America

Baana Bakishale Batanwa ku Kupwila

Ba Angela bekala mu Suriname, bayile na kupempula baana bakishale ko bebalamina. Mukulumpe utala pa baana bakishale wajinga nyenga wakoka ku mupashi. Onkao mambo, waswishishe ba Angela kusapwila baana bakishale. Ba Angela besambile na baana 85 ne kwibatambisha mavidyo pa jw.org. Kyafuminemo batendekele kufunjisha Baibolo baana bavula. Bapainiya babiji bakwatankene nabo, kabiji bonse bajinga na mabumba o bafunjishanga. Awa nyenga wakokele ku mupashi waambi­le’mba wafunjishe baana nyimbo imo iji mu buku wetu wa nyimbo ne kwibatangila mashimikila a mu Baibolo bufuku. Uno nyenga wakebele kutendeka jikwabo kupwila, pano bino kyakatezhe kusha baana 85 bunke bwabo. Onkao mambo, wanengezhe ku­ba’mba bonse bebasendenga ku Nzubo ya Bufumu. Na mambo a kuba po balamina baana bakishale kechi palepa na Nzubo bya Bufumu ne, balongo bebakwashangako pa kuya ku Nzubo ya Bufumu. Luno uno nyenga ne baana bakishale 85 batanwa kimye kyonse ku kupwila.

Gabriel Wakwashishe Bankambo Yanji

Byo babwelelenga ku nzubo kufuma ku kushonkena mu Paraguay, Gabriel uji na myaka ya kusemwa itanu na umo walangulukilenga pa buneme bwa kusapwila byambo bya Bufumu. Wavulukile bankambo yanji ne ku­ba’mba wafwainwa kwikala nabo mu Paladisa. Bino bankambo yanji babalume kechi bamwesheshepo muchima wa kukeba kufunda bukine ne, kabiji bayanjishanga bingi bakazhi babo ne baana babo bajinga Bakamonyi.

Pa jonka jino juba Gabriel wabujile bansemi banji kutumina bankambo yanji ku Argentina ku­ba’mba esambe nabo saka abena kwibamona pa vidyo. Gabriel walumbulwijile bankambo yanji babalume ene mambo kufunda Baibolo o kwanemena kabiji wibepwi­zhe’mba: “Nkambo, mwakonsha kutemwa ku­ba’mba ne mufunjishenga nyi?” Bankambo yanji baswile. Gabriel wafukwile ku­ba’mba bafundenga mu buloshuwa wa Umvwainga Byamba Lesa Mukekale Myaka. Mu bañondo bacheche balondejilepo bafunjilenga mu uno buloshuwa. Bapitulukilangamo jimo mambo bonse kechi bayukishe kutanga bulongo ne. Kimye kyonse kyo bafundanga, Gabriel wanengezhanga lufunjisho bulongo ne kuvwala jilaya janji wabikapo ne tayi.

Mu kuya kwa moba bankambo yanji bafukwilepo kuya na kupempula Gabriel ne kisemi kyonse pa milungu icheche. Byo bayile na kwibapempula, batainwe ne ku kupwila pamo na kisemi kyonse. Byo babwelele ku Argentina, batwajijile kufunda Baibolo na mulongo, baubilenga bingi bulongo kabiji baikajile basapwishi babula kubatizhiwa. Gabriel ne bankambo yanji balombela pamo pa juba pa juba. Gabriel naye wanunguluka bingi. Naye luno musapwishi wabula kubatizhiwa. Bankambo yanji bamwesheshe patoka kwipana kwabo kwi Yehoba byo babatizhiwe lubatizhilo lwa mu mema.

“Mwaishile pa Kimye Kyafwainwa”

Mu Brazil, byo basampenyenga talakiti wa Umvwe Muntu Wafwa, Wakonsha Kwikala Mumi Jibiji Nyi? ba Jen­nifer bakonkonsheshe pa kinzhilo kya mwanamukazhi umo wayilenga ku kijilo kya mulunda nanji. Ba Jennifer baambijile uno mwanamukazhi amba, nangwa kya kuba kechi mwakwitutengelanga ne, mbena kukeba kwimupa talakiti waamba pa luketekelo lwa kumona jibiji batemwe betu bafwa. Uno mwanamukazhi wakuminye byo amwene uno mutwe, bino waswile kutambula uno talakiti. Byo bamwipwizhe inge wakonsha kutemwa kusendapo matalakiti a kuya na kupa bajinga na lufu, uno mwanamukazhi wamutemenwe uno mulanguluka kabiji walombele matalakiti atanu na ana.

Ba Jennifer babweleleko ku uno mwanamukazhi, kabiji waambi­le’mba: “Byo papichile kimye pa juba jitanshi jo mwaishile, popo nayukile ku­ba’mba mwaishile pa kimye kyafwainwa. Lesa wimutumine kwiya na kuntekenesha mambo napelejilwe bingi.” Uno mwanamukazhi wapele bantu ano onse matalakiti. Mulongo wabo wasapwijile pa luno lufu watangile kano katalakiti konse na jiwi jasansuka. Bantu bonse batemenwe bino byambo kabiji bamusanchijile pa bino byambo bya lutekenesho. Uno mwanamukazhi waswile kutendeka kumufunjisha Baibolo.

Kusapwila mu Tap-Tap

Ba mu kisemi kya Betele basatu mu Haiti bajinga pa lwendo lo baendele mu matakisi apusana pusana o bate­la’mba tap-tap. Pa luno lwendo lwabo lwa maola abiji ne kichika, besambilenga na bantu pa luketekelo lwa Bufumu, bapaine magazine 50 ne matalakiti 30. Ba Gurvitch bamo pa bano bengijila pa Betele batangijile ye bajinga nanji mu motoka kibaaba kya mu magazini wa Labainga! Nsongwalume wa jizhina ja Pépé watelekelengatu, wivwangilemo mu mwisambo. Walombele ku mufunjisha Baibolo, kabiji waikalanga mu nyaunda ya kipwilo mwaingijilanga ba Gurvitch. Mu January mu 2014 ba Gurvitch kimye kitanshi kyo bamonañene ne Pépé watendekele kutanwa ku kupwila ne ku kubuñana. Ubulako bakwabo byo aitabilamo kabiji ubena kukebesha bingi kwikala musapwishi wabula kubatizhiwa.