Asia ne Byalo bya ku Musela

Waipwizhe Inge ne Bakwabo Bakonsha Kwiya

Mulongo mu kyalo ya Indonesia wapele ukwasha bantu pa kwimika myotoka kapepala ka kumwita ku Kivuluko saka kwashalatu moba abiji. Uno mwanamulume Mozilemu, waipwizhe inge ne bakwabo nabo bakonsha kwiya na kutanwako byo bamupeletu kapepala kamo. Uno mulongo wamubujile’mba bakwabo nabo bakonsha kwiya. Uno mwanamulume waambile’mba uji na kisemi kikatampe kabiji walombele ne tupepala twa lwito tukwabo. Mulongo wamupele tuno tupepala 20 ne kumulumbulwila’mba kuno kupwila ke Kivuluko kya lufu lwa kwa Yesu kabiji bonsetu Bamozilemu ne bena Kilishitu bakonsha kutanwako. Uno mwanamulume waambile kuba’mba ukeya na bantu 60 nangwa 70.

Mu luonde mwajinga bantu 248 byo kwashajiletu kimye kicheche jashi ja Kivuluko kutendeka. Awa mwanamulume ukwasha bantu pa kwimika myotoka wafikile na bantu nobe 100, banabalume, banabakazhi ne baana bacheche, bakote ne mwanamukazhi wajinga na jivumo ja bañondo bavula. Bapaine mali ku bantu bajinga na myotoka ya kwibaleta ku hotela kwaikejile Kivuluko. Byo amwene jino jibumba, malonda wapa hotela wibakainye kutwela. Bakuminye bingi pa kumona Bamozilemu bavula baishile na kutanwa ku kupwila kwa bena Kilishitu. Bamalonda byo bebamwesheshe tupepala pa kwichila bantu ku Kivuluko, bebatwajile mwaikejile Kivuluko. Bantu 60 pa jino jibumba bebaswishishe nangwa kya kuba mwayujile.

Byo papichile moba acheche awa mulongo wayile nakumona yewa mwanamulume ubula bantu pa kwimikila myotoka ne kumwipuzha inge kya kuba bantu bamwenejilemo mu mutanchi wa kupwila. Wamubujile’mba baumvwine bumvu, bino waambile ne kuba’mba bakuminye bingi mambo bantu bonse bajingako bakasulukile bingi kabiji beimwinenga mu maboko. Mulongo wabwelele wamwitako ne ku jashi jiikajila jajingako pa Mulungu mu mulungu walondejilepo. Ku jino jashi waishile na bantu 40, balongo banji ne bo ekala nabo kinkalankulo. Na mambo a kuba bafikile kwipi na kumpelo ya mutanchi wa kupwila, bakulumpe mu kipwilo bafukwilepo kubwezhapo jino jashi. Wakumupando watongwele mutwe wa jashi jibiji ne kulumbululako pacheche biji mutanchi kubikapotu ne lwimbo ne lulombelo. Pa kuba’mba bakwashe bano Bamozilemu kumvwisha, ñambi waingijishenga byambo byo bayuka nabiji bya kuba’mba, “Buku Wazhila” pa kutongola, “Baibolo,” ne “ngauzhi Isa” pa kutongola “Yesu.”

Mu kuya kwa moba, mukulumpe mu kipwilo wayile na kumona awa mwanamulume ubulañana pa kwimikila myotoka pa nzubo yanji ne lufunjisho lwa Baibolo lwatendekele mu buloshuwa wa kuba’mba Umvwainga Byamba Lesa. Ne bakwabo 12 nabo baishile na kushinkwako ku uno mwisambo, pajinga ne Bamozilemu banabakazhi ne baana.

Mabuku a Kutanga mu Masakya

Masakya afuma ku Ulaanbaatar mu Mongolia, aya mu mapunzha onse a mu kino kyalo. Ano masakya enda maola 48. Baji mu sakya batalatu pa bipenze nangwa kulala. Mu ano masakya kechi babikamo mabuku a kutanga ne, nangwa kya kuba bena Mongolia batemwa bingi kutanga. Kino kyalengejile balongo ba mu Kipwilo kya Songinokhairkhan kuya na kumona dalaivwa wa sakya ne kumwambila’mba: “Twimuletelapo buku wawama bingi wa bupetu. Mu madeke mwikala mabuku a kutanga mu mapokochi a ku bipona. Inge mwamona kuba’mba bo musenda bakonsha kutemwa kwikalapo na bya kutanga, twakonsha kubikamo mabuku mu mapokochi a bipona.” Bebaswishishe kubika mabuku mu masakya atanu na asatu. Balongo bashile magazini 299 ne mabuloshuwa 144. Kabiji banengezhe kuba’mba batwalanga magazini akatataka inge alupuka.

Kulubilamo

Mu kyalo kimo kya ku Asia bakulumpe babiji bebambijile kuya na kumona nyenga wabulanga kuya na kupwila pa myaka itanu na isatu. Na mambo a kuba’mba kechi bamuyukile ne, bano balongo bamutumijile foni ne kumvwañana kumonañana nanji pa shitolo wanji mukatampe pa kisankanyi. Byo bapitañenenga mu tumikwakwa, bataine shitolo wipasha na shitolo wa yewo nyenga. Byo batwelele bebemwine ku mwanamukazhi watujile Baibolo mucheche pa tebulu. Byo ebabujile jizhina ja kisemi kyanji, muzhi ne mafumbi a baana banji babiji, balongo bapwishishe kuba’mba ye iye nyenga wakokele ku mupashi. Bano balongo baambile’mba: “Twi balongo benu, Bakamonyi ba kwa Yehoba.”

Naye wakumbwile saka akumya amba: “Ne amiwa ne mwina Kilishitu.” Mwekelo ya kilungu kyanji yalengejile balongo kutendeka kulangulukapo. Nangwa byonkabyo, bamupele mabuku alumbulula Baibolo kabiji wasanchile bingi. Bino bano balongo byo bayilenga, popo bayukile kuba’mba bakuya ku shitolo ungi! Bafwainwe kuya mu shitolo nambala 2202, kechi mu 2200 ne. Mulongo umo waambile’mba: “Naumvwine ne nsuki yaenda, mambo nalangulukile’mba bamalaika bo bakwitutangijila ku uno shitolo. Mwanamukazhi ye twatainemo wajinga na jizhina ja bansemi jimo na nyenga yetu, kabiji baana babo bonse babiji bajingatu mu mafumbi amo kabiji bonse bafuma ku mpunzha imotu. Uno mwanamukazhi inge kya kuba wajinga na jizhina jingi ne jizhina ja mpunzha jingi, inge twayukile kuba’mba kechi iye ne.” Byo bashiletu mashitolo abiji bataine nyenga wibapembelejilenga.

Na mambo a kulubilamo, awa mwanamukazhi ye bataine patanshi watendekele kufunda Baibolo ne kutanwa ku kupwila. Kabiji awa nyenga naye watendekele kutanwa ku kupwila konse ne kuya mu mwingilo wa kusapwila. Uno nyenga waambile’mba: “Naumvwine bingi bulongo, mambo Yehoba kechi wavulamine ne, nangwa kya kuba pa myaka yavula kechi napwilanga ne.”

Kutuma Byambo pa Foni Inge Kuji Mvula

Ba Greg ne ba Alma bavilukijile pa jikuji ja Catanduanes mu Philippines na kwingijila kubena kukebewa basapwishi bavula ba Bufumu. Ku ino mpunzha kwavula mitumba, onkao mambo, ba Greg ne ba Alma benda makilomita 19 panshi pa kuba’mba batane bantu bamo mu nyaunda yabo. Kimye kimo benda na bwato pa maola abiji pa kuba’mba batane bantu bakusapwilako pa jino jikuji. Kibakatazha bingi kuya ku bano bantu mu kimye kya mayoo. Abo kechi baikalangatu pa nzubo ne, bafukwilepo kutuminanga bantu byambo pa foni mambo kampanyi ka mafoni kaswishanga kutuma byambo kyatutu.

Ba Greg baambile’mba pa kunemba byambo batendekelangapo jizhina jabo. Kepo banemba’mba: “Mbena kukeba kwimubulako byambo bimo bya mu Baibolo.” Kinembelo kimo kyo batana kuba’mba kingila bingi bulongo ke Yoano 17:⁠3. Inge bekikopolola pa foni, bepuzha mepuzho abiji amba: Lesa wa kine ye ñanyi? Yesu Kilishitu ye ñanyi? Kepo bamwambila muntu ye batumina kuba’mba akumbule. Inge wakumbula, ba Greg bamutumina kinembelo kikwabo kya Salamo 83:18. Inge awo muntu watwajijila kukumbula, bamwipuzha inge kya kuba bakonsha kutwajijila mwisambo wabo pa foni. Ba Greg ne ba Alma baamba’mba bavula bakumbula.

Mwanamukazhi umo ba Greg ne ba Alma ye batumijile byambo wajinga na mepuzho avula bingi pa Baibolo, onkao mambo, betuminanga byambo pa foni bimye byavula bingi. Kuno kwitumina byambo kwalengejile batendeka ne kumufunjisha Baibolo. Uno mwanamukazhi wabulangako mwananji ne mukwabo mo baingijilanga byo afunjilenga. Bano bonse basatu babatizhiwe.