Mepuzho Kufuma Kubatanga

Yehoba byo akanya kupopwela bankishi, mambo ka o abujijile kukambula Alona byo alengele mwana ñombe wa ngolode?

Alona byo alengele mwana ñombe wa ngolode byonka byo tutanga mu Kulupuka kitango 32, walajile muzhilo waambile pa kupopwela bankishi. (Lupu. 20:3-5) Ne mu jino jishinda, ‘Yehoba byo amuzhingijile Alona wasakile kumonauna; kabiji [Mosesa] wamulombejile aye Alona naye mu kyonkakya kimye.’ (Mpitu. 9:19, 20) Nanchi lulombelo lwa kwa Mosesa muntu walumbulukile lo alombejileko Alona ‘lwakijile mu mingilo yo lwaingijile’ nyi? (Yako. 5:16) Ee. Na mambo a luno lulombelo kabiji ne na mambo a bishinka bikwabo bibiji, kyamweka Yehoba wakumbwile lulombelo lwa kwa Mosesa kabiji kechi wamukambwile Alona ne.

Kishinka kimo kyalengejile kyamweka kyajinga na mambo a bukishinka bwa kwa Alona bo amwesheshe pa myaka yavula. Mosesa byo bamutumine kuya na kwisamba ne Felo kabiji ne kulubula bena Isalela kufuma mu Ijipita, Yehoba watongwele Alona kwendela pamo ne Mosesa kuba amba akekale wa kumwambilako. (Lupu. 4:10-16) Bano banabalume babiji bakokejile ne kuya na kwimana ku meso a mfumu wa bena Ijipita bimye byavula, ne kuchinchika byambo byatama bibanenenenga Felo wakosele muchima. Kabiji byo bakijinga mu Ijipita, Alona wamwesheshe muchima wa bukishinka mu mwingilo wa Yehoba.—Lupu. 4:21.

Kabiji akimonai ne kyalengejile Alona kulenga mwana ñombe wa ngolode. Mosesa wajinga ku Mutumba wa Sinai pa moba 40. “Bantu byo bamwene’mba Mosesa wabanda kufuma ku mutumba,” bakanjikizhe Alona kwibalengela mwana ñombe. Alona wakwatankene nabo ne kwibalengela mwana ñombe wa ngolode. (Lupu. 32:1-6) Nangwa byonkabyo, byubilo byamwesheshe Alona palutwe byamwesheshe kuba’mba kechi kyafumine panshi ya muchima wanji kuba’mba kwikale uno nkishi ne. Bamukanjikizhetu. Kyakumwenako, Mosesa byo aubile kintu kya kukumya pa mambo a kupopwela bankishi, baana bonse babena Levi, kubikakotu ne Alona, basajilepo kwikala ku lubaji lwa kwa Yehoba. Biumbi bisatu bya bantu batainwe na mambo a kupopwela bankishi bebepaile.—Lupu. 32:25-29.

Panyuma ya bino Mosesa waambijile bantu amba: “Mwalenga mambo akatampe.” (Lupu. 32:30) Kabiji Alona kechi ye yenkatu wizhachishe pa mambo o alengele ne. Aye ne bantu bakwabo bamwenejilemo mu lusa lukatampe lwa Yehoba.

Panyuma ya kino kintu kyaubiwe kya kupopwela mwana ñombe wa ngolode, Yehoba wakambizhe amba Alona ekale ñanga mukatampe. Lesa waambijile Mosesa amba: ‘Muvwikai Alona bivwalo byazhila, ne kumushinga manyi mu kumuzhijika amba akañingijile mwingilo wa buñanga.’ (Lupu. 40:12, 13) Yehoba wamulekejileko mambo Alona pa bukoke bwanji. Alona wajinga wakishinka na muchima wanji yense ku mpopwelo ya kine, kechi wajinga nsatuki wapopwelanga bankishi ne.