kuba amba mikambizho yonse ya Yehoba yalondelwa. Byo amwene kuba amba mbuzhi wa mulambo wa bubi bamusoka, wazhingijile ne kwipuzha Eleaza ne Itamala ene mambo o babujijile kuja uno mbuzhi kwesakana na byo kyakebewenga, mambo mashi anji kechi beapaine kwi Yehoba, Mwine Mwazhijisha ne.—Levi 10:17, 18.

Alona wakumbwile bwipuzho bwaipwizhe Mosesa, mambo aba bañanga bashajile bomi kyamweka baubijile monka mo ebambijile. Na mambo a kwipayiwa kwa boba baana banji babiji babalume, Alona kampe wazhinaukile inge kyafwainwe bañanga kuja yewa mulambo wa bubi pa joja juba monka mwibaswishishe jiwi jabo ja mu muchima jawama. Kampe wamwene amba inge baja kechi bakonsheshe kwitabilwa kwi Yehoba ne, nangwa kya kuba kechi bo balengejile kuba’mba ba Nadaba ne Abihu balenge mambo ne.—Levi 10:19.

Alona kikatakata kampe walangulukile amba pa joja juba ba mu kisemi kyanji po baingijile mingilo ya buñanga kimye kitanshi bafwainwe kutako muchima kutokesha Lesa nangwatu mu tubintu tucheche. Nangwa byonkabyo, jizhina ja Yehoba janenenwe bibi na mambo a Nadaba ne Abihu kabiji bukaji bwa Lesa bwibafikijile. Na mambo a kino, Alona kampe walangulukile amba ba mu kisemi kya buñanga mwaubiwe ano mambo kechi bafwainwe kujako kyokya kitapisho kyazhila ne.

Kyamweka Mosesa waswile byakumbwile kolojanji, mambo kibaba kyapezhako na byambo bya kuba amba: “Kabiji Mosesa pa kwikyumvwa kino, watondelwepo.” (Levi 10:20) Kino kyamwesha kuba’mba Yehoba naye watondelwe na byakumbwile Alona.